تبين المليووون ؟؟؟ دشي !!

[حلم الطفولة]

آنا أبي امية مليون !! ..


خلّي أكبر همّج رضا ربج .. وخلي أحلامج كبيره وثقي إن الله راح يقرّب لج كل الفرص إن شاء سبحانه ..

أهم شي لما كان يتكلّم صلاح الراشد قبل عشر سنين عن قانون الجذب << اللي الناس توها تكتشفه ! << كان يقول : اللي ماعنده ولا فلس خل يحلم إن يكون عنده ألفين ..
لما يكون عنده الفين خل يحلم بعشرين ألف .. القصد خلي حلمج بالتدريج ...


شلون تبدين ؟؟ دشي معارض .. سوي خلطه بس أول جربيها على نفسج ... اشتري من السوق بالجمله وبيعي بأغلى شوي ..
صنعي بإيدج شغلات ,, باندات ... اكسسوارات ... كيكات ياكيكات ... معجنات ..
والأهم إيراد أي مشروع لا تصرفين منه إلا له << كل إيراد أخذي منه حق نفس المشروع راس مال ودخلي الأرباح بحساب خاص بالبنك , وغير الزكاة ماينصرف منه.

هذي طريقه أعرف إنها من أفضل الطرق لتنمية الأموال حبيت أفيدكم فيها

حلمي ولا تيئسين وخليج متفائله ,, وحافظي على مفاتيح الرزق .. شنو ؟ : الصدقات والاستغفار وصلة الرحم والتقرب لله سبحانه وتعالى ..
وأهم شي تذكري من كانت الدنيا اكبر همّه جعل الله فقره بين عينيه << حديث .


راح أكتب لكم بعد شوي طرق وأفكار لمشاريع ,, بس أول أبي تجاوب على المقدمه هذي

^^^
^^
^


أول شغله أحب اقولها خطة التوفير اللي لازم تسوونها في البدايه ..

^
^

*** نبدا :
أبيكم أول اسبوع تتصرفون عادي مثل كل يوم ولكن السبت لغاية الجمعه تكتبون بورقه وقلم كل فلس انصرف و بشنو انصرف ,, ولهالشغله لازم تاخذين فاتورة الشراء من كل كاشير حتى من الــ..بقاله !

الحين صار يوم اليمعه .. ( الجمعه ) .. قعدي وشوفي اللي كتبتيه خلال الاسبوع واللي شريتيه والمبالغ اللي انصرفت .. شطبي عالأشياء اللي تعتقدين إنها ماكانت ضروريه .. شوفي أعداد الأشياء وقللي عددها في الأسبوع القادم .. مثلا شريتي ثلاث كليبات شعر عشان بتجربينهم !! , خلي تجربتج المره الثانيه واحد بس ..

** الأسبوع الثاني امشي عالخطه نفسها واستمري في تقليص المشتريات اللي اكتشفتي إن ماكان لها داعي في الأسبوع الاول ..

الحين الشهر الأول فات وعدا .. قعدي وشوفي معدل الصرف عندج .. وهذا المعدل اللي مالازم تتعدينه كل شهر .

تصدقون هذي طريقة واحد مليونير قايلها لنا !!

المهم .......................... الحين ..<<<<<< ...... طريقتي سابقا في توفير النقود شهريا :


أقول ؟؟؟؟ ....... عذروني ......... فاصل ونواصل ...

بسم الله الرحمن الرحيم ..
^
^
ومثل ماقلنا قبل الفاصل .. الحين بقولكم طريقتي .. وبعدها بقول لكم شلون ندمج الطريقتين إن شالله ..

^
^

^

قبل كم سنه صار لنا ظرف طارئ ,, توهقنا .. وانحسرت إيراداتنا ..
عيالي بمدرسه خاصه !! مابي أطلعهم :0bee2e8d89: .. طيّب شنسوي ؟؟؟؟؟

1- قررنا نقلل المصاريف .. ونقلل طلعات .. ونقلل أكل بالمطاعم !!!
ههههههههههههههه ...
2- الأهم من هذا حبيباتي .. حطيت كروت السحب الآلي عند زوجي _03ba:
وكنت آخذ مبلغ معين في بداية كل شهر ..
وأصرف منه ولو شنو ما أتعدى الميزانيه ..

3- إذا خلصت الفلوس قبل مايخلص الشهر هنيه لو شنو ما أسحب ..قلعتي !!! أظل على الحديده ولا أسحب !!
(( وعلى فكره والله والله والله .. كان يوصلني رزق بطرق غرييييبه عجيبه .. ألقى خالتي موزعه عالكل 500دينار وللا ألقى مادري شلون عشره ,, بنات لأن التوكل على الله والاستغفار والتعفف مو شي قليل ))

المهم ...

4- كان إذا يتني مبالغ أخرى غير المصروف المقرر الشهري ,, أحطه بظرف : إسمه ظرف أقساط المدارس .. وهذا بعد لايمكن أطلع منه دينار واحد ..


بنات إحنا نقول أحيانا مايصير ومانقدر ... لأ صدقوني يصير ونقدر إن شالله ..

إذا نوعج تحبين تشترين بدلتين وجنطه كل شهر .. قلصي واشتري بدله بالشهر .. وجنطه كل ست شهور !


طبعا هذيك الفتره ماشريت لي شي يذكر ,, ,, كان همّي أقساط المدارس وبس ..

////////////////////////////****/////////////////////

الحين لما ندمج الطريقه الأولى اللي بسميها طريقة توفير المليونير .. وطريقتي .. نطلع بنتيجه يديده وهي :

إنكم تحددون المصروف الشهري عن طريق طريقة المليونير .. وتمشون عليها بطريقتي في التوفير ..


^
^
^
الحين فاصل وأقول لكم عن أحلامي اللي كنت أحلمها وطموحاتي .. وماذا حققت منهااااا 03ba:

كاني حبيباتي .. عذروني .

انزين ,, إذا نقصت الميزانيه لازم تستحملين وتقضبين إيدج .. وإذا زاد من فلوس الميزانيه شتسوين ؟؟؟

((((( 1- إما انج تضيفين عليها مصروف يديد تكملين فيه المبلغ الشهري
((((( أو 2- تحطينه في الظرف .. اللي ماينجاس نهائي إلا للغرض اللي خاشه حقه << في حالتي كان قسط مدارس وممكن يكون حق سفره ..

رقم 2- واضحه حبيباتي صح ؟؟

الشرح حق رقم 1- << إن إذا الميزانيه الشهريه 120 مثلا وزاد من هالشهر 20 طلعي من حسابج فوقهم 100 للشهر القادم لا غير ,, أو دخليهم في ظرف التوفير ..

ما يصير تسحبين 120 وفوقهم الــ 20 اللي زادت ... نووو !!

الحين توهقت !!! ... ماعرف أبي أصرف على نفسي شوي عاد ,,
بيع ؟؟؟ معارض ؟؟؟ مادري حسيت طقني الحيا !! ولكن ...

يتني فكره صغيره ,, ... ,, .. ,, بنات خواتي دايما يشكون من شعورهم جافه ومتاثره من الاصباغ .. قلت بجرب أخلط خلطات وحمامات زيت وأجربها وتكون من نوعيه ممتازه ,, وأبيعها عليهم من باب الوناسه يوم الزواره.

وفعلا .. تمت السالفه وبعت .. وربحت ويتني الطلبات بعدها ,,
ثم قمت أدوّر اكسسوارات ,, وآخذ بسعر الجمله .. >>> صارت هوايه .. وناسه ... لأن الموضوع بيني وبين خواتي بس .. ماكو حيا
صار بنت اختي يوم الزواره تييب صبغ الأظافر وتصبغ للبنيات بنص وتروح في الإيرادات الجمعيه تشتري كاكاو
..........................................................
::::::::::::::::::::::::::::::::::::::::::::::

الحين الأحلام والأماني .....
مابقى مشروع مافكرت وتخيلته .. مابقى مرسيدس ماشريت بالحلم ..
ما بقى شاليهات مابقى مابقى .. ما بقى شي مافكرت فيه !


أكمــّـــل ؟؟

نيولوفر .. و راعية الطيارة .. أشكركم حبيباتي

خلونا نلوّن حروفنا ونلّون حياتنا ..

طبعا آنا كان الغرض من خلطات وسوالف واكسسوارات إني أضيف على المصروف الشهري أي مبلغ يساعد على الترف شوي ..


مابي وايد أطول عليكم بس شوي في كلام لازم أقوله:
.. ببدي لكم الحين بالعلم اللي يسمونه : قانون الجذب ..
انتبهو معاي على كلام الله سبحانه في الحديث القدسي : .. أنا عند ظن عبدي بي ,, فليظن بي عبدي مايشاء !! سبحان الله !
يحسن العبد الظن بالرب فيحسن الرب للعبد ..العاصي أساء الظن بربه فعصى فسيأتيه العذاب بما عصى .. !!

وقول العرب : تفاءلو خيرا تجدوه << تراه مو حديث ..
لازم نعرف خواتي الغاليات ,, إن في الإسلام أكو شي اسمه : (( فقه التمني )))

:ggdw: وناسه .. يعني أكو فعلا أصل لعلم الطاقه في قانون الجذب وشرعيا بعد



ـــــــــ ,,,, ــــــــــ ,,,, ـــــــــ

قانون الجذب إنج ترغبين في شغله .... وتظلين تفكرين فيها كأنها عندج وصارت لج ونلتيها خلاص

تظلين تحطين نفسج في الصوره اللي ودج تصير , وكأنج فعلا فيها ..
تقولين : عندي عشرة آلاف دينار ..مو تقولين أبي عشرتالاف

وظلي ركزي عالمطلوب والأمنيه .. وخليها في تفكيرج ..
وكان صلاح الراشد يقول كتبوها بجمله إيجابيه بتمرين ثلاث مرات باليوم .. والجمله تكرر 21 مره كتابة ,, لمدة 21 يوم ...
آسفه يمكن أكون مو دقيقه في المعلومات عن الدكتولار صلاح واللي قاله بالقانون بس هذا اللي أذكره الحين ..

خواتي راح بعدها بأشهر تتعجبين لما تفتحين النوت بوك اشكثر اشياء كنتي كاتبتها تحققت سبحان الله ..
بس ها ! .. تراها تحققت بأمر الله ,, وبحسن ظنج فيه وإنه مايخيب عبده ..
بالصدقه والدعاء أثناء الصدقه .. بصلة الأرحام والاستغفار



&&&&&&&&&&&&&&


المشاريع الصغيره راح تنفتح لج إن شالله .. والأفكار راح تلقينها وانتي ساهيه تطير على بالج ,,

والمشروع اللي تبينه ,, بتلقينه بإعلان بالجريده جاهز مجهز ,, << عن تجربه !

::::::::::::::::::**:::::::::::::::::

آسفه عالإطاله ,,, بس حبيت أجذبكم .. وأعلمكم .. وأنفعكم بما تعلمت من دروس في الحياة بالتجربه , قبل حتى مانسمع وانعرف عن أي قانون في العلوم الحديثه

##########################

أكمــــل ؟؟؟

ظليت حاطه في بالي مشروع صغير ,,
سبحان الله بتوفيق من الله الأزمه اللي حاشتنا بدت تنفرج ,,
والمشروووع .......
المشرووووع
^^^
^
^

لقيته بإعلان صغييير بالجريده .. وقررت ابدي فيه بكل جرأه ..
يعني ياخواتي المسأله أيضا تحتاج جرأه ..

ما قول اندفاع ,, ولا مخاطره ,, بل مجازفه صغيره تحرك فيج الحماس ,, تنشط عندج الأفكار والإبداعات .

ثم ... بدو ناس بمثل مشروعي ... وتوقفو ! ,, لأن ماصبرو !!

عيل يبيله صبر بعد

أي مشروع خواتي ,, ماتظهر خطوط الإستقرار في الدخل فيه إلا لما يمر عليه رابع سنه ..
حطو خط تحت كلمة : رابع سنه ..

تحققت أمنيتي بفضل من رب العالمين ماشالله ومستمره رغم الصعوبات لأن مشروعي كلّش مو من تخصصي ولا من قدراتي .. شي كان ودي فيه وبس . والحين وبعد مرور ست سنوات أنوي تكبير المشروع بإذن الله ,, أسأل الله التوفيق ..

:::::::::::::::::::::::::::::::::::::::::::

خواتي ,, دخت بنام استودعكم رب العالمين ,, وإلى حلقة جديده نكمل فيها ونتحدث عن بعض المشاريع بطريقه جديده ومشوقه إن شالله

والحين بعد ماعطيتكم دفعه للأمام رجاءا لا تنطروني أكمل !! ,, روحو دشو الموضوع المثبت عن ملف المشاريع الصغيره

السلام عليكم يا حلوين

^
^

^

الحين إذا تبين تسوين مشروع شخصي صغير مايحتاج محل ولا رخصه ,, كل اللي تحتاجينه فكره ,, وتجربه للمنتج أو الفكره ,, مكان للتسويق أو مجموعه مضمونه تسوقين فيها وتروجين لها ..<< في حالتي كانو خواتي ومن خواتي بناتهم وصديقات بناتهم.

إذا حابه يكون لج مشروع صغير تبين له مكان ورخصه وعندج راس مال حقه سئلي نفسج :

-1- متشوقه للفكره وعندج حماس كبير لها ؟؟
-2- المشروع عارفه بالضبط شراح تطرحين فيه من مواد أو سلع أو خدمات ؟؟ << مشروعي خدمات.
-3- عندج ولو شي بسيط من الخبره تتعلق في مشروعج الصغير ؟؟ حتى لو خبره في مجال مساعد للمشروع مو خبره في المشروع نفسه !
-4- مشروعج عليه طلب ؟؟؟
-5-أكو لج منافسين والمشروع منتشر وايد بالسوق كسلعه أو كخدمه ؟؟

ومن هالأسئله عيشي الحلم واسعي فيه .. وفكري وبحثي وصيري نحلة زمانج
وإن كان عندج خبره أو تخصص يالله بسرعه استفيدي منه .. منو كان يتخيل قبل 15 سنه إن بيصير عندنا كويتيات خبيرات تجميل وشيف مطعم ؟؟ الشطاره بالإبتكار وانتهاز الفرص وعمل شي جديد بكل جرأه حتى لو غير متوقع

::::::::::::::::::::::::::::::::::::::::::::::::::::::::


والآن إليك بعض المشاريع والأفكار .. ولا تنسون المواضيع المثبته الرائعه في القسم .. مفيده جدا

**************************

شاطره بهالأمور وماعندج ميزانيه ؟؟؟​

شاطره بهالأمور وماعندج ميزانيه ؟؟؟؟؟؟؟
شاطره بهالأمور وماعندج ميزانيه ؟؟؟؟؟؟؟؟؟؟​

خاطرج تفتحين مطعم ؟ ...
خاطرج صالون ؟؟
ودج تسوين حضانه ؟؟

تبين تقدمين خدمات للطلاب ؟؟

مو لاقيه مكان ولا في رخصه ولا عندج راس مال ؟؟؟؟؟؟؟؟؟؟
مو مشكله !!!! .. ابدو بالبيت وبين أهلكم وصديقاتم.

1- مجال الأغذيه : تصدقون هذي من أنجح المشاريع على الإطلاق !
عندج صنف مميز ؟؟ شغله مبدعه فيها ؟؟ مخللات حلويات موالح .... يالله شناطره عيل .. قومي ابتدي الحين.

2- مجال التدريس .. مدرسه ؟ شاطره ولج خلق ؟ حبيبتي الحين طيري عطي دروس بالبيت عندج وكتبي تلاخيص ومذكرات .. ترا هالشي مو بس اختصاص خواتنا واخواننا المقيمين ماشالله عليهم إبداع في الأفكار وينطلقون الله يبارك لهم..
قومي هطي لج خطه ومنهج وابتدي ..

3- مجال رعاية الأطفال : (( بالمختصر يالغاليات حضانه منزليه صباحيه أو مسائيه)) عاد الحين فرصتكم ,, الحضانات والرياض مغلقه بسبب انفلونزا h1n1 .. فكري منو حواليج عندهم أطفال صغار ؟؟؟ عندج أعداد جيده ؟؟ عندج مساحه بالبيت غرفتين وحمام وخادم شاطره ؟؟
يالله روحي اشتري زحلاقيه بلاستيك وكراريس والوان وستيكرزات .. واستقبلي 6-8 أطفال فقط (( أمانه مو اكثر ! ))
وبالمساء سوّي نظام الساعات .. الساعه بــ (( ...))) .. أكيد طرت على أحد فيكم هالفكره من زمان وماطبقتها ! ليش ؟؟؟ ماكو همّـه ,, ماكو طموح .. ماكو تشجيع ؟؟؟ ... لا لا لا .. الحين سووها يالله..

4- في مجال كمبيوترات والبرمجه : إعلان صغير بالوسيط أو في أي مجلة إعلانات : مبرمجة كمبيوتر على استعداد لـ ...
أو : في مجال التصميم البرمجي : مصممة مواقع .. وانتي عليج الأفكار يا أحلى صاحبة أفكار .. مبدعه يا كويتيه

5- في مجال الحيوانات .. لا تضحكون : !! حضانة حيوانات أليفه مو ضروري محل لبيع الحيوانات إذا عندج هوايه وقدره ومساحه ..

6- ....... أكمل بعدين ... عذروني
^
^
^
:
:


22- مجال العنايه الشعر : تحبين خلطات وسوالف الخلطات والكريمات ؟؟ اشتري وخلطي وجربي على نفسج شهر .. وبيعي .. وزيدي فكره مبتكره (( ماراح أقول بس ترى عندي أفكار :eh_s(1): )) بس أبيكم انتو تبدعون

23- مجال الــ ....

-6- عندج هواية ترتيب وتنسيق ؟؟ ... وايد زين .. ممكن تنمين هوايتج بالدخول لدورة تصميم ديكورات داخليه << انتيريور ديزاين ,, ​

وممكن بعدها تنطلقين بين الأهل ثم الصديقات ومنها لأعلى ..
أي أحد يبي نيو لوك لغرفته ,, يحددلج المبلغ اللي يقدر عليه ويدفع لج إياه ,, وانتي تاخذين لج منه نسبه والباجي تبدعين فيه بالديكور والصبغ والتزيين ..​

بس أول لازم يشوفون نمونه من شغلج ؛؛ يعني ممكن تكونين مغيره اللوك في دارج أو صلتج ومنها تنطلقين ..​

ومن هالمجال بعد تقدرين تسوين مشروع آخر وهو نادر ومو موجود ولا حد يقول صعب ماكو شي صعب:​

-7- منسقة غرف !! ... وحده من معارفج مضايقها ترتيب الصالات وغرف أطفالها ,, تاخذين مبلغ لقاء عملج وتقومين بإعادة تنظيم غرفهم .. ​

-8- تصميم كوش وتنظيم المناسبات
-9-مدربة رياضة اليوغا أو ايروبيك خاصه .. << في بيتج تعلنين عن إقامة يوم بالاسبوع حصة رياضه وتدريب بالسعر المحدد..​

-10- التصوير الفوتوغرافي .. سوي لنفسج بغرفه في بيتج ستوديو شخصي صغير
-11- تسويق بضائع وهالشي رائج وماشي حيل ..​

-12- صالون اليدين والقدمين للأطفال !​

-13- صناعة الاكسسوارات ..
-14- تزيين الملافع بالشوارزفكي وبيعها
-15- شراء بضاعه بالجملة وبيعها ..​

-16- عندج هواية الكتابه ؟؟؟ ... قومي ألفي يالله بسرعه ..
.. ألفي قصه أو تعاقدي مع مجلة أو جريده وحصلي لج مدخول من وظيفة ثانيه وهي كاتبه مقال في إحدى الصحف او المجلات .. أو ترجمي كتاب .. أو كتبي قصص لأطفال.. طبعي بحوث للطلبه ....​

-17- محل ألعاب أطفال ..
-18- أخذي دورات وصيري : مدربه !! تخصصي بشغله وكوني سيدتها ​

-19- تصميم ملابس وأزياء
-20- تطريز وحياكه مشروع حلو وبسيط يبيله الوحده الشاطره بالخياطه .. او دوره وتصير شاطره ..​

,,,,,,,,,,,,,,,,,,,,,,,,,,,,,,,,,,,,,,,,,
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,​

ماخلصت .. !! .. بس بقول لكم إن في بعض المشاريع ممكن تكون مجرد خدمه تقدم ,, مالها مكان ولا تحتاج موقع ولا تحتاج غرفه في بيتج .. ومنها :​

مشروع الهدايا والتغليف ..
مشروع استجلاب البضائع من بره حسب طلب الزبائن
مشروع التسوق للزبونه وشراء احتياجاتها من السوق أو من الجمعيات ,, أو شراء حاجتها لمناسبه معينه ... انتي وأفكارج ..​

::::::::::::::::::: :::::::::::
::::::::::::::::::::::::: :::::::::::::::::::::::​

أكمّـل ؟؟​

رجعت لكم

^
^

خواتي للعقل والتفكير قوى عجيبه سبحان الخالق ..
بسألكم سؤال : ماقط مرّه فكرتي بوحده وانتي مو شايفتها من زمان , ولقيتيها بعد دقيقتين داقه عليج ؟؟

هذا شلون صار ؟؟؟ بقوّة التفكير سبحان الله ..

وآنا أبيكم جذيه تستخدمون نعمة الله اللي عطانا اياها ,, خليكم عارفين هدفكم وخلو مشاعركم قويه وتصميمكم قوي ..
ومثل ما قلنا في الموضوع الأمر يبيله عدة أشياء :

الإصرار ,, الحلم ,, الأمل ,, التمني << تذكرو بالإسلام أكو فقه التمني -
الصبر الجرأه المجازفه ..... <<< وكل هذا يبيله في البدايه نقطه صغيره ((( التركيز بالتفكير )))

بنات شحنو نفسكم بالفكره وخليكم إيجابيات ,, دائما ,,

كتبو لنا إذا أي وحده فيكم صارت لها هالتجربه وعن طريق التمني والتفكير والتصرف الجيد حسّت إن الثروه وصلت لها

وآنا راح أكتب لكم الحيييين ,, الدورات والكتب المفيده في هذا المجال ...

في كتب عن قوّة العقل الباطن ..
وكتب عن قوة التفكير ..

وبالعموم كتب أنتوني روبنز ومنها :

وأيضا هالكتاب اللي يهبل ومفيد جدا ويختصر الطريق للكل..

آنا متأكده إن غالبيتكم عارفين هالكتب ويمكن قارينها ..
لكن الحين أبي الحماس عندكم يزيد ,, وأبيكم تردون تقرونهم ..
تحطون خطه محدده ,, وفكره رائده .

أما بالنسبه للدورات .. في دوره اسمها أيقظ العملاق وأطلقه ,, وفي أيضا مجلدات سمعيه اللي تتكون من عدة أشرطه والي روادها الدكتور طارق سويدان الدكتور صلاح الراشد والدكتور العلي .. الصالح ... وغيرهم الكثير ..

بنات ادعولي بالشفاء ,, لا تخافون علي ماكو شي بس صخونه من يومين .

**** موضوعنــــا ........ : ....

طبيعتي كنت من وآنا صغيره حالمه ,, << والدليل اسمي بالمنتدى
أحب أعيش حلمي وأظل متأكده إنه بيتحقق يوم من الأيام .. ,, وكانت هذي سعادتي ..

دايما أعتبري الشي اللي تبينه أمر راح يحصل بإذن الله قريبا أو بعيدا ,, حاصل حاصل..

في شغله أثرت فيني وايد قبل سبع سنوات وانطلقت أكثر وأكثر منها .. كانت عباره عن مجلد صوتي .. للدكتور سليمان العلي ..

اسم المجلد : أيقظ العملاق وأطلقه

بالإضافه إلى دوره قدمها لنا شخصيا .. بنفس العنوان ..

إن شالله أكون نفعتكم وشجعتكم

 

[كويتية cuot]

جزاك الله اف خير وكلامك روعة ومفيد ومنطقي
واكيد الكل راح يستفيد منه لانك ماشاءالله ما خليتي شي ...
والله يجعله في ميزان حسناتك

 

[حلم الطفولة]

جزاك الله اف خير وكلامك روعة ومفيد ومنطقي
واكيد الكل راح يستفيد منه لانك ماشاءالله ما خليتي شي ...
والله يجعله في ميزان حسناتك

مشكوره يالحبيبه وهذا اللي نبيه : انكم تستفيدون وإنكم تدعون لي

 

[الصابرة المحتسبة]

ماشاءالله تبارك الرحمن ولا إله إلا الله

موضوع روعة وقيم ومفيد ومميز في الطرح والأسلوب في الكتابة .

الصراحة اندمجت مع كتاباتج وماعندي غير دعوة صادقة من القلب يعل ربي يوفقج ويرزقج أطيب مافي الدنيا يالغالية.
بارك الله فيج.

 

[أغلى الأثمان]

للرفع

 

[F.A]

جزاج الله خير

 

[حلم الطفولة]

ماشاءالله تبارك الرحمن ولا إله إلا الله

موضوع روعة وقيم ومفيد ومميز في الطرح والأسلوب في الكتابة .

الصراحة اندمجت مع كتاباتج وماعندي غير دعوة صادقة من القلب يعل ربي يوفقج ويرزقج أطيب مافي الدنيا يالغالية.
بارك الله فيج.

يزاج اله خير الصابره وآنا بعد أدعو لج من كل قلبي نفس الدعوه وأزيد .. الله يرزقك أطيب مافي خير الدنيا والأخره ,,, آآميين

 

[حلم الطفولة]

للرفع

رفع الله قدرك يا الغاليه

 

[حلم الطفولة]

جزاج الله خير

أجمعــــيين

 

[londoOn]

يزااج الله خييييير الغلا في ميزان حسناتج ما قصرتي


الغاليه انا ودي ابدا بمشروع لاني ادرس جامعه خاصه واخفف حمل ع ابوي

فخالي عنده مطعم توه في بدايته وكل المعدات والطباخين موجودين

بس المشكله محد واقف ع المشروع لانه مسافر علاج خارج دوله

والمطعم تدهورت حالته للاسوء و الاسوء

فالحين موقفين الشغل وانا ودي ارد امسك المشروع لانه كل شي متوفر من معدات واحسن طباخين

فقلت بشتري المطعم من خالي وبدفع الايجار

بس فكرت صعبه اني بنت اروح المطعم ومن هالسوالف

الغلا انتي شرااايج ؟

 

[حلم الطفولة]

الله يرجع خالج بالسلامه .. ويشافيه ويعطيه الصحه ..
إن كان فيه موافقه من خالج والوالد والأهل ماظن فيها صعوبه ,, عادي حبيبه ممكن تكون الإداره غير مباشره وإنما يكون لج حضور بين فتره وفتره .. طالما الشغل ماشي .. وانتي لج خطوط حمراء واضعتها للموظفين والطباخين .. ,, انتي ماراح توقفين هناك كل يوم ..
شوفي شوكلت بار أصحابه نساء موفقه حبيبتي وتوكلي على الله.

 

[حجيه هيونه]

حلم الطفوله الله يوفقج ويحط لج الخير بطريقج وين مارحتي

الله يعطيج الف عافيه على هالتعب والمجهود

 

[BaNo0ota 6er]

الله يرجع خالج بالسلامه .. ويشافيه ويعطيه الصحه ..
إن كان فيه موافقه من خالج والوالد والأهل ماظن فيها صعوبه ,, عادي حبيبه ممكن تكون الإداره غير مباشره وإنما يكون لج حضور بين فتره وفتره .. طالما الشغل ماشي .. وانتي لج خطوط حمراء واضعتها للموظفين والطباخين .. ,, انتي ماراح توقفين هناك كل يوم ..
شوفي شوكلت بار أصحابه نساء موفقه حبيبتي وتوكلي على الله.

يزاج الله خير , وان شالله رح اصلي استخاره واتوكل ع الله

^_^

 

[حلم الطفولة]

حلم الطفوله الله يوفقج ويحط لج الخير بطريقج وين مارحتي

الله يعطيج الف عافيه على هالتعب والمجهود

يا حبيبتي العفو .. انتو اللي مشكورين على هالتجاوب الرائع .أسأل الله أن يرزق كل وحده دعت لي بالخير أضعاف أمثال دعاءها لي .. آمين.

 

[out of reach]

مشكوره حملت الكتاب وان شالله راح ايقظ العملاق اللي داخلي لول

 

[حلم الطفولة]

مشكوره حملت الكتاب وان شالله راح ايقظ العملاق اللي داخلي لول

شاااطررره .. بالتوفيق out of reach .

 

[حلم الطفولة]

 

[@شمس الضحى@]

خوش موضوع وخوش تفاءل

 

[~باقة ورد~]

الله يجزاج بكل حرف وكل كلمه وكل جمله وكل ثانية وكل دقيقه وكل ساعه

وكل يوم عطيتينا فيه من وقتج وتعبتي أناملج الحلوه في كتابة هالموضوع الأكثر

من رائع وتستاهلين عليه وسام أفضل موضوع في كل أقسام المنتدى على الإطلاق

ويشهد علي الله إني ما جاملتج بحرف واحد وإن كل حرف طالع من القلب للقلب

لأنج إنتي بأسلوبج وبطيبتج وبإخلاصج بنقل تجربتج والشرح والتشجيع دفعتيني ودفعتينا

كلنا إن نشكرج بما إنتي أهلٌ له ُ​

 

[%عـجـمـيـه صـريـحـه%]

تسلم يمنآج...

موضوع رآئع...روعته في فائــدته...