شغلهم حلووو ونظيف وبهاراتهم جنها شغل بيووت ريختها تبط الراس من زينها
تبين المجبووس ماااطلبتي شى هذى طريقتي بعلمجياها وانشاءالله تسوينها خطوه اب خطوه وتاكلينها بالعافيه يااقلبي
الديايه تاخذينها تغسلينها زييييييييييييييين مازين من داخل وبره بتشوفين شغلات مثل الجبود الصغيره ودم يامد داخل بطن الديايه تغرفينهم وتقطييينهم
تالي تاخذين الديايه وتفركينها بالطحين من داخل وبره وتخلينها ربع نص ساعه تقريبا علشان تطير الزفره والطحين يمص الدم اللي بالديايه
بهالفتره انتي عندج ابره وخيط مزهبتهم علي كتر
وعندج بصل مقطع صغار صغار ومعاهم كشمش منقع تحطين عليهم شوي كركم دارسين مسمار لومي اسود وملح
طبعا كل اللي قلته لج تحطينه مطحوون
عقب النص ساعه اتييبييين الديايه وتغسلينها زيييييين عن الطحين وتحشين بطنهااا تترسينه من الحشوه هذى وتخيطين الديايه واتييبين جدر تحطين فيه ماي خالي وتقطين الديايه بالجدر تخلين الماي يغلي غلوتين بس مو وايد علشان يطلع الغفووو والزفره من الديايه
تالي ترفعين الديايه من هالماي وتحطين جدر العيش اللي بتطبخين فيه وتقطين فيه علبين دارسين وجم حبة مسمار وورق قار وشوي كركم وملح وتترسينه ماي
وتحطين الديايه فيييه وترزين الجدر عالجوله
وخلي الديايه تطبخ تطبخ وبتشميييييييين ريحة الماي تهبل وتبط الراس من زينهاااا
عندج العيش منقع وجااهز علي كتر
وتاخذين شوي بلاليط ( شعريه ) تحمسينه بالمقله لين يصير لونه بني فاتح موووووتنسينه وتخلينه يحترق ديري بالج
الديايه عقب ماتطبخ وتستوي ترفعينها من الماي وتحطينها بمشخال صغير علي كتر علشان ينزل منها الماي اذا بتقلينها بعدين مايطشر عليج الدهن واذا بتشوينها بقول لج شتسوين بعدين
المهممممممممم انيييي حق العيششش
بنفس ماي الدياي تكتين العيششش وتخلينه يقلب ويستوي وتشوفين العيش نظااا تمام وقبل مااتشخلينه كتي فيه البلاليط وحوسيه عالخفيف علشان يختلط العيش بالبلاليط
اتييين تكتين العيش بالمشخال وتاخذين الجدر تسوين فيه الفرقاعه وهي عباره عن حمسة بصل جوانح بالزيت والا الزبده انتي ومشتهاتج انا اسويها بسمن المراعي
عقب ماتحمسين البصله تخلين شوي منها بقاعة الجدر وتكتين عليها العيش اللي بالمشخال وباجي الحمسه كتيها فووق العيشششش وعندج مله صغيره منقعه فيها زعفران بماي الورد وترشينه علي العيش من فووق وحطي الحديده تحت الجدر وقصري عالجوله علشان يتسكر العيش براحته وغطي الجدر بقصدير وتالي حطي غطا الجدر
خلصتي من العيششش
تعالي حق الديايه اذا بتقلينهااا عقب مايروح منها الماي ترشينها بشوي دارسين مطحون وتقلينهااا بالمقله واذا تبينها بالفرن حطيها بالبايركس وقصي شوي بطاط حلقات وطماط حلقات سوي نص مكعب ماجي ذوبيه بكوب ماي وكتيه علي البطاط والطماط والديايه حطيها فوقهم وشوي من ماي الزعفران والهيل دهني الديايه من فوق وحطيها بالفرن تشوفينها لما تستوي تصير حمرررررره تهبل
ولاتنسين الدقووس
وعليج بالف عافيه ووقت النجاب تسلتين الخيط وتطلعين الحشوو من بطن الديايه بالقفشه وتحطينه حوالين الديايه وترزين الديايه بالنص وتعالي شووفي طبخج اشلون يصير يهبل
هذى طريقة الحشووو في بطن الديايه وتقدرين تسوينها بعد باللحم تاخذين لحمة فخذ والا ايد خروف وتشقينه بالنص وتحشينه
وعليج بالف بالف بالف هنا وعافيه
