اقتراح..حق رمضان ان شاءالله

السلام عليكم ورحمه الله وبركاته
ان شاءالله تكونون بخير خواتي وبصحه وعافيه<----بدال لا اسأل شلونكم وشخباركم ومحد يرد بس مصرف حبر .......لول:eh_s(3):


طبعا تدرون قرب رمضان الله يبلغنا صيامه وقيامه يااااااااااارب
وكثرت معاه المواضيع اللي فيها اسئلة حق الطبخات

ف انا عندي اقتراح متوااااااااااضع (كنت بسويه حق نفسي بس قلت خل اشارك فيه خواتي الحبيبات)

انا عندي فكره اني بسوي منيو بسيط حق الشغلات الخفيفه والفناتق
((غير الهريس والتشريب واللقيمات والكنافه والسمبوسه وهالسوالف المعروفه والتقليديه))

يعني مثلا اذا رايحه تتفطرين عند اهلج او حمولتج او رايحه غبقه
اكيد راح تسوين شغلات يديده غير هالسوالف (للتغيير يعني)...
واللي موووووووو الكل يسويها ...او عالاقل يسويها بطريقه غير


(يااااااااااااا كثر القرقه)

فشرايكم كل وحدة تدخل وتقول لنا 3 شغلات
طبق شوربه
طبق خفايف
طبق حلو


او اذا عندكم اقتراح غيره او تعديل علىىىىىى راحتكم

وانا راح ابدي ....... وان شاءالله توصلكم الفكره

الشوربه

هذي احلى واضضضضضضضبط شوربه مشروم جربتها

(((( شوربه المشرووم الممتازه )))))


المقادير :

- علبه مشروم طبيعي مقطع شرائح .
- بصله كبيره مفرومه مع 2 فص ثوم .
- علبه كريمه حمرا KDD .
- 2 ملعقه كبيره طحين .
- زبده + زيت .
- مكعب ماجي .
- ملح وفلفل حسب الرغبه .

الطريقه :

1. نضع الزبده والزيت على النار ونحمس عليهم البصل المفروم والثوم .

2. لما يشقر نضع عليه المشروم الطازج ونحركه لغايه ما يذبل وما راح يا خذ وقت معاك دقائق .

3. ناخذ نص المقدار ونضعه في البلندر ( الخلاط الكأس ) مع الطحين ومكعب ماجي و2 كوب ماي .

4. نرجع الخليط على المشروم ونحركه ثم نضيف علبه الكريمه الحمرا أو الحليب يوفي إذا ما توفرت الكريمه ونتبلها بالملح والفلفل حس الرغبه .

5. تقدم ساخنه بعد تزينها بقليل من المشروم المقطع شرائح وخطوط من الكريمه


الخفايف

كرات الجبن السريييعه
المقادير:
جبن قلاص
بيض
زعتر
صمون مدور صغير (الشاهين وربعه)

الطريقه
قصي الصمون شوي.....وحشيه جبن.....وغطيه بالبيض وبعدين بالزعتر

واقليه بالزيت


وبالعاااافيه:eh_s(9):



طبق الحلو
هذا سريييييييييييع وخفييييييييييييييف ولذيذ.....

موس الليمون

1 علبه حليب كارنيشن الكبير (يفضل انه يكون بارد)
2 علبه صغيره جيلي ليمون اصفر (او وحدة كبيره)
بشر ليمونه وعصيرها
علبه اناناس مقطع صغار

الطريقه

نذوب الجيلي بالماي الحار....(نقلل شووي كميه الماي..بس عاد مو كلش)

بالخلاط نحط الكارنيشن +بشر الليمونه وعصيرها
وبعدين الجيلي

نزهب بايركس كبير نوعا ما......ونوزع فيه قطع الاناناس ونصب فوقه الخلطه


وبالثلالالالالالالاجه ليما يبرد

وبالعافيه



وان شاءالله اذا عجبكم راح اكمل

وبهالطريقه راح يطلع لنا منيو صغنونو حق 30 يوم او اكثر بعد

شكليطه

وعلييييييييييييييكم السلام

شخبارج حبيبتي

شمسويه

رووووووووووووووووووعه الأقتراح وراح أشارك معاج

الشوربه

شوربة البطاطس أنا وريلي وحمولتي كلنا نحبه
المقادير::

تفوحين من 2 إلي 3 حبات بطاط

1 حبة كوسا

بعدين تخلينهم لين يبردون

بعدين تحمسينهم مع بصل وكرفس

شوي


بعد ما يفوحون

تخلينهم لين يبردون

بعدين تحطينهم في خلاط الطماط

وتخلطينهم

بعدين تحطينهم بجدر وتخلينهم يطبخون مع شوية بهارات وملح وفلفل أسود

تري عجيبه وسهله

الخفايف

أنا بالنسبه لي أحب أي شي فيه جبن وتوست
رولات الفلافل
المقادير

2 كيس توست منزوع الأطراف

بقدونس مفروم ناعما

فلافل مبشورة

الصلصة ::

2 ملعقة طحينه + علبة روب + 2 ملعقة مايونيز + شوية ماء + ليمون + ملح


الطريقة::

تزال أطراف التوست ويرق بالنشابة


تصب نصف كمية الصلصة علي الفلافل

وباقي الصلصة تأخذين ملعقة صغيره وتدهنين في التوست

وتأخذين بملعقة من خلطة الفلافل وتضعينه علي التوست ثم يلف ويغلق الطرف بملعقة صغيره من الصلصة

ونخليه ترتاح

بعدين نقصه بالنص

تصير ثنتين


بعدين تأخذين الطرف

وتغمسينه بشويه من الصلصة وتزينينه بالبقدونس المفروم ناعم
شوفي هذي طريقة
توست بالجبن والبقدونس
المقادير::

توست منزوع الأطراف

1 علبة جبن موزريلا المربع تبشرينه

1 علبة جبن بوك الأزرق الكبير القلاص

1 جزرمبشور
1 فلفل أخضر بارد مقطع ناعم

1 شدة بقدونس مفروم ناعم


تخلط جميع المقادير ما عدا التوست ونترك بصحن جانبي القليل من جبن الموزريلا المبشور ليزين الوجه قبل دخول الفرن


نصف بالبايركس

أول طبقة توست بعدين جزء من الخليط

وبعدين طبقة ثانيه توست


وبعدين الخليط

ونرش باقي الجبن وندخله الفرن لين يذوب الجبن وهذي صورة الطبق


وهذي الطريقة الثانيه

توست بالجبن والبقدونس مع الأضافات نفس الطريقة فوق

بس
مع هالأضافات

أنا أضفت مع المكونات زيتون شرائح


وعلي الويه حطيت جبن سلايس

شوفوا أنا جربته مره بجبن سلايس أصفر واللي لونه برتقالي يعني علي كل حبة توست حطيت لون جبن غير


صار شكله روووووووعه

طبق الحلو

حلو السيجار


المقادير:::


كابريس مستدير ويفر محشي بكريمة الكاكاو والبندق

جوز الهند محموس أو غير محموس مو مشكلة

أو بدل عنه كاكاو فليك


صلصة التوفي::


1 علبة قيمر كي دي دي

شوية نسكافيه

3 فنجان قهوة سكر

ثلثت قالب زبدة

أو طريقة ثانية::

1 علبةكريمة حمراء كي دي دي

قلاص سكر


ثلث قالب زبدة


الطريقة::

تأخذ أصابع البسكويت وتقطع قطعتين أو بتخلينه علي طوله براحتج

ثم تغمس بصلصة التوفي

ثم تزين

بالفليك أو الجوز الهند
صج هذا سريع وحلو

وهذا بعد الحلو اللي بالرابط سهل وسريع

http://q8yat.net/showthread.php?t=14772&highlight=%D3%E6%ED%D3%D1%E6%E1

اهلللللييييييييييين جااااااااارونه

انا الحمدلله تمام.....بخير عساج فيه يالغاليه

والله انج تبردين القلب بمشاركاتج حبيبتي

يسلمووووووووووو وماااااااااقصرتي


وانا بجرب كل اللي كتبتيه (بروفه قبل رمضان*) وارد لج خبر

ولو اني متأكده انهم روعه .....الكتاب باين من صورته



وبانتظار باجي البنات

اااانا بسوي نفس اطباق اطباق جارونة وشكليطة!!!!!,و,,>>>وحدة عجااازة!!

لميس حياج الله حبيبتي

اي والله خوش فكره
جاااااارونه هاذا التوست والبقدونس رمضان اللي طاف يوم وترك اسويه ذكرتيني خوش طبق تسلم ايدج

وهذي مشاركتي الثانيه
ولو اني ما اشوف تشجيع ومشاركه الا من حبيبتي جارونه


الشـــوربة

شوربه الجزر والنخي


المقادير :

- 1 كيلو جزر
- 2 بصل حجمهم وسط .
- 2 مكعب ماجي خضار .
- 8 كوب مائ .
- 1 علبه حمص مسلوق ( من محل النخي والباجله ) .
- ½ كوب كريمه حمرا .
- ½ ملعقه صغيره فلفل أسود وكزبره مطحونه وكاري .
- ملح حسب الرغبه .

الطريقه :

1. نقشر الجزر ونقطعه دوائر كبيره وكذلك البصل نقصصه شرائح .
2. نحط الجزر + البصل + 2 مكعب ماجي خضار + 6 كوب ماي على النار ونغطيه لغايه ما يذبل الجزر ويستوي .
3. نحط الجزر مع كل المقادير الي في الجدر في الخلاط + النخي المسلوق ويخلط لغايه ما يصير بيوريه ناعم .
4. نحط ملعقه زبده في وعاء ونحمس فيه البهارات ( فلفل أسود وكاري وكزبره ) ولما تطلع ريحتهم ( دقيقه ) تصب عليهم المزيج الي خلطناه ونزيد عليه الكريمه الحمرا ثم نضيف 2 كوب الماي على حسب كثافه المزيج الي تحبينه بس في الغالب راح ياخذ 2 كوب إضافي
5. تحرك الشوربه حتى تتمازج وتتجانس وإذا إحتاج الأمر أضيفي الملح حسب رغبتك .

====================

طبق خفيف

هذا الطبق سريع ولذيذ وانا اموت عليه
بس ما ادري شنو اسمه
راح اسميه
طبق البروكلي

بروكلي حوالي 2-3 كوب (مسلوق ومفروم نااااعم)
1 علبه مشروم (يحمر مع زبدة وبصل وفلفل اسود)
1 علبه شوربه كرامبل(اعتقد جذي اسمها)..بنكهة الدجاج او المشروم
جبن شيدر +القليل من الحليب

الطريقه:

بعد سلق وتقطيع البروكلي.....نخلطه مع المشروم ثم مع الشوربه(راح تلاحظون قوام الشوربه ثقييييل...انتوا خففوها بشووويه حليب)
(واذا بغيتي تخلطين شيدر معاهم هم يطلع حلو بعد)

نصب الخلطه بالبايركس ونرش على الوجه الجبن الشيدر


يدخل الفرن حتى يتحمر الوجه


وتمتعوا بالطعم العجيــــــــــــــــــــب
وبالعااااااافيه
================

الحلو

تشيز كيك الفستق

هذا تقريبا نفس مال المطاحن......اذكر اني سويته قبل مددده من نزول كتاب المطاحن
وكان لذيذ وكل من يسأل عن طريقته,,,,,حتى الشياب يحبونه:eh_s(22):


الطبقة ألأولى :

- علبة دايجستيف .
- 1 قالب زبدة .



الطبقة الثانية :

- 1 قيمر نستلة .
- 1 كريمة حمرا .
- 5 حبات كيري .
- 1 علبة نستلة المركز .
- 1 ملعقة طحين .
- 1 كوب فستق مطحون .
- فانيليا .
- ¼ ملعقة صغيرة صبغة خضراء .



الطبقة الثالثة :

- ½ كوب سكر بني .
- 1 ملعقة زبدة .
- 1 قيمر نستلة .




الطريقة :

1. يطحن البسكوت ويفرك مع الزبدة ثم يرص في قاعدة وجوانب قالب التشيز كيك .

2. تخلط مقادير الطبقة الثانية في الخلاط ثم تسكب على الطبقة الأولى وتخبز في فرن متوسط الحرارة لمدة 45 دقيقة .

3. في هذه الأثناء يتم عمل الطبقة الثالثه وذلك بوضع السكر البني + الزبدة في مقلاة على نار ثم يضاف القيمر بالتدريج مع التحريك المستمر ثم تسكب على الطبقة الثانية .

4. يوضع الطبق في الثلاجة وقبل التقديم يزين بالكاكاو المبشور


=====================


ها اكمل والا الموضوع ماله داعي من اصلو

حياج الله سحيله الحلوة

لايوقف لا يوقف كملي والباجي بعد نبي تفاعلكم

يعطيكم العااااااااااافيه حبيباتي:eh_s(15):

وربعن تعاونوا ما ذلوا:eh_s(6):

وراح اييب لكم طرقي ووصفاتي اذا فضيت ان شاءالله

هلا شكليطه الله يعطيج العاااافيه علي الموضوع الحلو

هذي مشاركتي

شوربة الذره بالدجاج.

شوربة الفطر الحقيقي من ماجي >تشخل الشوربه لتزال حبيبات الفطر اللي فيها.

ذره معلب

فطر مقطع معلب.

صدر دجاج مفيوح وتنتفينه.

كوب من ماء الدجاج

زبده +كزبره

2 او3 ملاعق اكل شوربة كويكر

الطريقه تاخذين ماي من الفلتر وتحطينه بالجدر لنص بس لايكون الماي حار يكون فاتر

تذوبين فيه شوربة الفطر الحقيقي وحطيها علي النار لين تغلي وحطي شوربة

الكويكر وخليها تغلي معاها وبعدين راح تحسين استوي الكويكر ضيفي

1 علبة ذره صغيره انا احط الذره العاديه واختي تحط اللي بالكريمه عاد اهنيه

حسب رغبتج بس الاحسن حطي العاديه

وبعدين3 ملاعق مشروم مقطع وضيفي الدجاج وخليه معاه وضيفي الزبده والكزبره

وبالنهايه ايييب بياض بيضه واضيفه لها شوي شوي واحوسه بالقفشه

وبعدين اخليها شوي واسكر النار.(صج قديمه بس لذيذه كل الاهل يحبونها وسنين وانا اسويها.

الطبق الخفيف:

خبز بالفلافل:من كتاب مطاحن الدقيق

12 قطعه خبز المطاحن الدقيق الصغير

12 قطعة فلافل
1طماط شرايح
1خيار شرايح
للتغطيه:
نص كوب بقسماط
1بيضه
ملح وفلفل اسود و
زيت دوار الشمس

صلصة طحينه
2ملعقه هرده 2+2ملعقه روب+ربع فص ثوم

الطريقه:

تغمس كل خبزه بالبض المتبل بالملح والفلفل ثم تغطي بالبقسماط وتحمر في زيت ساخن غزير ثم تقطع نصفين

تخلط المقاديرصلصة الطحينه مع بعضهاجيدا

يحشي كل نصف دائره بقطعة فلافل وقطعتين طماط وخيار ثم يسكب مقدار ملعقة شاي من الصلصه ثم تقدم.

الحلو يايبته من كتاب بس مجربته ولذيذ جدا
التراميسو.

المقادير:
2 باكيت كريم كرمل
3 باكيت دريم ويب
2علبة قشطه
علبة جبن فلافديا صغيره
كوب وربع حليب بارد
7 باكيت اصابع رينجو (انا حطيت اصابع كابريس احلي بوايد وما يذوب مع الكريمه)
نصف باكيت بسكويت الشاي

قليل من الحليب +نسكافيه لتغميس البسكويت

ككاو بودره غير محلي للتزيين.

الطريقه:-

يخلط الحليب البارد+الدريم حتي يغلظ ثم تضاف له الجبنه والقشطه والكريمه كرامل

ثم توضع بالفريزر.

تحضر صينيه متحركه القاعده ونصف بسكويت الشاي في القاع بعد ان نغمسه في الحليب+النسكافيه) بحيث نترك مسافه من الجوانب لوضع بسكويت الاصابع مثل

السور داير مداير الصينيه طبعا الاصابع مانغمسه.

يوضع نصف الخليط السابق علي البسكوت

نضع طبقه اخري من البسكوت فوق الخلطه ويكون مغموس بالحليب ولنسكافيه ثم نضع النصف الاخر من الخليط ثم يوضع بالفريزر لمدة اربع ساعات

يترك خارجا قبل التقديم بربع او ثلث ساعه ثم تفتح الصينيه ويرش بككاو بودره

وملاحظه انا سويتها ثلث طبقات واستعملت بسكوت الشاي بيتي بور مال المطاحن
وبالعافيه.

شكليطه


حياج الله حبيبتي


لميس


مشكوووووووووووووره حبيبتي


سحيله_الحلوه


بالعافييييييييييييييييه عليكم حبيبتي



ام مارية


مشكووووووووووووووووره حبيبتي:eh_s(17):

عدنا إليكم من جديد

شوربة الجزر

المقادير::

نصف معكرونة الحروف أو شوربة الحروف

نصف علبة زبدة113 جرام
نصف كوب بصل مفروم
نصف كوب طحين
2 حبة جزر مبشور

6 كوب ماء
1 مكعب ماجي

ملح

فلفل أسود

الطريقة::

يحمر البصل مع الجزر مع الزبدة في جدر علي النار ويقلب جيدا ويضاف إليه الطحين ويقلب ثم يضاف إليه الطحين والماء والملح والفلفل الأسود

ويترك علي النار قليلا

ثم يتم خلطه بخليط العصير

وثم يوضع بالجدر مره أخري ويضاف إليه المعكرونة وويترك قليلا ثم تقدم


وبالعافييييييييييييييييييييه


=======================

وهذي شوربة الذرة
لذيذة وسريعة

المقادير::

بصل

زيت الذرة

4 أكواب ماء

1 علبة حليب سائل ربع ليتر

2 حبة بطاطس صغيرة

1 جزر ( حسب الرغبة ) أبصراحه حطيت ربع حبة جزر

3 ملاعق كبيرة شوفان

2 ملعقة أكل عدس


1 ملعقة أكل عيش

أولا يتم حمس البصل مع الزيت
ثم يضاف إليه الماء وباقي المقاديرثم

تطبخ جميعا جيدا إلي أن تستوي مع القليل من الملح والفلفل الأسود ثم توضع بخلاط العصير وتخلط جيدا

ثم توضع بجدر ويضاف إليه::

1 علبة ذرة

1 علبة فطر ( مشروم )

1 شدة شبنت

القليل من معكرونة الأسباجتي تكسرينه قطع صغيره

ويضاف إليه الملح والفلفل الأسود والبهارات

مع القليل من الماء

علشان راح تصير ثقيله
وبالعافييييييييييييييييييه


============================

طبق خفيف

توست الشطرنج
المقادير::

علبة جبن قلاص صغير

جبن قشقوان مبشور

جبن موزريلا مبشور


خيار مخلل مقطع صغير

ملعقتين زيتون شرائح

ملعقتين زعتر الأوريغانو
بقدونس


2 ملعقة مايونيز

توست نوعين الأسمر والأبيض

للزينه::

فلفل أخضر بارد


الطريقةنقوم بخلط جميع المقادير مع بعض


نقوم بتقطيع التوست مثلثات كبيره

ونقوم بوضع حبة توست أبيض وبجواره اسمر وهكذا ثم نقوم بوضع الحشوة

ثم نكرر إلي أن ننتهي بالتوست

ونزينه وندخله الفرن

وبالعافيييييييييييييييييييييييه

================================


الحلو

كيك سويسرول بالفرواله الميني والعادي يمكن استبدالهم بالكيك السويسرول الكاكاو علي ذوقكم


يقطع


ويغمس في صلصة التوفي

طريقة التوفي

1 قلاص سكر

1 علبة كريمه حمراء كي دي دي
ثلث زبده

يقلب علي النار


ثم يزين بقليلا بالفستق المطحون أو جوز عين الجمل المطحون أو جوز الهند





النوع الثاني

حلو التمر بالبسكويت


تمر منزوع النواة يعجن مع 4 حبات بسكويت بتي بور مطحون جيدا ثم نقوم بعمله كور دائريه

ونضع فيه عود أسنان خشب


ثم نأتي بماعون ونطحن 4 حبات بسكويت بتي بور ونضعه فيه

ثم نضع الكرات بعيده عن بعضه البعض


ثم نأتي بخلاط الطماطم ونضع فيه 6 حبات من جبن الكيري

مع 1 علبة حليب نستله المحلي الكبيره الفانيلا

ثم نغطي الكرات بالخليط


ثم نأتي بشراب الشوكلاته

ونقوم بعمل خطوط عليه

ثم نضعه بالثلاجه


وبالعافيه




أتمني باقي البنات الحلوين يشاركون

والله يعطيكم العافيه جميعا

يعطيج العافية ام مارية
‏
جارونةحبيبتي ماقصرتي
يعطيج الف الف عافية

وووووووااااااااااااااااااااي يالقهر


كنت كاتبه رد شطوووووووووووووووووووووله

وينه؟؟؟

الظاهر كنت دايخه وانا اكتب


اللي كنت بقوله........يا جااااااارونه امس جربت طريقه توست البقدونس

بصراحه مو حلو
















لانه يهـــــــــــــــــــبــــــــــــــــــــــــــــــــل
:eh_s(6): :eh_s(3):


ويخبل على قولتهم

سويت منه صينيتين وحدة حق بيتنا والثانيه حق بيت يدي.....

الكل عجبهم واستانسوا عليه

حتى يدي استانس عليه وقال هذا شغل عدل كل مره سويه

بس انا عندي ملاحظه صغيرونه.....

انا فظل عندي جم حبه توست......مايكفي اسويهم طبقات
قمت ودهنت كل وحدة بالخلطه....وحمرتهم......بصراحه طلعوا روووووووووعه
شكلهم بس يشوق

حسافه لو تشتغل وصلتي جان راويتكم التطبيقات


ونطروني بالجديد

خوش فكره الله يعطيج العافية
ما شاء الله عليكم بنات عيني عليكم باردة ان شاء الله راح استفيد منكم وايد لاني ما أعرف أسوي شوربات غير شوربة العدس أما الاطباق ما ابدع اعرف اسوي الاطباق الرئيسية بس ما احب اقره الموضوع من غير ما أرد وهذي طبخة خفيفة من كتاب المطاحن يحبونها خواتي
المقادير
بسكوت بيتي بور
كريم كراميل
قيمر
حليب سائل
حليب نستلة
ملا حظة المقادير حسب البايركس ( مثلا حطيتي 5 قيمر تحطين 4 بودرة كريم كراميل + 3 حليب محلى صغير )

الطريقة :
نسخن الحليب ثم ناخذ البسكوت ونرصة في البايركس ونحط الحليب ليتشرب البسكوت ( عشان يصير لين )

نخلط الحليب النستلة مع القيمر وبودرة الكريم كراميل لغاية ما يصير لونه أصفر ونصبه على البسكوت ثم نحط بسكوت على الخليط ( عمل طبقة ثانية وهكذا )
نحطة بالثلاجة لين يبرد ولتزيينه نحط شعرية باكستانية محموسة ونرش عليها شوية من صلصة الكاوكاو
وبالعافية

أما طبق مالح خفيف وسريع ( عجينة تنفع لجميع أنواع المحاشي )
المقادير :كيس طحين المطاحن ( الأبيض )
3 ملاعق كبيرة سكر
3 ملاعق كبيرة حليب بودرة
رشة ملح
1 ملعقة خميرة فورية
زيت

الطريقة :
نخلط الطحين والسكر والملح والحليب
( أخذ الخميرة ونقها مع ملعقة سكر صغيرة وكوب ماء دافئ ) وخلطها مع الطحين ثم نضع الماء حسب العجينة
( ملحوظة لا تحطين ماي وايد الا اللي يكفي العجينة )
ثم آخر شي تاخذين الزيت وتخلطين لكي تتماسك العجينة وتتركينها تتخمر

أما عن الحشوة على حسب رغبتج يمكن تحشينها جبن كيري و ترصينا بجانب بعض وتصبح مثل الخليه أو ممكن تسوينها بيتزا
اذا كانت بيتزا فهذي مقاديري
فص وم
بصلة صغيرة
طماط
معجون طماط
زيت
أوريغانو ( تلاقينه بمركز سلطان )
شوية ملح +شوية فلفل أسود
كاتشب ( حسب الرغبة )
كوب ماء
فلفل أخضر
جبن موزاريلا
فطر
زيتون

تحمسين البصل والثوم وتحطين معاهم الطماط والماءو اللاوريغانو لين يذبل الطماط ثم تحطينهم بالخلاط
بعد ما تخلطينه تضيفين المعجون الطماط عشان تكون الصلصة ثقيلة والكاتشب الملح والفلفل والفطر

تقسمين العحينة الى نصفين وتحطينها بطبق دائري وتحطين الصلصة ثم تزينينها بالفلفل الاخضر والزيتون والجبن الموزيريلا وتحطينها بالفرن ما تاخذ 10 دقايق
آسفة على الطوالة وان شاء الله يكون واضح الشرح

موضوع حلوووو


شوربه الشوفان :

مكعبات دجاج
بصل مفروم
فص ثووم
بهارات
كوب شوفان
معجون طماط

اول شي نحمس البصل على نار خفيفه ثم اتحطين مكعبات الدجاج مع فص الثووم و البهارات و نحرررك
ثم اتحطين الشوفان ..و تحطين كميه ماي مناسبه
بعدين حطي المعجون و خليها تطبخ على نار هاديه


صينيه البطاط باللحم المفرووم

اول شي اتفوحين بطاط و اتقصينه دوائر ..الدوائر هاذي اتغطسينها في صلصه مكونه من ( بصله مفروومه +بقدونس + بهارات +فلفل بارد مكعبات ) و اتصفينهم في البايركس ...بعدين اتحطين لحم مفروووم ..بس اتشوحينه شوي على النار مع فلفل اسود و ملح شويه
و اتحطين طبقه لحم مفرووم ...
بعدين اتحطين طبقه ثانيه من دوائر البطاط

الحين جيبي 5 بيضات و اخفقيهم مع فنجان كريمه و الباقي من خليط البصل و البقدونس و صبيهم على الوجه

ذخلي الصينيه للفرن و رشي عليها شوي موزاريللا

طعم رهيييييييييييب


الخفايف : سمبوسه +كبه برغل + كباب خضرة


الحلو :

مهلبيه بالفستق + جلي احلام ورديه ( جلي فراوله اتسوينه بطريقه عاديه بس اتزودين عليه قوطي قيمر ) + كراملا

اختي @Miss Dio@
حياج الله حبيبتي وناطرين مشاركتج انتي بعد

اختي الحبيبه سبائك......:eh_s(15): نااااااطرينج مع مشاركاتج الروعه

اختي صمت الهدوء
حياج الله حبيبتي والله يعافيج على هالمشاركه الطيبه

وان شاءالله تستفيدين من هالموضوع مثل ما استفدنا....

وبجرب العجينه باقرب وقت ان شاءالله

يسلموووووووو

========


اختي الحبيبه ذات الاسم العجيب :eh_s(1): seule12
تسلمين على المشاركه الطيبه.....

وطريقه البطاط حلوة ....خوش فكره خشت نافوخي :eh_s(20):


حياج الله

وهذي مشاركه يديده بعد هالتفاعل الحلو:eh_s(17): :eh_s(17):


الشوربه

هذي طريقه شوربه سهههله وسريييييييعه وطعمها غريب:eh_s(3):

حضري اي شوربه مشروم تحبينها (حتى لو الجاهز كنور وربعه)
وخليها شوي تبرد.....وحطيها بالخلاط مع شويه ريحان او حبق

وشوفي الطعم


اقصد ذوقي الطعم

========================
طبق خفيف

هذا الطبق جربته 3 مرات.....خلال هالاسبوع

الله يجزاها خير صاحبه الطبق....بصراحه روووووعه

واذا تسمحون راح احط صور الموضوع الاصلي على ما اضبط جهازي واراويكم تطبيقي

بس صج لالالالالالايطوفكم

بيتزا رول

مقاديرالعجينة :
2 كأس دقيق
3 كأس ماء
4 ملاعق كبيرة حليب بودرة
2 بيضة
ملح


طريقة تحضيرالعجينة :
ـ نخلط المقاديرالسابقة مع بعض جيدا" ونتركها نصف ساعة لترتاح.
ـ نسخن مقلاة صغيرة على النار ونمسحها بقليل من الزبدة .
ـ نسكب مقدار ثلاث ملاعق كبيرة من العجينة على المقلاة الساخنة ونوزعها بالتساوى على قاع المقلاة.
ـ نترك العجين يتحمرقليلا" على نار هادئة ثم نقلبه على الوجه الاّخر .
ـ نكمل خبزبقية العجين بالطريقة نفسها.

مقادير الحشوة:
كيلو سلامي
صلصة البيتزا المفضلة لديك
بصل مقطع جوانح
فلفل أخضر بارد
مشروم
زيتون
جبن مزوريلا مبشور

طريقة لف الرولات :
ـ نضع ملعقة صغيرة من صلصة البيتزاعلى طرف العجينة ..
ـ نضع باقي مكونات الحشوة فوق الصلصة..
ـ نطوي الجانبين الى الوسط ..

ـ ثم نلفها بشكل أسطواني ..
ـ نغط رولات البيتزا بالبيض ثم بالبقسماط ثم نقليها بالزيت..

وهذي الصور




وهذا شكلها قبل القلي



==================

طبق الحلو

اسمه حلو الموز بالكراميل...بس قبل لا اكتبه بقول لكم شي

انا جربته وطلع يهههههههههبل

بس شنو على ايام ماكان فيه دريم ويب الموز
لكن الحين للاسف انقطع
فانتوا جربوه على كاكاو وفراوله


المقادير :

الطبقة الاولى
شرايح كيك جاهز انا استخدم كيك سارالي الابيض
يرص في قالب زجاجي (بايركس)

الطبقة الثانية
1 علبة حليب موز (1/4 لتر) + 2 ظرف دريم ويب
تخلط بخلاط الكيك لما تصير مثل الكريمة
يضاف لها 2 قشطة + 1/4 ك سكر + 1 ظرف جيلاتين مذوب ب1/4 ك ماء حار
تخلط المقادير جيدا ثم تصب على الكيك ثم توضع بالثلاجة حتى تتماسك وتبرد

الطبقة الثالثة
تقطع 3-4 حبات موز الى شرايح وتصف بطريقة مرتبة على الكريمة ثم تعملي توفي بالطريقة المعتادة وهي 1/2 قالب زبدة +1/2 ك سكر يحمر على النار ثم يضاف له علبة قشطة
بعد ان يبرد التوفي ناخذ منه بالملعقة وتعملين خطوط على الموز ثم يقدم بارد

الشوربه



هذي الشوربه امس جربتها (بروفه قبل لا احطها لكم):eh_s(15):
ومع اني ماااا احب القرع.......بس يوم سويتها طلعت تهبل ماشاءالله
ولونها يشووووووووووووووووق

بالضبط بالضبط نفس هاللون
:eh_s(8): :eh_s(9):


((((((((( شوربه القرع بالكاري ))))))))))


المقادير :

- 2 ملعقه كبيره زبده .
- 1 كوب بصل مفروم .
- 2 فص ثوم .
- 1.5 ملعقه صغيره كاري .
- ملح وفلفل أسود .
- 3 كوب مرق دجاج .
- كوبين من القرع المقطع .
- علبه حليب كرنيشن .

الطريقه :

1. نذوب الزبده في وعاء وبعدين نضيف عليه البصل والثوم ونحركه لغايه ما يذبل بعدين نضيف عليه الكاري والملح والفلفل ونحمسهم لمده دقيقه .

2. نضيف القرع ومرقه الجداج ونقصر عليه النار ونخليه يغلي لين ينضا القرع .

3. نحط الشوربه في البلندر ( الخلاط ) ونخليها تصير ناعمه وكريميه .

4. نرجعا إلى الجدر ونضيف لها الحليب الكرنيشن ونغليها تغلي عدل .

5. نقدمها بعد تزينها بالتوست المحمص والبقدونس المفروم .



لذيذة من قلب:eh_s(3):
==============================
طبق خفيف


هالمره بحط لكم طبق سلطه......لكن لذيذة وماااااتشبعين منها

((((((((((( سلطه الطبقات السبعه ))))))))))



المقادير :

- خس أريكي منوع مقطع .
- 1 كوب كرفس مقطع صغار .
- فلفله خضرا مقطعه صغار .
- 1/2 شده بصل مقطع صغار .
- شرائح مارتديلا .
- بازاليا خضرا مجمده ومسلوقه .
- جبن كرافت الأزرق الشيدر .

الصلصه :
مايونيز + ماسترد + زيت زيتون + ليمون + ملح وفلفل

الطريقه :

1. نحضر طبق سلطه زجاجي شفاف لتقديم السلطه .

2. نحط الطبقات التاليه بالترتيب :

- الطبقه الأولى : الخس الأمريكي .
- الطبقه الثانيه : الكرفس .
- الطبقه الثالثه : الفلفل الأخضر .
- الطبقه الرابعه : البصل الأخضر .
- الطبقه الخامسه : المرتديلا ( نقصصها شرائح طوليه ونقليها بزين ونشفها على محارم )
- الطبقه السادسه : البزاليا الخضرا المسلوقه .
- الحين بعد الطبقه السادسه نخلط الصلصه جيدا ونصبها على مكونات السلطه .
- الطبقه السابعه : جبن الكرافت نبشره على الوجه ( تقريبا 1/2 القالب الصغير ) .

ونبردها ومن ثم نقدمها ...
:eh_s(15): :eh_s(9): :eh_s(15): :eh_s(9):
================================
طبق الحلو

حلو الشعرية الباااااااااااااارد للغبقةالرمضانية

المقادير :

الطبقة الاولى : كيك جاهز (سارالي) ابيض مقطع شرايح ويصف بالبايركس

الطبقة الثانية : 6 حبات جبن كيري - 1/4 اصبع زبدة - 1 قشطة - 3/4 ك سكر
تخلط جميع المقادير بالخلاط وتصب على الكيك ثم تبرد

الطبقة الاخيرة : تحمس شعرية باكستانية بشوية زبدة وترش على الكريمة ثم يقطع مربعات صغيرة ويقدم مع القهوة

عجــيــــــب هالطبق...سريع وخفيف

وايد سويته برمضان اللي طاف....خصوصا اذا كنت مشغوله وماعندي وقت

وفعلا كان طعمه لذيذ...وبااااارد
==================