أحلى همبه كويتية
**مشرفة قسم مائدتك**
تفضلواااااااااااااااااا
المقادير حسب عدد الأشخاص انتي تقدرينها
2 دجاج ساديا ( 800 غرام )
بصلة مفرومة او جوانح
2 لومي اسود عدل
كركم
بهارات دجاج
3 فصوص ثوم عدلة
من كل نوع شوية :
مسمار (قرنفل )
دارسين اعواد
فلفل اسود حب
شوية حبة حلوة
كمون حب
هيل حب
زيت
ملعقة كبيرة من خليط (الثوم والزنجبيل المطحون ) جاهز من الجمعية
ماء كافي للسلق
ملح
- تنظفين الدجاج تنقعينه بماء وملح وقفشة طحين عن الزفر لمدة نصف ساعة
- تغسلينه عدل من الطحين وفركيه عدل بملح خشن وعصير ليمون واتركيه 5-10 دقايق بعدين اشطفيه بالماء
- ضعي الدجاج بجدر والماي يغطيه واتركيه يغلي غلوتين لما تطلع الرغوة وهذا المهم والمقصود
- اغسلي الدجاج من ماء السلق واتركيه على جنب لما نحضر ماء السلق الأساسي اللي بنطبخ فيه
- ضعي في جدر البصل واحمسيه لم يصير لونه بني فاتح ثم اضيفي زيت والبهارات العدلة كلها ( الدارسين - القرنفل -الكمون - حبة حلوة - هيل و ...... )
- اضيفي ملعقة كبيرة من خليط الثوم والزنحبيل وكركم وحمسيهم مع البصل والبهار لما تشمين الريحة اللي تهبل واخر شي نضيف بهار الدجاج والملح
- ضعي الدجاج عليهم وصبي عليه ماء يغطيه وكافي حتى يستوي عدل ( اتركيه تقريبا نصف ساعة ) لما يستوي 3/4 استواء لأن بعدين بنحمره بالفرن .
- بعد ما يستوي اخرجي الدجاج بصحن واحتفظي بماء الدجاج لعمل الرز
صوص تحمير الدجاج :
معجون طماط
كركم
شوية زيت
ملعقة صغيرة بهار تندوري (الأحمر )
زعفران او صبغة زعفران (نتفة) يمكن الأستغناء عنها في حال وضعنا التندوري الأحمر
شوية ملح
دراسين ناعم
شوية من خلطة الزنجبيل والثوم ( حسب الرغبة )
فلفل احمر ناعم حار ( حسب الرغبة ) انا ما حطيت عشان اليهال
هذه صورتها وفيه منها بالجمعية وكارفور وسيتي سنتر وجلف مارت انواع بالثوم بس - ثوم وزنجبيل .................... طبي وتخيري
خلطيهم بماعون ودهني فيهم الدجاج عدل وحمريهم بالفرن من فوق وتحت
درجة التحمير انتي تحددينها
انا حمرته زيادة لأن اسرتي الصغيرة تبيه مقرمش نوعا ما
طريقة العيش :
2 جيلة عيش ( رز التموين الجديد نثري وحبته طويلة ايهبل )
ربع كوب ماء ورد + زعفران + شوية هيل ناعم + نتفة من صبغة الزعفران
ماء سلق الدجاج
شوية زيت
الطريقة :
- غسلي العيش عدل ونقعية بماء لمدة ربع ساعة
- ضعي العيش بعد ما تشخلينه من الماي بجدر واخذي ماء الدجاج مع بعض البهارات العدلة الموجودة فيه وصبيه عليه بشرط ما يرتفع عن العيش اكثر من 1 سم كافي عشان ما يصير لين ( ولا تنسين تزيدين الزيت عشان يصير العيش احلى ونثري )
- واتركيه على نار عاليه نوعا ما لما ينشف شوي ويقل الماي .
- ضعي الحديدة تحت الجدر وقصري النار ورشيه ( بماء الورد المنقوع بالزعفران ونتفة من صبغة الزعفران وهيل ناعم ) واتركيه لما ينشف عدل .
واحلى شي الحااااااااااااااااااكوكة
الحشو : فكرة اللوبا مقتبسة من اختنا بطة فيها نطة والباقي طريقتي
المقادير :
ربع كوب لوبا مغسولة ومسلوق ( الكمية بكيفك )
بصل مفروم
جزر مبشور
لومي ناعم
ملعقة صغيرة بهارات مشكلة
ملعقة صغيرة كركم
ملعقة صغير بهار حشو ( انا شاريته من السعودية )
ملح
زيت
- تحمسين البصل بمقلاه على النار مع ضرورة رش الماء كل شوي لما يصير لونه بني
- اضيفي الجرز المبشور واحمسيه معاه لما يذبل شوي ثم اضيفي اللوبا المسلوقة
- اضيفي قليل من الزيت والملح والبهارات واللومي الناعم والكركم وخلطيهم عدل واتركيهم على نار هاديه وقلييهم بين الحين والأخر . ( ربع ساعة كافي )
وبداأ الهجووووووووووووووم
ولا تنسين الدقوس والفلفل والأجار وكل اللي يحبه قلبك
علينا بالعافية يارب
وهذا صحن البنوتة
وان شاء الله يعجبكم طبااااااااااااااااااااخي :sfg:
واشكر اختي "ونس " على الفواصل اللي سوتهم لي هدية
التعديل الأخير:
