سلام عليكم شلونكم شخباركم عساكم بخير.. عسى تعلمتوا شي ونصايح امكم العوده نفعت مع مخوخكم المقفله ؟؟ والله ماضنتي تسنعتوا ادري فيكم مخوخكم على قولة القايل .. مثل البيضه من يحوشها الحر تمرك
ماعلي منكم انا بقول اللي بخاطري وذنبكم على جنبكم فهمتوا فهمتوا وان مافهمتوا بالشسمونه.. مثل ما تعرفون ان اليريش نوعين في يريش لقيمي وهذا اليريش اللي مديم تاكلونه وتزرطون منه وفي يريش منهنه وهذا ادري وايد منكم ماسمع فيه ولا شافه واليوم بعلمكم طريقتة .. اليريش المنهنه يسونه على لحم او دياي وطريقته بالضبط نفس المجبوس وهو بالاساس مجبوس بس على يريش بدال العيش وافتكر شرحت من قبل طريقة المجبوس وراح اقولها اليوم باختصار
بسم الله بدينا وعلى النبي صلينا .. طبعا اليوم بنسوي المنهنه على دياي يعني تيبين ديايه وتغسلينها زين وماله داعي كل مره اقولكم عن الغسيل .. وتخلينها على كتر وتيبين جدر وتحطين فيه ماي ومن يبدي يفوح حطي 4 عواد دارسين خشن و شويه فلفل اسود خش ومثلهم دارسين وهيل .. وشوية كمون بقفشة الحوس مالت الشكر وشوية كزبر ناعم ومن يفوح الماي قصي بصله سويها اربع وحطيها بالجدر وعقبها حطي الديايه وخليها تفوح وعقب نص ساعه حطي الملح وعيار الملح على هواكم بس لانسون ان اليريش راح ياخذ من الملح ..وعقب ساعه الا ربع شيلي الديايه ورشي عليها دارسين وهيل مطحون وقليها .. الحين نشخل الماي من البهار ونحط الجدر ونكت فيه شوية ماي الفوح وبعدين نحط اليريش ونخلي الماي يغطي اليريش يعني نفس العيش مو تزيدون ترى يصير مريس .. ومن يبدي يتقاصر الماي وماتشوفينه حطي حديده تحت الجدر وقصري على النار وبعدين حطي الديايه فوق اليريش وحطي الحشو طبعا .. والحشو تعرفون طريقته قلته من قبل .. واخر شي رشي الزعفران المنقع بماي الورد فوق الديايه وسكري الجدر وخليه يتسكر لمدة ربع ساعه وعليكم بالف عافيه يارب .. ولا تنسون اليريش لازم يكون مغسول قبلها فتره ومنقع بالماي....
لاتنسين الدقوس والاجار وادوات الخيسه طبعا واللبن .. عشان من ياكل ريلج ويرثع بهل لبن عقبها راح ينفش اليريش ابطنه ويخدر .. عاد هني تحوشه الثواله ولعبي لعبتج يابنيه .. لاتنسين يايكم العيد يعني قوليله ابي ذهب وابي هدوم حق اليهال فمن ثوالته راح يقولج اخذي اللي تبينه بس فكيني ابي ارتاح
وان امهاتكم او يداتكم قالوا بييه من وين مطلعه هل اكله قوليلها عن العياره اذا تعرفينها قومي سويها ادري بتقولج كنا قبل نسويها وتهذر على راسج .. عطيها ايميلي وانا اعلمها
شنو شعارنا ياحلوين؟؟؟
كونوا معنا في حملتنا ضد الرجال ومحاربتهم من خلال كروشهم ... والهوايه حمايه
امكم العوده دندره
![][^lorans^][](/data/avatars/m/9/9350.jpg?1621060227){kind=avatar}
