روايات الكاتبه ساره الدريس

[بدوره 22]

شلونكم بنات













منو فيكم قرت كتبها ؟


هي عندها 3 روايات ...


الاولى : الى جرحي الحبيب مع التحيه


الثانيه : على عتبات الرذيله


الثالثه : خدوش على وجهه إمرأه


وشنو رايكم فيهم ؟؟


انا شريت لها اول كتابين وكانوا باللهجه العاميه كانوا زينين بس انصدمت من الثالث !!!!!

كتابها الثاني على عتبات الرذيله .... كان بالعاميه ...


اكتبت الثالث ... هي هي نفس القصه بس باللغه العربيه !! وغيرت اسم الكتاب !


الصراحه كلش ما حبيت هالحركه ..

انتوا شرايكم ؟؟

 

[بدوره 22]

الظاهر بس انا الي قاريه كتبها

 

[نووونتها]

هلا حبوووبه
آنا قريتلها أول كتاب ألى جرحي الحبيب بصراحه اللي شوقني فيه كتابتها بالعاميه بس ولا القصه زوينه يعني
اهي رفيجة أختي بالجامعه ويوم نزلت كتاب جرحي الحبيب باعته لأختي بالكليه يحليلها خوووش بنت وعسى الله يوفقها

 

[:: Diva ::]

ما حبيت اصداراتها كلشششششششششششششششششششششششش
الاول مع جرحي حده مضيعه وقت
الثاني ما قريته
الثالث شريته و انا كلشش مو مقتنعه بس عجبني الغلاف
لووووووول
و لما قريته كان وايد احسن من الاول بس نهايته مو شي
يعني يبي لها تتدرب اكثر
و تنسى سالفة العاميه !!
و تشتغل على النهايات عدل و تعطي كل فكره حقها و ما تسهب بنقاط ما تستحق الاسهاب
لكن كطاقه فماشالله عليها نشيطه

 

[بدوره 22]

هلا حبوووبه
آنا قريتلها أول كتاب ألى جرحي الحبيب بصراحه اللي شوقني فيه كتابتها بالعاميه بس ولا القصه زوينه يعني
اهي رفيجة أختي بالجامعه ويوم نزلت كتاب جرحي الحبيب باعته لأختي بالكليه يحليلها خوووش بنت وعسى الله يوفقها

الله يوفقها ونتمنى لها كل خير اكيد

 

[بدوره 22]

ما حبيت اصداراتها كلشششششششششششششششششششششششش
الاول مع جرحي حده مضيعه وقت
الثاني ما قريته
الثالث شريته و انا كلشش مو مقتنعه بس عجبني الغلاف
لووووووول
و لما قريته كان وايد احسن من الاول بس نهايته مو شي
يعني يبي لها تتدرب اكثر
و تنسى سالفة العاميه !!
و تشتغل على النهايات عدل و تعطي كل فكره حقها و ما تسهب بنقاط ما تستحق الاسهاب
لكن كطاقه فماشالله عليها نشيطه

الثاني نسخه من الثالث بس الثالث باللغه العربيه

فعلا هي نشيطه والله يوفقها


لاحظتي ان البنت الي على الغلاف تشبهها ؟؟

اعتقد ان هي بعد مو تشبهها

 

[:: Diva ::]

انا هذا الي خلاني اشتري الكتاب لووووووول
لان صورتها الشخصيه و علشان جذي شاكره الرسامه

 

[ذكريات]

انا قريت الثاني

بس جم صفحة و هديته بصراحة مو حلو و ما يشجع انج تكملينه

و جملة بالكويتي و جملة بالعربي !!!

و اسلوبها عااااادي جدااا جداااا

و شوفي الكلام اللي كاتبته على غلاف الكتاب من ورا ... انا حبييييت ... و حبييييت .... فحبيييت .....

كل الفقرة حبيييييت !!

 

[~q8ia~]

انا شفت غلافها يشد بس ما شريتهم

 

[pama girl]

اول مره اسمع فيها..

 

[بنت الاجواد]

انا قريت رواياتها كلهم

الروايات تهبببل


الثالثه اللي عادتها انا سألتها ليش عدتيها ؟ قالت لان في ناس قالو انها ما تعرف تكتب باللغه العربيه

و تقول تحديتهم و تحديت نفسي و عدت كتاباتها و مغيرت تفاصيل ترى و زياده تفاصيل من عندها

حيل احبها هالبنت الله يوفقها

مع اني ما اشوفها الا بالمعارض بس مبين عليها خوش وحده


الله يوفقها

 

[بدوره 22]

حسافه جان زين تحدتهم بكاتب ثاني

يعني ليش اختارت انها تعيد صياغة نفس القصه !


الله يوفقها واتمنى لها كل خير


انا التقيت فيها مره وحده بالمعرض ووقعتي لي بعد هالكلام كان السنه الي طافت

 

[rawona]

هلا بدوره شلونج؟؟ شخبارج؟؟



من زمان عنج؟ .. وشلون اميراتج؟




بالنسبة للموضوع انا قريت لها الكتاب الاول إلى جرحي الحبيب مع التحية .. يعني كان عادي ..

شفت لها بالمعرض هالسنة كتاب اتوقع الاصدار الثالث لها "خدوش على وجه إمرأة" وما فكرت أخذه .. مادري اذا حلو والا لا بس ماكان مودي اقرأ شي لها خصوصاُ اني ما احس انها تبتكر شي من عندها ومعتمدة على قصص واقعية عادية في الكتابة ..


عموماً الله يوفقها وان شاءالله تنزل اصدارات اكثر تشويق ..


يسلمو :tek:

​

 

[بدوره 22]

هلا وغلا رووووونه

عطرتي موضووعي والله


الحمدلله انتي شلونج ؟؟ اميراتي بخير عسى اميراتج بخير يارب ؟


اجازه ممتعه رونه

 

[Shiny Star]

أنا عندي إصدارها الأول ( إلى جرحي الحبيب مع التحية)

وإصدارها الثالث ( خدوش على وجه إمرأه )

أنا شخصيا ما أفضل أقرأ بالعامية عشان جذي يمكن ما عجبني الكتاب الأول بالإضافة الى إن أسلوبها وايد عادي يعني ما يشد

أما الإصدار الثالث شريته بمعرض الكتاب هالسنه ... ولما قريته ما قدرت ما أكمله ... حبيت أعرف شنو راح يصير ... بس للأمانه الرواية جدا موحشة لي درجة إني حسيت بعدم الأمان وكأن إحنا عايشين بغابة .... وايد أثرت فيني القصة بشكل سلبي وما حبيت اللي صار فيها ...

وعندي عتب عالمؤلفة ... فعلا صورة الغلاف حيل تشبه المؤلفة ومع هذا كانت الرواية تمس أخلاقيات بطلة القصة ... يعني ما حبيت هالحركة كلش

عالعموم الله يوفقها يا رب

 

[loleetaa]

السلام عليكم
أنا أول مره أشارك بالمنتدى
أنا قريبه من ساره الدريس حيل
و للتوضيح
صوره الغلاف مو اهي
هي اصلا مختاره الملامح من ممثلات
و هذا الخشم خشم بروك شيلدز
و العين عين ممثله ايرانيه
دوره الوجه هي نفس ساره و الشامه

البنت أخلاق ولا أروع
محترمه و خلوقه و ملتزمه

القصه عباره عن حاله خاصه مالها علاقه بأخلاقيات الكاتب أبدا
يعني مثلا
لو انا اكتب عن حرامي مو بالضروره يكون الكاتب حرامي سابق!!!!

إلى جرحي الحبيب كان كتابها الأول
و اهي ابروحها تقول ان التجربه مبدئيه و بسيطه

اما على عتبات الرذيله و خدوش على وجه امرأه
نفس الشي صحيح
الأول عامي و الثاني سوته فصحى
و انا سألتها ليش ما سويتي كتاب جديد
قالت تحديت فيه
لو جبت قصه جديده كليا بيقولون مو هي اللي مألفته
فسويت نفس الكتاب فصحى
و للأمانه اللغه العربيه عندها عاليه جدا
و البنت مثقفه و رزينه و بصراحه بحياتي ما شفت انسانه راقيه بتعاملها مع الناس مثلها
والله انفعالاتها جنها بيبي
بس حرام والله اللي يقولونه الناس عنها
لو كل وحده تكلمت عنها شافتها فعلا بالواقع
والله راح تندم على اللي تقوله عنها
هي أصلا لما تشوف الكلام تبتسم و ما تقول الا حسبي الله و نعم الوكيل
انا فعلا احب هالانسانه

 

[:: Diva ::]

هي أصلا لما تشوف الكلام تبتسم و ما تقول الا حسبي الله و نعم الوكيل
انا فعلا احب هالانسانه

تتحسب على الي ينتقد اعمالها ؟!!!!؟؟؟؟!!!

 

[][ الميـــــــار ][]

عاد توني قارية اصداراتها وقلت بسأل بشووف بس ما شجعتوني يمكن أشتري آخر اصدار لاني ما احب الروايات اللي بالعامية وااايد

 

[rawona]

بدوره أنا و أميراتي بخير ..


رجعت من إجازتي ب متكيسلة بتغيير التوقيع ..


من زمان عنج يبيله نتيمع ونسولف لووول



​

 

[Little_Queen]

انا داشه بناقش الموضوع ..
لقيت شي ثاني ..

اختي لوليتا .. بما انج " قريبة " من سارة الدريس .. ياريت تقولينلها ان الناس من حقهم ينتقدون بالايجاب و بالسلب ..

و ان النقد البناء شي زين لها .. مو شي مو زين !!!

اما انها تقول حسبي الله و نعم الوكيل !! فهذي قضية غريبه ..

دام انها ما تبي احد ينتقد كتاباتها .. ليش من الاساس تطبع كتب ؟؟؟؟؟؟؟؟؟؟؟؟؟؟؟؟؟؟؟؟؟؟؟؟

الي يقرر انه يطبع كتاب و ينزله المكتبات و يرضى كل الناس تقراه لازم يستحمل آراءهم سواء معاه أو ضده

و ماله شغل كتابات الانسان بشخصيته


يعني اوكي انا اعرف سارة .. و اهي خوش انسانه و شخصية زينه

هل هذا يعني اني لازم اجاملها في كتاباتها ؟؟؟؟ ! و ان بما انها انسانه زينه عيل لازم كتاباتها تكون زينه ؟

و ان اذا شخص شخصيته زفت .. اذن كتاباته لازم تكون زفت ؟؟

!! ؟

مادري ياريت توضحين لنا وجهة النظر هذي عزيزتي لوليتا

و توصلين تمنياتنا بالتوفيق حق سارة الدريس


و بصراحة انا قريت لها كتابها على عتبات الرذيله .. و قريت شوي من " خدوش على وجه امرأه "

الروايتين الاولانيتين اصلا كنت رافضتهم الى حد ما لانهم بالعامية .. و عندي رأي شخصي ان الكاتب الي فعلا يحب الكتابه لازم يحب لغته الام اصلا و يحاول يرفع من شأنها .. فالعاميه بالنسبة لي مرفوضه في الكتابات الادبية .. ممكن اكتب جمله .. حوار .. مقطع بالعامية

اما ان الرواية من الف الى الياء تكون عامية .. كان عندي تحفظ على هالشي

اما الرواية الاخيرة ..

باتجاهها الى اللغه الفصحى اعتبرها نقطه نضج من الكاتبه و شي يحسب لها

بس هي بحاجه الى قراءة و تطوير لاسلوبها شوي

بس اوافق اختي ديفا باللي قالته .. طاقتها حلوة و يبيلها شوي شغل على نفسها ..