تفاصيل جولتي على حضانات الكويت

مرحبا خواتي كويتيات
صارلي تقريبا اسبوعين وانا افتر ادور حضانة زينة حق بنتي :ada:
لان خدامتي بتسافر شهر 4 ومضطرة ادخلها حضانة
وانا حاطة ابالي مواصفات وشروط حق الحضانة اللي ابيها :gr4uu:
خل اقول لكم اول المواصفات اللي ابيها وبعدين أقول لكم تفاصيل الجولة

أول شي أبي الحضانة تكون بطريجي
وبعدين ابيها تكون حضانة انجليزيية يعني المدرسات اجانب
وابيهم يعطونها عربي ودين بعد بس ابي الاساس انجليزي
وابي الحضانة تكون حلوة وفيها العاب وايد تونس الطفل وتكون انشطتهم متنوعة وما يقعدون الياهل طول اليوم بصف واحد
وابي الصفوف كبيرة وشرحة وحلوة ومزينة علشان تشد الطفل
امممممم ما ادري بعد شنو بس هذا اللي ابالي الحين

وألحين بقول لكم تفاصيل الجولة اللي سويتها .......

أول حضانة رحت لها أهي حضانة ريبورن بجنوب السرة - الزهراء
الصراحة روعة روعة روعة
فيها كل المواصفات اللي ابيها
بس حسافة ما ياخذون بنتي
اهما ياخذون من عمر سنتين وانا بنتي عمرها سنة و3 شهور
بس وايد عجبتني ابلاتها كل اجانب وشرحة ووسيعة ومريحة وفيها حمام سباحة اينن فيه تدفئة صيف وشتا
وعندهم صالة العاب فيها اجهزة رياضية صغيرة تشوق
وعندهم مكان فيه رمل عشان اليهال يلعبون بالرمل
وعندهم السرداب فيه العاب حق اليهال وفيه سينما ...... والسرداب وايد كبير يونس
وصفوفهم وايد حلوة
يعني باختصار هذي الحضانة اللي ابيها ..... بس انشاالله بالمستقبل

وثاني حضانة رحت لها اهي حضانة البروج ( بمشرف )
والحين اقول لكم عنها ....... تابعوني

حضانة البروج ( مشرف )
هالحضانة كلللللللللللللللللش ما عجبتني
اهي بالشكل زينة وكبيرة
والصالة اللي بالدور الارضي كله العاب
وصفوفهم زينة
وبالسرداب هم في صالة كبييييرة فيها تلفزيون والعاب
بس اللي ما عجبني المدرسات
كل المدرسات مصريات وانا ما احب تدريس المصريات
عندي حق العربي أحسن شي السوريات والاردنيات
وطبعا الانجليزي احسن شي بريطانيات وامريكيات
واهما عندهم مدرسة النجليزي هندية تفشل والله حتى خدامتي أذرب منها
وطبعا حطيت اكس على هالحضانة لانها ما عجبتني

وبعدين رحت الحضانة الانجليزية اللي بالرميثية ....... تابعوني

متابعتج

يعطيج العافيه
انا ودي اروح حضانه ريبورن اشوفها
ودي ادخل ولدي

الحضانه اللي بجنوب السره رفيجتي تمدحهم

الحضانة الانجليزية ( بالرميثية )
هالحضانة وااااااااااااااااااايد حلوة وصج صج اعجبتني
وياخذون عمري بنتي بعد
بس يوم طلعت منها حسيتها كلش مو بطريجي ( أنا ساكنة في بيان والصبح اقط بنتي الكبيرة مدرستها بالنزهه ودوامي بالديرة )
مدرساتها أجانب
أول ما تدخلين يم الادارة في صالة العاب فيها نطاطية وكور والعاب تونس حق اليهال
وبعد داخل الحضانة يم الصفوف في صالة العاب ثانية هم فيها العاب وايد
وعندهم صف الكمبيوتر يونس ما شفت نفسه بحضانة ثانية
وقالت لي اللي ورتني الحضانة ان كل شي يدرسونة اليهال يطبقونة على الكمبيوتر
يعني كل منهجهم عالكمبيوتر
وورتني بعد كتبهم .... وعندهم منهج خاص فيهم ..... كتبهم وايد حلوة .......وطريقتها واهي تشرحلي طريقة التدريس وايد عجبتني
وعندهم طبعا مطعم وغرفة تلفزيون
الصراحة كل شي فيها عجبني بس طريجها ما عجبني

وبعدين رحت حضانة بيبي جاردن (جنوب السرة - الشهداء )........ انشاالله باجر اكمل لان صار فيني النوم
تصبحون على خير

أختي ما عليج امر ابي اسعار الحضانات

ومتابعين البقية @@

ان شاء الله تلقين حضانه زينه لبنتج

حبايبي مشكورين عالمتابعة
أم فهودي حبيبتي دخلي ولدج الحضانة وانت مغمضة
لانها بصراحة أحسن حضانة رحتلها وانا افتريت تقريبا 20 حضانة
وبعدين وانا طالعة من الحضانة شفت ام ياية تاخذ عيالها وسألتها عن الحضانة
قالت لي ان عندها توأم بالحضانة ووااااااايد امدحت الحضانة
وقالت لي لا تعبين روحج وتفترين ترى ما راح تلقين احسن منها
والحين عقب ما افتريت اقتنعت ان كلامها صح

أنصحج بحضانة عالم الطفل بالزهراء كنت مدخلة عيالي فيها وياخذون سن بنتج وايد زينة وحنونين على اليهال وهذا أهم من التدريس خاصة بسن بنتج

متابعه بإهتمام .. بس الأسعار كم و الوجبات منهم ؟

حبيبتي حضانة الي بالرميثيه اي وحده بلي جرووب؟؟ ولا ثنائية اللغه؟؟؟

وبجم رسومهم؟

@@ متابعة @@

اشلوون حضااانه أفنان الي في بيان ما مريتيها ؟؟؟ انتي ساكنه في بيان صح

صح في في بيان حضانة افنان يمدحونها ....... حاليا ولدي بلتل لاند حلوه ومدرساتها اجانب ومنظمه بس مادري لو في احسن راح اغيرها

مشكورين خواتي عالمتابعة والردود :ggdw:

أوشال ....... حبيبتي حضانة ريبورن سعرهم 130 دينار بالشهر وعندهم بعد فتح ملف بس نسيت بجم يمكن 80 دينار
وحضانة البروج والله نسيت جم رسومهم لانها ما عجبتني
والحضانة النجليزية اللي بالرميثية سعرهم 100 دينار بالشهر وهم في عندهم بعد فتح ملف بس نسيت بجم

الحلا كله ........ مشكورة حبيبتي عالدعوة الحلوة ويا رب الله يرزقج باللي اتمنينه

وطنية 2004 ....... حضانة عالم الطفل رحتلها بس مو الحين وقت النادي الصيفي كنت بدخل عيالي الكبار بس ما ارتحت لهم وما عجبتني معاملتهم خصوصا البنية اللي بالاستقبال

رويال ديزاين ..... حبيبتي حطيت السعار ..... وأغلب الحضانات الوجبات تكون منج ما عدا حضانة وحدة اللي اهي حضانة معرفي اللي في بيان يعطون ريوق وغدا منهم

عالم حواء ...... اللي اتكلم عنها مو بلي جروب ..... اسمها الحضانة النجليزية

أم شواقة .......حضانة أفنان رحتلهم بس مو الحين رحتلهم العام حق ولد حماتي ... والصراحة اهي حلوة وشرحة .... بس رفيجتي مدخلة ولدها وكلش ما تمدحها وتقول ابلاتها كلش مو زينين

سارة 999 ...... الصراحة حضانة لتل لاند وايد حلوة رحتلها ووايد اعجبتني وحاطتها في بالي بس فيها عيب واحد ... تابعي جولتي وانا اقوله لج
انت ولدج باي فرع فيهم قطعة 4 والا 9 ؟؟؟؟

حضانة بيبي جاردن ( الشهداء )
تضيق الخلق .... ما فيها ولا شي يونس
والصراحة انا ماشفتها كلها لانها قالت لي ما اقدر ادخلج الصفوف وقت الدراسة وقالت لي تعالي الظهر شوفيها
بس ورتني صالة الالعاب والمطعم
والكتاب يبين من عنوانه
كلش ماعجبتني
سامحوني انا الحضانات اللي ما عجبوني ما حفظت جم رسومهم

وبعدين رحت حضانة بارني بالشهداء ....... تابعوني

حضانة بارني ( الشهداء )
هذي الحضانة أحلى شي فيها اسمها :eh_s(3):
صغييييييييييييييييييييرة حيل
واليهال طول الوقت بصف واحد
وصفوقهم مو كبار وايد
وعندهم صالة العاب نتفة فيها لعبتين بس
وحاكريييييييين اليهال كله بالصف لا العاب ولا حديقة
وانا دشيت صف لقيته متروس يهال .... سألتها جم ياهل بالصف قالت لي 20 بس والله جنهم اكثر
واللي مستغربة منه ان تقول لج ترى فل ما نستقبل الحين ( على شنو ما ادري )
وترى هالحضانة رخيصة جنة 65 دينار بالشهر بس ترى مو متأكدة بس اللي اذكرة اني قلت رخيصة

وبعدين رحت حضانة الخطوة الاولى ( جنة اسمها جذيه او خطوات ما ادري المهم شي فيه خطوة ) بالشهداء ..... تابعوني