قوه بنياتي الحلوين شلونكم وشخباركم .. اي يابنيات اليوم بنسوي خثره والخثره عباره عن مرقة سمج وعيش ..خثر الله دم العدو ويبسه.. عاد الكويتين الاوليين يحبون هل اكله وخصوصا الشياب والعيايز لانها تنزرط زراط .. يالله بس عن القرقه وخلوني ابتدي ..
بسم الله بدينا وعلى النبي صلينا .. اول شي نجهز جيلتين عيش ونغسلهم زين ونقعهم ونخليهم على كتر .. وبعدين نبدي بالمرقه .. انيب زبيديه ونغسلها زين ونفركها بكركم ونخليها على كتر .. طبعا انتوا تعرفون طريقة المرقه وانا الحين بقولها بشكل سريع .. شدتين كزبر ومثلهم شبنت و3 بصلات و4 طماطات ..4 فصوص ثوم.. والبهار عباره عن .. ملح .. فلفل اسود .. لومي اسود سحاري .. كمون.. كركم..والحين نبتدي
اول شي نحمس الطماط مع نتيفة دهن وقفشه صغيره مالت الشكر ملح وننطر لما يذوب وبعدين نحط البصل ونحمسه وبعدين نحط البهار والبهار قياسه قفشة الحوس مالت الشكر ماعدا اللومي السحاري قفشتين او اكثر على حسب ذوقكم .. وبعدين نحط الخضره ونحمسها مع الحميس لمدة عشر دقايق .. واخر شي نحط الثوم وبعدين الزبيديه .. والزبيديه في ناس يفضلونها مقطعه وفي ناس يبون على عدالها وفي ناس يقلونها نص قليه وفي ناس يحطونها على من غير قلي يعني على هواكم ..وتخلون الماي يغطي السمجه وعقب نص ساعه شوفي الماي اذا نازل عن السمجه عادليه انزين؟؟ مو تخلينه يزيد ولا ينقص والحين نبدي نكت العيش .. اي هني الحجي العيش تيودينه بايديج يعني تخمطين خمطه وتكسرين العيش فوق المرقه وشوي شوي لما تخلصين الجيلتين .. اي وقبلها ذوقي المرقه وشوفي ملحها شلون صار اذا ناقص زيدي الملح لان العيش راح يغير طعم الملح .. عقبها حركي الخلطه بالملاس شوي شوي ومن ينزل مستوى الماي حركي شوي شوي وديريبالج لايتلزق العيش حدر ويحترق .. وخلي الخثره تصير مهموجه يعني مثل المريس لاهي اللي فيها ماي وايد ولا اهي الناشفه وبعدين قصري على النار وحطي الجدر فوق الحديده ونطري ربع ساعه وعليكم بالعافيه
طبعا تقدرين تحطين لومي سحاري عدل مع المرقه وتقدرين تحطين فلفل خضر .. و وقت النجاب تيبين قنجه وتنجبني فيها الخثره ولازم تحطين فوقها دهن عداني تمسحينه مساح وكثري منه عشان ريلج ينقث ويمكن يوقف قلبه ومايحن عليج عقبها
نصايح امكم العوده
اذا ريلج كل شوي يدش المطبخ ويلزق لزقة عنزروت ويقول يالله بسرعه وين الاكل حاولي تدمرين هدومه وانتي تحركين الملاس ولا مسكي الثوم وقوليله الله خدك اليوم ناعم ولا شواربك شزينهم وحطي ايدج على شواربه
طبعا ماننسى ادوات الخيسه وتوابعها وخصوصا الفجل الاحمر ترى عليه ريحه تيب القامت وتخلي ريلج يفح بويوه الناس بالصلاة ويزفونه ....
ومثل ماقلنا اللي امها اتعنفق ولا مو عاجبها بس خل تقولي وانا اعلمها
وشنو شعارنا يابنات؟؟
كونوا معنا في حملتنا ضد الرجال ومحاربتهم من خلال كروشهم .. والهوايه حمايه
امكم العوده دندره
