{ ...الدكتورة رشا الصفي تجيب على استفسارتكم ..} استضافة اسبوعية

[د. رشــا الصفــي]

قووه
شلونج دكتوره
بغيت اعرف االحين شلون اخلي بنتي تنام نومه وحده وماتقوم بليل كل شوي حق الرضعه الحين بنت عمرها تقريبا ست شهور ونص بس اخر وقت تشرب عشر ونص او 11 وبعدها احطها بفراشها وتحن ليمن تنام بس تقوم وايد على ساعه 2 وعلى 4 و 6 و 8 و9 وتقعد تخيليي ابي اخليها تنام ماكو ونوعها نومها خفيف واقل شي تقةم حتى لمن تقةم اذا نامت الظهر نص سلعه ووايد وطول اليةم حذي بس غفوات

المشكلة انها لي الحين بيبي صغيرة على تنظيم النوم بالساعة

بس قعدتها كل ساعتين هذي غريبة بعمرها

ممكن تكون قعدات الليل بسبب الجوع

حولي تزيدين رضعة قبل النوم و اذا قامت اول مرة بالليل ترضعينها علشان تكمل نومتها

و اذا ما بديتي توكلينها يا ريت تعطينها وجبة تاكلها المغرب تقريبا

و اخر مرة تنام فيها الظهر تكون على الساعة 5 بالكثير

و تأخرين نومة الليل الى 12 تقريبا

يمكن ينفع

 

[د. رشــا الصفــي]

السلام عليكم دكتورة
نورت المنتدى
دكتورة انا ولدي عمره 11شهر وماقدر اعطيه اكل اي شي لان عندة اكزيما ودي اعطيه اكل وبديت بالخضروات بي مايتقبلها ولا العيش ومادري شسوي ؟
وودي تنصحيني شنو اوكلة والاكل المناسب لعمرة حاليا
وشكرا

عليكم السلام

المنتدى منور بوجودكم عزيزتي

بالنسبة للأكزيما انتي الوحيدة اللي تعرفين شنو الأكل اللي يتحسس منه الولد

حتى التحليل مو مضبوط 100%

شنو قصدج بما يتقبل؟

اهو ما يبي ولا يتحسس منه؟

عادة الحساسية تكون من القمح او الحليب او السمج او بعض الفواكه

بس نادرا الخضار او العيش

جربي انواع مختلفة من الأكل كل مرة نوع واحد لمدة 3 ايام متواصلة اذا ما صار شي جربي غيره و هكذا لما يصير عندج مجموعة من الأصناف تعتبر امنة للولد

و اذا تحسس منه وقفي على طول بنفس الوقت و انتظري يومين و جربي نوع ثالث

و نوعية الأكل الحين يقدر ياكل كل شي ما عدا الزيوت و الملح و العسل

 

[د. رشــا الصفــي]

السلام عليكم دكتوره بنتي عمرها سنه وشهر اعطيها حليب بروجروس جولد بس حيل مستغربه من المكيال مكتوب 175ماي و5 مكاييل احسه حيل ثقيل وبنتي ماقامت تشتهي الاكل مع ان بالرضاعه مافي 175 ملي اسويلها 180 ب5مكاييل ماادري طريقتي صح ياريت تفيديني بااقرب وقت وشاكرتلج اهتممامج ..

مو مشكلة 5 مل زيادة ماي

البروجرس فعلا ثقيل و يخلي الطفل ما يشتهي الأكل

عن تجربة اقول لج هالموضوع

مع ان في اطفال يناسبهم بصورة حلوة تبارك الرحمن

المشكلة هذا موجودة مع البيدياشور بعد

لأنهم سعراتهم الحرارية عالية عن باقي انواع الحليب

الي تسوينه انج تعطين بنتج حليب اطفال عادي رقم 3 الخاص لبعد السنة الأولى

و تخلين رضعة البروجرس اذا ودج تكملين عليه لوقت النوم

 

[د. رشــا الصفــي]

دكتورنا

الحمدلله عالسلامه نورتي المنتدى

شنو تنصحيني بشي مفيد للطفل عمر سنتين ((الاكل ))

وشنو الالعاب الي تناسب هالسن ؟ هل القلم مضر له انه يمسكه ويكتب فيه بهالسن ؟

الله يسلمج

الأكل العادي الخاص بالبيت يناسب الطفل بعمر السنتين

بس ما يكون دسم وايد

طبعا الخضار و الفواكه ممتازة

زبدة الفول السوداني مع العسل على قطعة توست ممتازة للصبح

قللي الحلويات و الكاكاو لمرة وحدة باليوم

الألعاب ما عندي فكرة عنها وايد

بس تفيدهم الألعاب اللي فيها صور متشابهة

تعطينه قلم يلون بس تكونين معاه لا يحط القلم بحلجه ولا يحوش عينه

 

[د. رشــا الصفــي]

يعطيج العافيه دكتورتنا
شنو احسن نوع فيتامين اقدر اعطيه ولدي عمره شهرين ويرضع طبيعي وبس رضعه وحده في اليوم صناعي
ومشكوره

عرضيه للشمس كل يوم ساعة و انتي اهتمي بتغذيتج من الخضار و الفواكه و اللحوم و ما يحتاج فيتامينات

اذا تبين ممكن تعطينه mix-vit نص قطارة مرة باليوم

 

[د. رشــا الصفــي]

يعطيج العافيه دكتورتنا اعذريني عندي سوال بعد محيرني واعتقد اهم سوال متى اقدر اقطع من طفلي السونقلير ويكون با التدريج ولا عادي

الدكتور المعالج اهو اللي يقرر متى يوقف

و ممكن يتقطع مرة وحدة عادي ما يصير شي

بس الاغلبية تحب بالتدريج علشان نخاف ينتكس الولد فجأة

فنوقف بالتدريج

 

[د. رشــا الصفــي]

مشكوووره دكتوره

عسى ربي ينولج الي اتمنينه

اللهم آمين

جزاج الله خير حبيبتي

 

[د. رشــا الصفــي]

عندي استفسار ثاني

الاكزيما ممكن تطلع بسبب الاكل ولا خام الملابس وويحتاج اوديه للطبيب لان طلعله بفتره وايد
بس الحين خف وماكو الا جم حبه بالويه ؟

الاكزيما ممكن تطلع بكل شي قلتيه و احيانا بسبب اشياء ما نعرفها

و اذا خف ماله داعي تودينه الطبيب

انا شخصيا احس ان في حالات الحساسية الام تعرف احسن من الطبيب شنو الاشياء اللي تحسس ولدها

الدكتور للعلاج بس

 

[د. رشــا الصفــي]

تسلمين دكتورة ما قصرتي ريحتي بالي

الله يسلمج ما سوينا شي

 

[د. رشــا الصفــي]

السلام عليكم

يغيت اسال انا بنتي 30\1 ان شاءالله تكمل سنه
بس لي الحين ما تحبي ولا توقف ولا تمشي

هل هذا يعني فيها شي ..

معنى نسوف ريلها طبيعيه ولما احطها بالدرايه تشاخط فيها حبيبتي
بس لي الحين ما تحبي ولما احطها على بطنها تبجي ماتحب
وبس تفتر واهيا بمكانها

طبيعي الوضع ؟؟

لا تحطينها على بطنها تعصب

خليها قاعدة و حطي الالعاب بعيد شوية عنها تتعلم شلون توصل للأشياء

شيلي الدراي و بتلاقينها سوت كل شي

الله يخليها لج يا رب

 

[د. رشــا الصفــي]

السلام عليكم دكتوره
يعطيج العافيه
دكتوره بنتي عمرها سنه وشهرين والى الحين ماتنام نومه متواصله يعني تنام 11 بالليل او 11 ونص وممكن تقعد 5 الصبح او 6 ومو متواصله يعني يمكن تقعد 5 او 6 مرات خلال هالنومه تقعد تبجي ولما اشيلها تسكت وتنام وهكذا مادري شنو الحل وحتى عدد الساعات اللي تنامها شويه يعني مو المفروض الطفل بهالسن ينام 12 ساعه متواصله؟ اهي يمكن لونجمع الساعات مع بعض يمكن 7 ومتقطعه والعصر يمكن ساعتين واحيانا اقل والله خايفه عليها ومفكره اوديها الدكتور عشان هالسبب بس قلت باخذ رايج بالاول
وامس قعدت اراقبها واهي نايمه احسها وايد تتحرك وجنها تكون متضايقه مع انها ماتبجي وايد

صعب تلاقين طفل ينام 12 ساعة متواصلة استحالة تقريبا

اقل ما فيها يبي يرضع مسكين

كونها تنام الساعة 11 و تقوم 5 او 6 هالشي طبيعي لأنها تكون جاعت و تبي حليب

و اللي بالنص لما تقوم لا تشيلينها و تلفين فيها و هي بسريرها دبخيها لما تنام

تأكدي انه ما يكون جو الغرفة حار ولا بارد و ان حفاظتها نظيفة و البيجامة مريحة

احيانا نغفل عن هالأشياء البسيطة

ما تحتاج طبيب و لا شي

بس انتي بالليل لا تنومينها مبجر و لا تنام بعد الساعة 5 العصر

 

[د. رشــا الصفــي]

يعطيج العافيه دكتوره
انا بنتي عمرها شهر ونص ولما ولدتها كان وزنها 2.400 والحين 4.200 وزنها زين حق عمرها؟
تخرج مره وحده باليوم طبيعي بس مو سائل لا عادي؟؟
عادي بهالعمر الياهل كله يبي ينام لان بس تقعد ترضع وابدلها العبها شوي وترد تنام كله دايخه بتنام؟
الفطريات اذتهها استعملت ريانست خفت اسبوع وردت استعمل جل هم نفس الشي شسوي؟

وزنها ممتاز حاليا تبارك الرحمن

و الخروج طبيعي

عادي انها تنام اكثر من وقت قعدتها بهالعمر

طالما تقوم تشرب رضعتها و تلعب شوسة ترد تنام

بالنسبة للفطريات لازم تعقمين الرضاعات و المصاصة عقب كل استعمال لأنهم يتلوثون بالفطريات و كأنها تعادي روحها

و اذا ترضع طبيعي استعملي كريم للفطريات على الحلمة و تغسلينه قبل الرضاعة

 

[د. رشــا الصفــي]

وسؤال ثاني دكتوره بالنسبه للاكل
مثل ماقتلج بنتي عمرها سنه وشهرين واعطيها حليب كل 6 ساعات
واوكلها للريوق توست وجبن او توست وبياض البيض او فول
والغدا عيش وروب او مرق بطاط شوي دياي او لحم
والعشا خضروات مسلوقه او بيتزا اسويها بنفسي يعني صلصة طماط مع شوي جبن وزيتون فوق التوست او باستا مع جبن سائل او شوربة الشوفان مع الخضروات او سلطة فواكه
شنو ممكن اعطيها عشان انوع لاني احس تقيدت باللي اعطيها اخاف اعطيها شي يكون مو زين
اهي الحمدلله وزنها زين

تبارك الرحمن نظامها يشوق عليها بالعافية

ما تحتاج تغيرين نظامها متكامل و منوع

و ممكن تجربين لها اي شي الحين ماكو شي مو زين لها انتي جربي و راح تتعرفين بروحج

 

[د. رشــا الصفــي]

مشكوره دكتوره على تعبج معانا وعساه بميزان حسناتج
دكتوره ولدي قلت لج عنه انه يرجع حييييييل ووديته الطبيب وكتب لي حليب نوفالاك للارتجاع والحمدلله تحسن شوي وخف الترجيع شرايج استمر على هالحليب على طول واللا ارجع على السيميلاك وانا اعطيه رضعتين باليوم والباقي طبيعي
وعندي سؤال ثاني ولدي يخرج باليومين مره وحده بس عادي؟
ويعطيج الف عافيه

اللهم امين حبيبتي

تسعدني دعواتكم

بالنسبة للحليب استمري عليه احسن و ما يفرق عن الحليب العادي من ناحية الفايدة و القيمة الغذائية

و استمري على الرضاعة الطبيعية

و الخروج طبيعي اذا ما تحسينه متأذي و بطنه ماسك

 

[د. رشــا الصفــي]

شلونج دكتوره ان شاء الله بخير
دكتوره ولدي الحين عمره عشر شهور يصير اعطيه لحم سمك
قاعده اعطيه دجاج مع بطاط وطماط واخلطهم بالخلاط ملاحظه عليه الحساسيه وجه يقلب احمر
رحت الصيدلي عطاني كريم فيه كرتزون عادي استخدمله لperderm *cream
هذا اللي عطانياه اقطع الدجاج عنه مو عارفه تحس من منو الطماط او الدجاج
مشكوره يادكتوره على تعبج معانا

ممكن لحم

السمك بعد السنة

وقفي الطماط ممكن هو الي مسبب له الحساسية

باندريمممتاز تقدرين تستخدمينه يومين و توقفينه

غالبا تحسس من الطماطم

حياج يا قلبي ماكو تعب ولا شي

 

[د. رشــا الصفــي]

السلام عليكم ورحمه الله وبركاته

الله يعطيج العافيه دكتوره وعساج على القوه وحمدلله على السلامه

دكتوره بنتي بالشهر الرابع للحمدلله خفت المغص والتعصر بس الغازات معاها بس للحين ماتخرج الا يوم وترك ومرات يومين وحليبها ابتاميل 1

اذا مو منزعجة هي من الموضوع عادي طبيعة بطنها جذي

ودكتوره مرات يوم تخلص رضعه واطبطب لها علشان تترع مرات ترجع مع التريوعه هل هالشي طبيعي ؟؟

نعم طبيعي

هل اقدر اوكلها الحين العيش المهروس - البطاطا ولا لأ ؟

لما تكمل 6 شهور

وأمي تقولي لازم ابده اذوقهاا بطرف اصبعي اي نوع من الاكل علشان تحب الاكل يوم تبدي تاكل وماتستغرب الاكل اشرايج بالكلام ؟؟

كلامها صحيح بس مو وجبات كملة الا بعد 6 شهور

وشنو تنصحيني بالعمر اعطيهاااا ؟؟

حليب بس

وسامحيني على الاطاله .

حياج الله

 

[د. رشــا الصفــي]

دكتوره نسيت اسألج ولدي اسم الله عليه حركي حيل عمره عشر شهور
ممكن يأثر عليه مايخليه يركز
سؤال دكتوره كثره الفيتامينات يعني فيتامين ويتم معاه كل شهر يضره طبعا بوصفه الدكتور
الفيتامينات ضاره ممكن تضر الكله يصير اعطيه بهالعمر والا موزين

انا بصراحة ما اشوف داعي للفيتامينات اذا الطفل دمه و وزنه زين و حركته طبيعية

كثرة الفيتامينات مو زينة

و كثرة الحركة بهالعمر طبيعية يكون بعمر الاستكشاف بس ديري بالج لا يتعور ولا يغص بشي

 

[د. رشــا الصفــي]

السلام عليكم دكتوره

اسفه يننتج بأسئلتي.. بس انا ما اثق الا برأي الدكاتره..

لما اسوى كميه من اكل البيبي و احطه بالفريزر جم يوم اقدر احطه؟؟؟

والبيبي بعمر 7 اشهر جم وجبه ياكل؟؟

واللحم و الدجاج متى ابتدى اوكله؟؟

افضل كتاب لاكل الاطفال؟؟

و فيتامين د ؟ تنصحين فيه؟؟

ومشكووره وايد..

الأكل بالفريزر تقدرين تخلينه 3 ايام

البيبي بعمر 7 شهور ياكل وجبتين تقريبا

اللحم و الدجاج من الشهر التاسع

بالنسبة للكتب وايد اكو بس اسمع يمدحون كتاب د. ريم قنواتي

ممكن تلاقين مجموعة كبيرة من الكتب بمكتبة جرير اي تسوين سيرج بالنت عن وجبات الاطفال

و بالقسم في مواضيع متعددة للوجبات و التغذية شفتهم مجمعينهم بدليل قسم التربية و الطفل جيكي الموضوع فيه شغلات زينة

 

[د. رشــا الصفــي]

السلام انا عندى مشكلة بنتى عمرها سنة ونص واااايد اتصرخ وتبشى

عاد حبيبتي بهالعمر وايد يبجون و يصارخون

اتوقع محد يصارخ و يبجي كثر بنتي

:eh_s(1):

طبيعتهم تصير جذي
ياخذون اللي يبونه بالصراخ لأن ما يعرفون وسيلة ثانية للحصول على الشي

المطلوب منج انج تكلمينها بهدوء و تقولين لها

لا تصارخين (( بدون ما تصارخين انتي ))

و تخلينها تراويج شنو تبي و تسوينه اذا هالشي مسموح بالنسبة لها و اذا غير مسموح

تكلمينه بهدوء انه هالشي لأ و ما يصير

انا اسوي جذي مع بنتي و خفت الحمدلله

قامت تفهم ان ما ناخذ كل شي بالصراخ و البجي

 

[د. رشــا الصفــي]

شلونج دكتوره ان شاء الله بخير

دكتوره ليش طفتيني
دكتوره ولدي الحين عمره عشر شهور يصير اعطيه لحم سمك
قاعده اعطيه دجاج مع بطاط وطماط واخلطهم بالخلاط ملاحظه عليه الحساسيه وجه يقلب احمر
رحت الصيدلي عطاني كريم فيه كرتزون عادي استخدمله لperderm *cream
هذا اللي عطانياه اقطع الدجاج عنه مو عارفه تحس من منو الطماط او الدجاج
مشكوره يادكتوره على تعبج معانا

دكتوره نسيت اسألج ولدي اسم الله عليه حركي حيل عمره عشر شهور
ممكن يأثر عليه مايخليه يركز
سؤال دكتوره كثره الفيتامينات يعني فيتامين ويتم معاه كل شهر يضره طبعا بوصفه الدكتور
الفيتامينات ضاره ممكن تضر الكله يصير اعطيه بهالعمر والا موزين

ما طفتج حبيبتي

ما جاوبت احد هالاسبوع توني ارد اليوم بس