اسم المقرر :
أصول فقه 1
اسم الدكتور :
د. ياسر النشمي .
نوع الاختبار موضوعي ولا مقالي :
هههه مو اختبار أنا اسميه مجلة
متنوع، وحلو اختباره وغريب عجيب أول اختبار بالدنيا اصادفه جذي لوووول
جنه يسولف معاج ..
راح يعلمكم على طريقة أسئلته وحيل حلوه وفيها السهل والسهل الممتنع والصعب
عساس يميز اللي تشغل عقلها والا بس تحفظ وتمشي ؛)
يطلب تقارير وبحوث وبرزنتيشنات ولا لا :
تلخيص كتاب : تصنيف الناس بين الظن واليقين للعلامة د. بكر أبو زيد عليه 10 درجات ..
المناظرات : ب اصول ١ بس المطلوب منج تكتبين رأي المذهب ( ........ ) في مسألة : هل لمس الرجل للمرأة بلا حائل ينقض الوضوء ؟ مع ذكر الأدلة، ووجه الدلاله ..
^^ كل وحدة يقولها المذهب اللي ترجع له .. عليها 10 درجات
+ بونص حفظ نظم العمريطي على الورقات في الأصول للجويني .. عليها 10 درجات
الكتاب اللي تلخصونه + المراجع للمناظرات + النظم
كلها طابعها الدكتور بالمذكرة فلا تحاتون ما راح تركضون وتتعبون
في شغله اهي بونص عليها 5 درجات اللي اهي قراءة نصيه، يعني يقول لكم منو ناوي يطلع ويطلعون خمس طالبات ويعطيهم كتاب المقرر لابن قدامة ويقول اشرحي يا فلانة هالنقطه، وتشرحها البنت باسلوبها لكم بحيث يبين لكم انكم تقدرون تفهمون الكتب الشرعية القديمه والاسلوب القديم ما راح يكون صعب عليكم ..
وانصحكم تطلعون حتى لو ما عرفتوا الا شوي يكفيج شرف المحاولة والخمسة اللي خذيتها
في بنات ما مداهم الوقت يشرحون وعطاهم الخمسة، وبنات شرحهم مو شيء وخذوها ..
يقبل بالطبيات :
إي يقبل
اشلون شرحه :
ممتاااااااااااز
مبــــــــــــــــــــــــــــــدع
صج هالدكتور ما راح تندمون إنكم خذيتوا عنده الأصول، وخصوصًا اللي بتتخصص هالتخصص خل تأخذ عنده لأن صج المعلومات غصب طيب يخليها بمخج مستحيييييييل تطلعين من المحاضرة وإنتي مو فاهمه او حافظه الدرس
يشرح من قلب وبطرق إبداعية، والمذكرة مالته ما فيها كلام واجد ( الكتاب المقرر لهالمادة اهو روضة الناظر لابن قدامة، والدكتور مسوي المذكرة على هالكتاب كلها تشجيرات ) الله يعطيه العافية صج هالطريقة تنفع للدراسه، حتى اذكر مقرر تفسير آيات الأحكام لخصته بطريقة د. ياسر التشجيرات وحيل فادتني ؛)
والحلو بعد بالدكتور إنه حييييييل يشجع عالعلم، ويحب الطالبة اللي دايم منتبهه معاه وتشارك معاه حتى لو غلط عااادي أهم شيء تثبتين وجودج عنده، واهو مسوي حركة حلوه، اللي تجاوب معاه بسؤال صعب أو يحتاج تركيز وجهد يعطيها كتاب كهدية اهو مألفه
ونهاية الكورس ب امتحان الفاينل يكرم طالبة تكون اهي اللي دايم تشارك ومميزة عنده يعطيها درع وميدالية ..
ويختار عشر طالبات او اكثر تكون درجاتهم الميديتيرم كاملة ومسوين التكاليف، وحالين سؤال البونص اللي بالميديتيرم ويكرمهم بميدالية
وبعد شغلة حلوه يسويها، اللي اهي العرض السينمائي، بنص الكورس جذي ياخذكم لقاعة المذكور، ويعرض لكم فيلم
اهو مصوره عن رحلته لموريتانيا عند شيوخه، وشلون عيالهم هناك يدرسون ويطلبون العلم، والله حده يشجع الفيلم يخليج غصب يكون عندج طموح عالي
ب اختصار هالدكتور لو اتكلم لباجر ما راح أوفيه حقه، ونعم الدكتور .. يتعب صج بمحاضراته معانا، ويعرضها لنا بطرق ابداعية .. غير كل دكاترة الشريعة بطريقة التدريس، فعلاً شيء شيء
اشلونه من ناحية التصحيح :
يمشي اذا حس انج كاتبة على فهمج لان يحب اللي تفهم مو اللي ترص الكلام المحفوظ
^^ في شغله ب امتحانه سواها فينا، الاختياري تقدرين تختارين اكثر من اجابة اذا اهم صح يعني مو اجابة وحدة
وهذا خربط اغلبية القاعه مع انه قال لنا بالامتحان بس محد سمع لان منشغلين بالحل ؛)
وعطانا بونص ببلاش بدون تكاليف ولا شيء زيادة عالامتحان، قال لنا جم تبون؟
قلنا خمس درجات كافي، جان يقول خلاص خلوها سبع
*وناسه*
تعامله مع الطالبات :
محترم، مرات يفشلج بس على طنازه
يشجع عالعلم *اهم شيء* ..
اشلون درجاته :
تقريبًا الاغلبية A
لانه اهو بمحاضرته يحفظج المقرر، ويوم الامتحان ما يحتاج تشتطين، بس تراجعين عالماشي
والصراحة اللي خذوا اقل من A ما ادري هذيلا وين كان موقعهم من الاعراب!
صج شيء يقهر، الدكتور حده مسهل المادة ما ادري شيبون بعد !
جم ميديتيرم يعطي :
ميديتيرم واحد وفاينل ..
والمحاضرة اللي قبل يوم المديتيرم يسويلكم سمر اصولي، اللي اهو مراجعه لكل الدروس اللي معاكم، ويعرض لكم نموذج مصغر للاختبار واهو تقريبًا نفس الأسئلة بس يزيدلج جم سؤال .. وهم قبل الفاينل يسوي مراجعه لكل المقرر
وهذا الفيديو مسويه الدكتور بس لشعب الشباب، نفسها طريقته للطالبات
تجربة الشيخ الدكتور ياسر النشمي في تدريس أصول الفقه - YouTube
ما شاء الله د. ياسر ولد د. عجيل النشمي وكلهم دكاترة بالشريعه، أهل علم تبارك الرحمن، لا تطوفون مواد الأصول عنده، انا رحت باي فورس نشبت للتوجيه عساس يسجلوني عنده والحمدلله سجلتها
من أمتع المحاضرات حدي استفدت منه .. وإن شاء الله ناطرة اصول 2 و3 و4 عنده بعد ..
اهو يمشي بالترتيب .. يعني الكورس الثاني أو الصيفي بينزل أصول 1 بإذن الله ..
بعدها ينزل أصول 2 الكورس اللي بعده اصول 3 واللي بعده 4 وجذي ؛)
