السلام عليكم يابنياتي .. شلونكم وشخباركم؟؟ عساكم بعافيه ؟؟ وشلونكم مع الطباخ؟؟ عسى ماشيين زين ومبيضين ويهي؟؟ طل
مافتكر يطلع منكم شي زين يابنات هل وقت .. ادري تسمعون كلامي من هل اذن وتطلع من الاذن الثانيه .. مقيوله بنات المدارس مثل عش الخنافس
ماعلينا اليوم بنطبخ المموش .. وتراه سهل وبسيط ويصلح حق البرد ويترس البطن .. يالله خلونا نبدي .. بسم الله بدينا وعلى النبي صلينا .. نحتاج حق المموش يابنياتي .. جيلتين عيش وجيله ماش .. ونحتاج طماطه حجمها زين .. و3 بصلات ولميات و3 فصوص ثوم .. كيلو ربيان .. والبهار .. فلفل اسود .. لومي سحاري ناعم .. كمون .. كركم .. وبهار مخلوط وملح طبعا .. اول شي نغسل الماش ونخليه ينقع بماي حار عشان نشيل القشر .. يعني نحط عليه ماي حار وكل شوي نحركه ونزل الماي ونرد نحط ماي ونحركه ونزل الماي .. وعلى هل طريقه لما يتقشر ..
طبعا نكون مجهزين كل شي .. مقصصين البصل ومغسلين الربيان والعيش وداقين الثوم .. الحين نركب الجدر واول شي نحمس البصل مع البهار وبعدين نحط الثوم وبالتالي فوقه الربيان .. وننطر الربيان يزل مايه ونحمسه مع البصل ولما يستوي نشيل نص الكميه ونخليها على كتر عشان تصير حشو والباجي نخليه بالجدر .. ونكت فوقه الماش ونحط ماي يعني هبابه يغطي الماش ونخليه يفوح .. وبعد ربع ساعه نشوف الماش اذا صار نصه مستوي نحط العيش ونخلطه بملاس شوي شوي على هونكم عشان مايتكسر العيش .. وبعدين ننطره يتسكر وقبلها نحط باجي الربيان بالجدر وهذا يعتبر الحشو .. وعليكم بالعافيه
في ناس تفضل تحط بصل وطماط على عداله مع المموش بس هذا تحطونه قبل لا تكتون العيش بالجدر عشان لايذوب ويصير مريس ..
ملاحظة : بنفس الطريقه هذي نسوي المموش مع الربيان اليابس .. وطبعا الربيان اليابس لازم تغسلونه عدل وتنقعونه بماي حار .. وبعدين عقب ماتحمسونه تشيلون ثلاث ارباع الكميه وتدقونها بالهاون عشان يتفتت ويصير حشو ..وتحطونه فوق المموش .. لاتنسون المخيسات بجميع انواعها ترى من غيرها المموش مايسوى .. ودقوس الصبار والاجااااااااار والمعبوج
نصيحتي لكم اليوم .. تاخذين ماي الربيان وتخلطينه في ماي العيش وتحطينهم على شعرج .. ترى يموت القمل اللي براسج ويساعد على تقوية الشعر وينحش ريلج منج وتفتكين من اذيته
شعارنا اليوم
المموش تالي الليل .. يسوي البطن غرابيل
امكم العوده
دندره
ادري ضيقة خلق بس خل افش اشوي ..... المهم عليكم بالعافيه طبعا انتي تدرين اللي يسوي ريجيم عينه على كل شي حتى لو على مصاصه الياهل .
