ماراح اخليه يسافر هالسفرة

shak!shoka · 3 فبراير 2013

شلونكم بنات

بدش بالموضوع بدون مقدمات لان العنوان يكفي عن كل الحجي و المشاعر الي تنتابني !

زوجي فاجأني قبل 5 ايام انه حاجز لاحد الدول مع ربعه " المجهولين" ع قولته ربع الارف المخيم
كل الي اعرفه انه عمارهم تتراوح بين ال 40 و 45 حطبه !

ريلي طبعا عمره 25 شوكه بس داش جو مع شياب العازه هذيل !

صارله 4 سنين يحن يروح لهالديرة ودايما ارفض و اقطع الحديث وما اخليه يناقشني

هالمره
قبل الحجز بيوم كلمني و طبعا رفضت و عصبت ولاعت جبدي من حنته و خليته و نمت

ثاني يوم ياب تذكرته و حطها بالتجوري و بلغني

ما علقت بس كنت منذهله و انصدمت ما كلمته خليته يولي وانا اساسا هاليومين مشغوله بشغله ماخذه وقتي ومابي اشتت انتباهي قلت اخلص شغلتي واتفرغ له

المهم عدت هالخمس ايام عاديه ما ناقشته بشي

اليوم ما ادري شنو طرا علي
مع انه مو عادتي افتش الفون او انبش

دشيت ع الملاحظات!

الملاحظات مو مكان ثاني
دليل انه حتى فضولي بريء

انصدمت بمجلد ! ارشيييييف كامل اسمه باسم بنات الديرة اياها

وين ؟؟
بالملاحظات !

كله مقااااااطع و كل مقطع عنوانه " جلطه " من قوت التسميات !!

ما حسيت بشي غير كنت ماسكه التلفون و ايدي تتنافض
واحس بوصاخه و لوعة جبد بغيت ارجع !

اهو وينه ؟

بالحمام عزكم الله

الوقت يداهمني
ما يمدي افتش و اتعمق

بلعت الصدمه و رحت حطيت له زحير ياكله
وما كلمته ولا حررررف

قلتله انا بنظف الدار ع ما تخلص اكل

قفلت الباب و فتحت الملاحظات و دزيت المقاطع من تلفونه ع ايميلي و مسحت اثر الجريمه

و اخذت عهد ع نفسي انه ما يسافر

ع جثتي

والله لاعلمه

طبعا لا تشوفون نفسيته من حجز و استلم تذكرته
24 ساعه يدندن و يغني و مستانس وكلللل يوم يجيك ع الكالندر

توني استوعبت هالحركات

المهم
اليوم
نطرته يطلع يروح المخيم

رحت بطلت التجوري " طبعا انا اعرف الرقم صارلي سنين بس مسويه نفسي ما اعرفه و بين فتره وفتره اجيك عليه لان ضامن اني ما اعرفه و يحتفظ بخصوصياته بهالتجوري "

طلعت التذكره

و شقيتها
نتفتها قطع صغيييييييييره صغيييييره و حطيتها بظرف و رديتها مكانها

سفره ماراح يسافر لو يطلع بلسانه شعر
و بصماخه قرون

للحين ما يدري اني شفت المقاطع و لا يدري عن التذكره !

توني اصحا من صدمتي

مو عارفه تصرفي صح ولا غلط

بس هدفي و غاية مرادي انه ما يسافر

انا مو ناقصني جمال ولا جسم ولا بياض
وكافي اني اشرف من هالاشكال علشان لحد يقول غرتي و ما عندج ثقه

بس انا مابي افتح ع نفسي باب وابتلش
باجر تاخذ ريله ع السفر من غيري

عطوني رايكم ؟

و تعليقاتكم

و شكرا

مشتطـه · 4 فبراير 2013

أمبيييييييييييييييه

انا قمت اتنافض

امبييييه انصدمت

ياقلبي قلبج لالالا مستحيل

اول مرة اتأثررررر من سالفة بهالقسم ؟؟؟

وااااي بموت حره

علميه انج دريتي !!!!!!!!!!!!!!!!!!!!!!!!!!!!!!!!!!!!!!!!!!!!!!!!

لا تسكتين أمبيه بيروح لبنات اشكره

وعلى فكرة التذكرة يقدر يسافر بدونهااا

امبيه احتريت لاتخلينه

إوعي إوعي

انثى عاشقة · 4 فبراير 2013

والله الي سويتيه صح ونص
انا اساسا من غير شي ضد ان الريال يسافر بروحه مع ربعه
خير يعني نضحك ع بعض ونقول واثقين

تصرفج سليم
والدليل عندج تورينه خياسه والي يبي يسويه في سفرته
لو عصب وصارخ وعاند وسافر لا تردين له البيت

لان لو تعود يسافر بروحه مرات خلاص بيصير يسافر كل مرة

الشهد كله · 4 فبراير 2013

عفية عليج :ggdw::ggdw::ggdw::ggdw:

وإذا عرف راح إييج

خليج قوية :rgewrg::rgewrg:

وهدديه يا آنا يا السفرة

وإذا سافرت بترجع ما تلقاني بالبيت

شوف لك حل !!!!!!!!!!

جذيه بشديد اللهجة

لا تعطينه مجال يتكلم:eh_s(14)::eh_s(14)::eh_s(14):

حشمه · 4 فبراير 2013

اللي سويتيه غلط واكبر غلط اخذتي الموضوع بعناد

وعادي الحين يطلع تذكره ثانيه ويقول لهم ضاعت

ويضبط اموره ليش على بالج يوم السفره بس

بجيك التذكره اكيد ببطل التجوري على يوم ويدري

وذيك الساع انتي بتطلعين غلطانه

اولها لانج فتشتي من ورا وثانيه التجوري تقولين

فيه خصوصياته ليش تبطلينه انتي عادي عندج

زوجج يفتش من وراج ويشوف خصوصياتج ان كان

تلفونج ولا سوالفج مع رفيجاتج

وبعدين اسلوبج وانتي تكتبين كل شوي اعلمه واوريه

وزحير ياكله !!!! هذا اسلوبج معاه بالبيت

الصراحه اكيد بهج حبيبتي سايسيه تقربي منه

وبعدين مو كل من سافر خربط ليش حاطه ببالج

خرابيط وشدراج اللي بالملاحظات بسويهم ولا بروح لهم

ماتدرين يمكن الله الهادي ويمكن بروح يغير جو مع ربعه

كبار ولا صغار هذول ربعه عطيه شويه فجه وشوفي

ثقتج بمحلها ولا لا انتي حكمتي عليه من قبل لايسافر

ويبتي حق عمرك مشكله مالها داعي

لو مسافر ورد وشفتي عليه شي ذيك الساع من حقج

تزعلين واما الحين لا اهو من حقه يوديج بيت اهلج

وبقول لهم فتشت باغراضي وشقت وخربت

صيري عاقله وفكري قبل ماتتصرفين

حشمه · 4 فبراير 2013

shak!shoka قال:
انتي الي حط نفسج بمكانه

لو كان عند ماضي والله ستر عليج و تبتي تحبين احد يظل وراج و يلوع جبدج و يذكرج بماضيج
لا طبعا

ابدي صفحه يديده مع نفسج

و خلي عندج ايمان قووووووي بربج لو يخون راح يفضحه و يفشله
الله قال بكتابه الطيبون للطيبات

يعني لو انتي طيبه و عندج ثقه بربج و بنفسج
وكلي امرج لله
و ادعيه يبعد عنكم عيال السو

اكثر من جذي لا تسوين
لا تضعين وقتج و صحتج بامور يمكن تكون وهم و وساوس من الشيطان
سوي الي عليج اتجاه زوجج وتوكلي ع الله

هذا ردج على وحده من البنات اقريه يمكن تستفيدين منه

منال $ · 4 فبراير 2013

شو يعني زحير؟؟؟

معلش طلعت برة الموضوع؟

Zinab BH · 4 فبراير 2013

زين اللي سويتيه و صح و ماعليج من الزف اللي بتاكلينه بس خله يتادب ويتعلم

احلا المزايين · 4 فبراير 2013

انا عندي قناعة ان ارجال اذا حاط اباله شي يسوييييه
واذا هالشي مو عاجبني استخدم ذكائي
مااعاند واشق تذكرته
جذي يعاند ويصممم
اكثر
ليش حارقة نفسج
بالطقااااااااااااااااااااق
ربـه فوقه وبيتحاسب بروحه وذنبه علاجنبه
ان قدرت تمنعينه بشكل غير مباشر
وبحيلتج وكيدج امنعييييه
ماقدرتي لا اتقثين نفسج مارجال يستاهل بنظري

ام مرنون · 4 فبراير 2013

شوفى حبيبتى ان شاء الله ربنا يحفهولج ويرجعلك سالم محافظ على دينه وعلاقته بربه وببيته الى سويتيه معاج حق فيه لكن المشكله مش فى يوم السفره بعينها لكن فى الفكره نفسها يعنى انت فشلتى السفره وقطعتى التذكره وراح تسوى مشكله كبيره لكن ماعالجتى الامر وماعرفتى شو الى يبيه من السفره اذا كان حريم وانت تقولى انك جميله وبيضه ونظيفه و ,,,,,,,,,,,

لكن هو يقدر يقولج خلاص حبيبتى بلاها ها السفره ويسوى الى يبيه بالديره هنا ومايسافر وانت تدرين ان هالحريم هم بكل مكان الله يسهل لهم حالهم ويهيدهم يارب

الريال بيسوى الى يبه ما احد يقدر يمنعه وخاصه انه مرتب مع ربعه

اتاسفى له على فعلتك وقولى له ان حبى وغيرتى عليج دفعتنى اسوى شذى لكن انا استودعك الله وكل ثقه بالله فيك وبدينك وباخلاقه

لكن لا تنسى ان الزنا دين كلما اقترضت منه كان السداد من اهل بيتك ففعل ما شئت

فللدنيا قانون الدوران ما تفعله سيردلج ولو بعد حين وابتسمى واتركيه يسافر

مارح تقدى تسوى اكثر من شذى

الله يوفقك ويعمى عين زوجك عن كل حريم العالم وما يشوف غيرك اجمل نساء الارض امين

(حكاية قلب ) · 4 فبراير 2013

هههه زحير يعني أكل

,’

انتي شنو حصلتي بالملف ؟
يعني صور بنات !! مافهمتج عليج منيه
الله يكون في عونج

الهما · 4 فبراير 2013

يا رب يبرد قلبك
و يهدييييييه
اختي العزيزة تصرفك غلط
انت بهالطريقة بتخلينه يعاند و بيسافر
الريال حجز يعني رايح رايح ما راح تقدرين تردينه
الا اذا كنت غاليه عنده و مايقدر على زعلج بيهون و لو كان ما يرضى على زعلك ما حجز من أساسه
لو كنت مو شاقة التذكرة
كنت قلت لك خليها مكانها و قصي قصص و عبر دينية ممكن يصحى ...و فيها طرق كثيرة .... اي غلط أيها الزوج اللي بتسويه بيكون ديييين برقبتك و بيرد لك بيوم من الايام على عدة طرق و اشكال ...و اذكري القصة المشورة
((ان تاجر اقمشه اعطاة الله سعةمن الرزق و كان يحب زوجتة حب شديدا و فى احد الايام خرج الى عملة و فتح دكانة و فى ذلك الزمان كان الناس يحصلون على المياة من خلال الساقى الذى كان يجوب الشوارع و يملأ الجرار ...... السقة شخص شديد الاحترام لنفسة واسرته ذهب الى بيت تاجر الاقمشة و طرق الباب ففتحت زوجة السقه له و كانت سيدة تتميز بالجمال و حسن الخلق و كان السقة يراهه كل يوم فكان يملأ الجرة و يذهب و لكن فى ذلك اليوم نظر فى وجه زوجه التاجر و لعب الشيطان بدماغة فطلب من الزوجه ان تساعدة فى ملأ الجرة فقام بتحسس يديها اكثرمن مرة مما جعلها تطلب من الانتهاء سريعا و الانصراف ........... و عند عودة زوجها التاجر قصت عليه ما حدث من الساقى فتعجب التاجر لانة يعرف الساقى من زمان طويل و يعرف عنه حسن الخلق و قال لزوجته ما فعله الساقى قد قمت بفعلة اليوم مع احدى السيدات فى دكانى اليوم و قال مقولته الشهيرة ........ دقه بدقه .... ولو زدت لزاد السقة..))

قال رسولنا صلى الله عليه وسلم (عفّوا تُعف نساءكم)

قال الشافعي رحمه الله ....

عفوا تعف نساءكم في المحْرَمِ ****وتجنبـوا مـالا يليق بمسلـم

إن الزنـا دين إذا أقرضــته **** كان الوفا من أهل بيتك فاعلم

من يزنِ في قوم بألفي درهم **** في أهله يُـزنى بربـع الدرهم

من يزنِ يُزنَ به ولو بجـداره **** إن كنت يا هذا لبيباً فـافهـم

ياهاتكا حُـرَمَ الرجال وتابعـا**** طرق الفسـاد عشت غيرَ مكرم

لو كنت حُراً من سلالة ماجـدٍ**** ما كنت هتـّـاكاً لحرمة مسلمِ

لكن الآن ماعليك الا الانتظار...انتظري ردة فعله لمن يشوف هالتذكرة اللي قطعتيها....

خطرت في بالي قصه مشابهه ....
زوجها بيروح المغرب ... حاولت تثنيه ما قدرت بكت صارخت ...فمد ايده عليها...
هدت نفسها و قامت الليل .... و سوت خطه اتفقت مع طبيب و نامت بالمستشفى اوهمته انها انهارت و حالتها خطره و القلب دقاته مو منتظمة و كان الدرب بإيدها و الدكتور يقول حالته صعبه و عيالها (اللي طبعا ماخذين مقلب مثل الابو) يبجون و يصارخون ...الريال تحسسسسف
و تاب لله و طاف موعد السفر و ماراح...و كانت توبه نهائيه.....

عزيزتي ...في حال سافر (الله لا يقدر) فالقصه الطويلة خليه يقراها برساله حطيها بين ملابسه بجنطة السفر
مع الاستشهاد بالحديث اللي تحت
و انت من يسافر داومي على القيام بالليل داومي دوااام لا يسكت لسانك (عشان الطاقة تسري له)
و الله ثم والله لينقت قلبه و يرد بنفس اليوم
مدام انك قدرتي من قبل تثنينه عن السفر ف ان شاء الله هالمرة بيتوب يعني قلبه رهيف

اتمنى اني اوحيت لك بشي تقدرين تسوينه

يتيمة جابر العز · 4 فبراير 2013

مالوووومج

انا او مكانج انقع الفون والتذكرة بدولكة ماي لمده ٤ ساعات وفوق عشان اغثه يستااااهل ونص وزين تسوين

بناااات تكلموا بعقل هو لو يبي رضاها مافكر يغثها بسفره مثل جذي !!!!

انا إنسانه ضد وضد وضد فكرة ان الرجال يسافر مع ربعه !!!!!

حشمه · 4 فبراير 2013

احنا ماقلنه يبي رضاها اهو يبي وناسته

بس مو معناته تعانده وتشق التذكره جذي خربت

على روحها لو مخلي لها مكانه عنده بقول

ماحترمتي ومثل ماشقت التذكره بقول

بالطقاق بسافر غصب

احنا قلنا في حل ثاني عشان لاتخرب حياتها

سحرالعيوون · 4 فبراير 2013

مدام في نظره انج ماتعرفين التجوري ومادره بالتجسس مال التلفون جان الحين حلاته ماكنتي اشقين التذكره
جان تمنعين السفرة وانتي يازعم خايفة عليه وتحبينه وماتبين تقعدين بروحج تخترعين شي انتي
تعرفين ريلج شنو يقنعه فبتكونين في السليم وهم مانعة السفرة ولو سافرها بتكون بنغصة مو بحلاوة ومرة ثانية
يمكن يفكر الف فكرة شلون بسافر وبهدج لو انا منج يعرفني ماافتش ولا اعرف رقم التجوري جان استغليت
هذا الشي وخليته يحتار فيني الله يسخره لج

shak!shoka · 4 فبراير 2013

حسمه و البنات الي ضد موقفي

صح

يمكن تسرعت والحين فضحت نفسي اني اعرف رقم التجوري

انا حفظت الرقم مو بقصد التفتيش

انا احتاج اوراقي الرسميه احيانا و اهو خاشها عنده بالتجوري واحيانا يغثني و يعاند ما يطلع اي ورقه رسميه محتاجتها

وانا كتبت الموضوع تحت تاثير الغضب

اسلوبي مو جذي معاه

بالعكس

قليلة كلام
وانفذ طلباته
و ادعيله

بس الي شفته شي يقهر

بس اشوف ويهه تمر ع بالي كل المقاطع و الاشكال

مشاعري مو قادره اتحكم فييها

زوجي عنيد وما يسمع كلامي و دايما اهوا صح بس اذا صرت حاده معاه يستنع

شي غريب
ولمن اكون عسل و حبوبه و اقدره ياخذني بعناد

للحين ما عرف شفيني و درا عن تذكرته

الي تكتب تعليق تحاول تعيش الي انا مريت فيه

والله شي صععععععععب

الملف الي شفته صعقني

المشكله
كنت اشوف بالوتساب وكان يقولي ما شفتهم ما ادري منو دازهم صدقيني ما شغلتهم

بس هذا ملف كامل بارادته اهوا مسويله كوبي

و الملف عن بنات الديره الي ناوي يروح لها

ومو مقاطع معتاده ع اليوتيوب او الكيك

شي اكثر و اعمق

حسو بمشاعري

ابي وحده تعطيني راي سديد تقولي شلون اناقشه و اقوله الي شفته

انا مابي هوشه كبيره او صدام

ابي احافظ ع زوجي و بيتي

لو راح هالمره خلاص راح يتبطل باب ما يتسكر

عطوني راي
شلون اكلمه و انقده

غير المواعظ الدينيه لاني من عرفته وانا شغاله مواعظ ماكو فايده

shak!shoka · 4 فبراير 2013

مابي اطنش الموضوع يا بنات او اكتفي بالنصيحه

انا عقب الي شفته

ما عندي ثقه لا فيه ولا بالمجموعه الي رايح معاها !!

ليش انتظر مصيبه

او انتظر مرض

او لا سمح الله سحر

انا مهيأتله كل اجواء الراحه

حتى نوم ينام وانا بس ناطور يم باب الغرفه لحد يزعجه

هم انا عندي اشغال و ظروف ومع ذلك محتسبه الاجر و احاول بكل طاقتي انظم وقتي بحيث ما اقصر معاه

بس اهوا كل كلمه و الثانيه
انا تعبان نفسيا
مضغوط
متضايق
محتاج جو شبابي !!

شهالدلع و الاعذار الواهيه

يبون زواج و عيال و مسؤوليه و اهما مو قدها

اسمالله ع الرقه و الدلع

الرياييل مو كفو تقدير و مراعاة

كل ما زدتي الجيله عليه صار سيدا

وانا بهالموضوع ماعندي قابليه اتساهل او اطوفها

miss youyou · 4 فبراير 2013

حشمه قال:
احنا ماقلنه يبي رضاها اهو يبي وناسته

بس مو معناته تعانده وتشق التذكره جذي خربت

على روحها لو مخلي لها مكانه عنده بقول

ماحترمتي ومثل ماشقت التذكره بقول

بالطقاق بسافر غصب

احنا قلنا في حل ثاني عشان لاتخرب حياتها

:rerrerek::rerrerek::rerrerek::rerrerek::rerrerek:

حبيبتي أكيد تصرفك راح يكون له عواقب ولازم تستحملي إلي راح يجيج منه لانه تصرفك كله غلط
يعني العناد ما يمشي مع الريال العربي خصوصاً إذ كان كويتي وإنتي بجذي زدتي الطين بلة خصوصاً إنه هو راح ياخد الموضوع عناد و انك راح تفشلين مع الريايل و...و...

وحتى طريقة كلامج عنه كله عصبية يعني مو عارفة تاخذين الموضوع بشوية هدو وتفكري في طريقة ثانية تخلينه مايسافر من غير مشاكل يعني بالمختصر مثل مايقولون ( المعركة بس ما ربحتي الحرب ) هذا إذا ما طلع تذكرة ثانية وسافر بكلربحتي الحالتين وراح تطلعي إنتي منها بخساير أكثر ومنها رقم التجوري راح يغيره وحتى الفون ماله وأشياء وايد راح يغيرها فا تلاحقي على عمرش وحوالي تحلي الموضوع قبل ما يدري لان لو ما سويتي إلي سويتيه كان هو إلي راح يدور رضاتج بس الحين الله يعينتج إنتي إلي راح تدورين رضاه حتى لو كان هو الغلطان .

shak!shoka · 4 فبراير 2013

حشمه قال:
هذا ردج على وحده من البنات اقريه يمكن تستفيدين منه

وانا هذا مبدئي فعلا

وحتى لمن حجز تذكرته انا ما علقه و وكلت امري لله

بس الله اكشفه لي بالوقت المناسب

هني دوري لازم اوقفه و امنعه

مو معنى اني اوكل امري لله اصير غبيه و ما استوعب الاشاره الخطيره الي اعتبرها تنبيه من ربي

shak!shoka · 4 فبراير 2013

Miss you

اكيد بعصب

ولا ما عرفتي الكويتي عدل

كل ما عاملتيه بحده مشا معاج مثل الساعه

مشكلتنا احنا الحريم نداري و نسكت
حتى عن الحرام

اشوفه بعيني يسوي حرام و و اسكت علشان اداري مشاعره و ما اخسر الحرب

هاذي مو حرب

ومو ناطره رضاه انا

غصب عنه يتسنع و يخاف ربه

خلاص يا بنات غيرو هالاسلوب

والله العظيم محد خرب الرياييل و قواهم ع الحرام غير هالاسلوب

شوفو غيركم

تاكل الريال بقشوره و تسفل فيه لو شافت عليه زله و ماكو مثل راحتهم

و حقوقهم الكامله
والمراعاه
والمجابل
و الحوف

بليز ابي وحده شخصيتها قويه و حكيمه تعطيني راي

ماراح اخليه يسافر هالسفرة

New member

New member

New member

New member

New member

New member

New member

New member

New member

New member

New member

New member

New member

New member

New member

New member

New member

New member

New member

New member