اليوم يومك يازفر ..اي الله يرحمك يادندرمه يانظر عيني كنت دايم تطلب المحمر وخصوصا اذا كان مع مرقة خباط مالح ادري ماتحبون الخباط مالت عليكم شعرفكم بالاكل الزين.. ياحلاته ابوكم دندرمه اول كان يصيد الخباط بنفسه ومن يرجع البيت يصرخ علي ويقول يادندونه ترى صدت خباط يالله زهبي الملح الخشن والمسكين يقعد يبذح بهل خباطه ويملحها ومن يخلص يشرها فوق السطح وعقبها بجم يوم ناكلها.. اييي ايام راحت وخليتني بهل دنيا وحيده مالي لا ونيس ولا حنيس.. ماقول الا الحمدلله على كل حال .. ماعلينا يابناتي اليوم طبختنا محمر مع مرقة شعوم .. طبعا السمجه اختيارها يكون على كيفكم تبون بالول ولا زبيدي ولا اي شي ثاني على هواكم .. سلمكم الله وحفظكم المحمر نوعين نوع على دبس وهذا اول نسويه والنوع الثاني يصير على شكر عادي .. الدبس نخليه على كتر لان مافي احد يستخدمه هل ايام .. وبنسوي محمرنا على شكر وهم الشكر له طريقتين الاولى تحرقين الشكر بالجدر يعني تحطين الشكر بالجدر وتحركينه لما يقلب لونه احمر وبعدين تكتين العيش عليه ويمكن صعبه عليكم فبعطيكم الطريقه السهله .. ويالله نبدي
بسم الله بدينا وعلى النبدي صلينا .. طبعا ماراح اقول طريقة المرق لان قلناها من قبل واهم شي تكون خاثره ... وطريقة المحمر سلمكم الله نحتاج جيلتين عيش مغسول وطريقته مثل طريقة المشخول بالضبط بس بدال لانحط ملح نحط شكر .. يعني نحط ماي في الجدر وننطر لما يبدي يفوح نحط قلاص شكر بالماي ونخليه يذوب وبعدها نحط العيش ونخليه يقلب على نار هاديه طبعا وبعدها لما يبدي ينضي نشخله بالمشخال .. لكن هني نبدي نحط شكر اكثر شلون؟؟ انا اقولكم شلون
تحاولين تزلين الماي من العيش كله وبعدين ومن تصير طبقه من العيش بالمشخال حطي قفشة شكر نثريها فوقه وبعدها حطي طبقه ثانيه ونفس الشي لما تخلصين .. بعدين بنفس الجدر حطي نتيفة دهن وكتي العيش بالجدر وفوقه حطي زعفران منقع بماي الورد ونطري عليه لما يتسكر وعليكم بالعافيه
هذي طرقه مختصره عن المحمر وترى سهله ومافيها صعوبه .. والشكر تقدرون تزيدونه على كيفكم واذا حطيتوا العيش ذوقي شوي منه وشوفي قياس الشكر فيه اذا قاصر هني تعالجينه مع الزعفران يعني تحطين بماي الزعفران شكر وتذوبينه وترشينه على العيش وانا افضل دايم تحطين شكر مع ماي الزعفران
ومثل ماقلتلكم اللي يدتها او امها اتحلطم دزولي على ايميلي
نصيحة امكم العوده ... لما تشخلين العيش طبعا المشخال راح يكون دبق عاد انتي مسحي ايدج بالدبق وحطيها على ويهج ترى الدبق زين حق البشره ..ويساعد على ازالة الزيوان من الخشم
لاتنسين تحطين ادوات الخيسه واللبن خصوصا اللبن مع السمج لان يقولون يسوي بهق وخلي ريلج يرثع منه لما ويهه يصير جنه قطو عواير مبرقع
ولا تنسون شعارنا
كونوا معنا في حملتنا ضد الرجال ومحاربتهم من خلال كروشهم .. والهوايه حمايه
امكم العوده دندره
