بشرتي .. و بشور .. و ثالثهما الخيبة !!

حياكم الله خواتي الحبيبات
بداية أهدي موضوعي هذا للأخت العزيزة reemas .. لأجلها أكتب هالموضوع و لأجل كل من تهمه تجربتي مع الدكتور بشور.

في البداية أحب أعطيكم لمحة بسيطة عن بشرتي

باهته، كلها تصبغات، فيها آثار حبوب، مسامها واضحة (لأنه نوعه دهنية) و فوق كل هالمشاكل نحيفة جداً !!

للعلم آنا ما أبخل على بشرتي بأي برامج علاجية أو عناية، لذلك كانت لي تجربة و باع طويل مع علاجات البشرة علشان تشذيه أقدر أميّز تماما شنو حاجة بشرتي من أنواع العلاجات، و شنو العلاجات الأساسية و شنو العلاجات المكملة أو اللي تجي بالمرحلة الأخيرة !

وكانت تجربتي في العلاج مع الدكتورة دلال التركيت .. و للعلم هي أستاذة في علاج (الخطوة خطوة) .. يعني تمشي براااااحة معاج ولا تحب (تنقز) من مرحلة لي مرحلة بس علشان ترضي مريضتها، و هالشي على فكرة وايد مزعج خصوصا للي كان يتعالج عندها من فترة طويلة.

من عيوب الدكتور دلال الثانية غير إنه تمشي شوي شوي بالعلاج، و تعالج علاج من (داخل لي برا)، إنه علاجاتها و أدويتها اللي توصفها في الغالب قديمة ، يعني لما تروحين صيدلية و تعطينهم (الوصفة) يقولون لج والله هالعلاج مو موجود عندها !!! لييييش !!؟؟ يقولج .. الشركة بطلت تنصنع هالعلاج !! طلعوا علاج ثاني !!! ( تخيلوا ) .. و طبعا هاذي صارت معاي أكثر من مرة !!

للأسباب هاذي كلها ... رحت حق الدكتور بشور !!
بصراحة كنت أبي حد يعالج بشرتي علاج جذري .. مع علاجات حديثة .. و يكون حيوي يعني .. ما يجمدني من مرحلة لي مرحلة !!


"يتبع"​

حجزت عنده و بظرف أسبوع رحت له في المركز الألماني، وكانت الزيارة الأولى صدمة .. خلتني أفكر إذا كان خياري صح و إلا غلط !!!!

- طبعاً بالبداية تفاجأت بأنه الموبايل بايده !! يستقبل مكالمة ورا مكالمة .. و كلهم مريضاتهم !! و هات يا سوالف و توصيات على شلون تجون عندي في المركز !! .. بصراحة كان الأمر صدمة لي .. حسيت الحكاية مش صح !!

- بعدها توالت الصدمات .. سألني إنتي من شو تشكي ..خير، قلت له .. بشرتي دكتور، صعقني جوابه لما قال (شو فيها .. ماني شايف فيها شي) .. للعلم هو كان بعيد عني نوعا ما !! .. هنيه (عصبت) :eh_s(14): قلت له حرام عليك دكتور .. كل هالعيوب و تقول مافيها شي !! كل هالتصبغات و الآثار !! .. آنا أبي علاج كيميائي أو ليزر حق علاج المشاكل هذي مع برنامج لنضارة البشرة ... تشان يقولي، لا ما تحتاجي .. إهنيه تشان أحتج عليه ، قالي إنتي محتاجة بس حقنة (بوتكس) على الجبهة، وبين الحاجبين، و كولاجين حتى نتفخ خدودك !!!

وطبعا شرح لي أنواع الحقن لنفخ الخدود !! (كالسيوم ، كولاجين) و عطاني أسعارهم .. المهم أحاول فيه يشوف لي برنامج علاج جذري .. قالي هذا العلاج المناسب لج !! بيني و بينكم أعتبر موافقتي له (غلطة عمري) .. و باقولكم ليش بعد شوي !!

طبعا طلع علي الحساب الكولاجين 4 حقن بـ 400 دينار ( على قولته لمدة سنة و كم شهر ، بس هي في الحقيقة بتظل 4 شهور بالكثير طبعا هذا حسب ادعائه !!!!!! )

حقن البوتكس بـ 120 دينار

جلستين تقريبا ... كلفتني بالاجمالي حدود 600 دينار !!

و للعلم آنا ما خليت .. سالفة العلاج قلت له أبي كريمات .. و تخيلوا ما وافقني على شي إلا لما بديت أجادله و أخليه يشوف بشرتي عن قريب و أقوله شوف هالمنطقة و شوف هالمنطقة !! .. وهو تقييمه كان على أساس (ملمس البشرة و نسيجها الناعم) علشان تشذيه ما كان حكمه صح .. مادري نظرها .. رايح فيها ما يشوف عدل !! :eh_s(10):

مثل ماقلت لكم حنيت على الكريمات و كتب لي كريمات coco حق التفتيح طلع علي بحدود 48 دينار و كريم مرطب بحدود 17 دينار إذا مو ناسية و كريم حماية .. ما ذكر شكثر سعره ! و ما أنسى طلبت منه حبوب و فيتامينات للبشرة !!

- طبعا لما حقني بالجلسة الثانية و عطاني الوصفة .. طلعت عند (الرسبشن) أدفع فسئلتني متى موعدج الثاني !! قلتها مادري نسيت أسأل الدكتور .. فراحت علشان تسئله عن موعدي الياي !!

تتوقعون شنو قال لها !!

قال .. لا مافيه موعد !! خلاص !! بس إذا هي حابه تجي .. كيفها !!! :rgewrg:

هنيه عرفت القصة و مافيها .. المسألة باختصار .. هي علاج سريع و لو كان شكلي .. مدام فيها فلوس وايد !!
ما ادري هل الغلط .. لأني كنت من اللي استفتح معاهم عيادته في المركز الألماني !! و بالتالي يبي يدخل فلوس كثر ما يقدر !!


"يتبع"
​