مرحبا بنات
شلوووونكم بعد الالف ههههه
انشاء الله تتهنون فيه
عالعموم ابي اسأل عن الميداني من الالف الى الياء
من ناحيه التحضير والتعامل مع الاداره
والتعامل مع الطالبات
الله يعافيكم لاتبخلون علينا
واهم شي متى يبتدي الدوام بالمدارس الكورس الثاني ومتى نخلص من الدرسه بعد؟؟
وكتبولي عن حلقه بحث شنو المطلوب مني وهل الحضور مهم؟؟؟
السلام عليكم
والله كتبت لج رد ذاك اليوم اشطوله حطيت لج كل شي بالتفصيل بس علق المنتدى وما انحط الرد .
شوفي اهم شي اولا واخيرا الموجهات وبعدين القسم واخر شي الاداره
انا الحمدالله طحت بموجهه عسل اتهبل الله يجزاها كل خير والقسم كله حبها من كثر ما هي ذوق هالانسانه اما موجهتي الثانية فحدث ولا حرج ما ودي اتكلم عنها لان مزاجي يتعكر من اجيب طاريها الله يسامحها بس اخذت a وفوق ال 97 كانت درجاتي والفضل لله سبحانه ثم للموجهه الاولى اللي وقفت وياي وما سمحت لها انها تظلمني .
ثانيا القسم اهم شي لان اليوم كله انتي معاهم فلازم تكون علاقتج طيبه معاهم بالاول بيكونون كاشين منج بس بادري انتي معاهم بالسوالف صراحه اول اسبوعين كانوا حذرين بتعاملهم بس عقب ما تداخلت معاهم وخليت ريوقي معاهم تدريجيا اخذنا على بعض وضاق خلقي يوم خلص الكورس واهم بعد تعودنا على بعض .
الاداره بيعطونج مناوبات وتحوشج مره بالاسبوع وحصص احتياط احنا قالوا لنا باللقاء التنويري ان ناخذ بس حصتين احتياط بالاسبوع بس المدرسه اللي كنت فيها كانوا يعطوني كل يوم وما رفضت هالشي لاني كنت حابه احتك اكثر بالطالبات واعرف اشلون اتعامل معاهم .
جدولج بيكون من 8 الى 10 حصص بالاسبوع انا عطوني اولى وثالثه
التعامل مع الطالبات ممتع واهم شي خلي علاقتج طيبه معاهم وانا كنت اسوي طريقه وووايد انفعتني وما كنت اضطر اصارخ او اسكت البنات لانهم ما كانوا يزعجوني واهي اني احط على طرف السبوره اطواق والبنت المؤدبه اكتب اسمها بالطوق وكنت اسميهم اميرات الصف او البسهم تاج فراشات واسميهم فراشات الصف واللي تتشاغب ينشال اسمها او اخذ منها التاج وما تتصورين كنت من ادخل الفصل القى البنات مطلعين كتبهم وواقفين مرتبين ينطروني .
وكنت بنهاية الاسبوع اجمع الكتب واللي كتابها كامل اكرمها .
والتحضير سهالات عندنا دليل المعلم فيه كل شي بس كان علي اني اصيغ الاهداف السلوكيه ودايم خلي تمهيدج شي حركي ومبتكر عشان تنشطين البنات انا دايم اسويه على طريقه لعبه بين فريقين او المجموعات .
قسمي الفصل من البدايه لمجموعات وحطي لكل مجموعه قائده وكل اسبوع تتغير القائده عشان العمل التعاوني ما يصير فوضى .
وحطي مسؤوله لكتب انا كل اسبوع احط مسئوله للكتب ويكونون بنتين .
وكنت حاطه مسئوله عن النظافه
وطبعا اكرمهم عقب ما تنتهي الفتره المحدده لهم
والحين يطالبون بالوقفه السلوكيه ومحاسبه عليها ومن ضمن بنود تقييمج
ولازم تسوين برنامج اذاعي .
طبعا اول اسبوع تحضرين حصص مشاهده والاسبوع الثاني تبلشين تدرسين والصف تدخلين عليه مرتين او 3 مرات بالاسبوع وباقي الايام مدرسة الماده لانج ما تقيمين الطالبات ولا تختبرينهم .
بالنسبه للدوام اول اسبوع دوام بالكليه راح يسوون لقاء تنويري يوزعونكم عالمدارس والاسبوع الثاني تداومون بالمدرسه.
وادري قرقت عليكم وايييييييييييييييييييييييييييييييييييييييد بس حبيت افيدكم واي شي تبونه انا حاضره .
ولكم مني دعوة حلوه ان الله يرزقكم بموجهات متفاهمين وقسم متعاون واداره حقانية
