سنعة وحبوبة
New member
- إنضم
- 2 ديسمبر 2009
- المشاركات
- 48
- مستوى التفاعل
- 0
- النقاط
- 0
بصراحة
ماكان ودي أضايقكم بحياتي ومشاكلي
أول شي لأني أحبكم
ثاني شي لأني فعلا تعبت
الحمد لله على كل حال
انا والده من أسبوعين وهذا سادس نفاس لله الحمد وأول مره أقضي نفاسي عند زوجي
مادري شقولكم أستغفر الله
عايشه هم وماكله هم حتى الهوا اللي أتفسه هم و غم
ياربي تغفر لي
تعبت من الكبت
تعبت من الظلم
تعبت من الهوان
مابيدي إلا حسبي الله لا إله إلا هو عليه توكلت وهو رب العرش العظيم
قبل شوي دزيت لزوجي مسج من موقع بالنت
كتبته بالإنجليزي
آي لف يوم آي مس يو
وماكتبت اسمي طبعا كان قصدي غشمرة لكن للأسف الغشمرة البريئة ماهقيتها توصل لهالمواصيل
حبيت أنوّه ان في سنوات زواجي الأولى كنت ألاحظ نظرات زوجي للفلبينيات وأستغربها
بس الظاهر إني ساذجة أو إني أتغابى بصراحة ما أدري
انا بنفسي ضايعه
ماقولكم تعبت
الحمد لله على كل حال
و شفت بعد عنده أسامي مثل روز وطقتها
بس انا من بداية زواجي وانا حملت على طول
فما اكتشفت بلاويه إلا وانا عندي منه عيال
ولأني متعقدة من طلاق أمي وأبوي فتمسكت بزوجي بكل عيوبه وعيوب أهله خاصة أمه
لاحول ولاقوة إلا بالله العلي العظيم
انا قمت ألهّي نفسي بالحمل والعيال
هروب من ظلم الزوج وأهله
وبصراحه ماواجهته في بلاويه لأنه للأسف جاهل ولئيم أدري بتقولون شلون تقولين على أبو عيالج جذي بس هذا الواقع شتبوني أسوي؟؟؟
أستغفر الله وأتوب إليه
القصد لما أواجهه ممكن يقطني انا وعيالي ماتفرق معاه بالعكس هذا عز الطلب عند أمه لأن شوره بإيد الوالده المحترمه وإهي متضايقه مني ليش لازعل ولاعتب وعايشه بهدوء كافيه خيري شري فآنا مو من شاكلتها علماً انها قبلي طفّشت بنت عم زوجي بظرف شهرين الله وكيلكم يعني انا بالنسبه له الزواج الثاني
المهم التفاصيل متعبه أكثر من الموضوع الأساسي
الموضوع إني دزيت له المسج اللي قلت لكم آي لف يو آي مس يو فلان بس ماكتبت إسمي
توقعت انه بيعرفني من أسلوبي والله ماهقيت الا هالهقوه انه بيعرف أسلوبي ويدق
لأني معودته على الإهداءات بالموبايل شعر ودلع وهالسوالف :eh_s(10):
لاتضحكون علي أبي أغيّره وأبي نعيش حياة طبيعية مثل أي زوجين لكن للأسف....مو كفو
المهم المسج توقعت بعدها يدق تأخر ما دق رحت آنا دقيت ويعطي خطه انتظاااااااار مو عادته ترى
أثاري الاستاذ استانس بالمسج اللي وصله وطاير من الفرحه وراح يدوّر من منو وشلون يعرف المرسله
الشكوى لله
وانا أدق عليه وأهو انتظار
بالموت فك الخط وكلمته وانا أضحك قلت له شفيك طولت بالمكالمه وصلك المسج
أهو أنذهل أي مسج شقصدج
قلت له المسج اللي بالانجليزي من الموقع انا دازته لك لايكون على بالك وحده من اللي انت خابر
أهو مره صار بينا مواجهه ولقيت عنده رقم بخطي اللي كان يستعمله مؤقت وكان الرقم لشاكلة روز وربعها
المهم أهو ثار وهاج قال بتختبريني قلت شكو أختبرك انا على بالي بتعرف أسلوبي
أهو ليش ثار؟؟ لأني أحبطته لما عرف انه مو اللي أهو يبيهم
بنات صعد علي وناداني بالدار ومد إيده عشان هالسالفه عسى الله يتقاضى لي منه ماتوقعت يصير فيني جذي
وقعد يسب بأقبح الألفاظ
حسبي الله فيه ونعم الوكيل
انا من الصدمه قلت حسبي الله فيك ونعم الوكيل هذا وانا نفاس ياويلك من الله
ماقدرت أعلي صوتي خفت عيالي يسمعون عيالي صغار بالإبتدائي
ولما طلع قال كل يوم بعاملج بهالطريقه وقام قال كلمتين سب جدام بنتي اللي بالروضة
البنت انصدمت وطلع منتصر وفايز
وانا قعدت بداري أبجي قهر و هوان أول مره يمد إيده ومابينا شي
البنت لما راح قالت لي ماما ليش بابا قالج جذي
ياربي أستغفرك وأتوب إليك
لا ويقول ترى المره الثانية أطقج جدام عيالج :eh_s(2):
رجاءً خواتي اللي تبي تلومني على شي خل تتذكر إني أم أتحمل عشان عيالي شسوي
واللي تقول قولي لأخوانج وأهلج ترى زوجي من النوع اللي مايحشم أحد ولايستحي ممكن يسب فما أرضى لأهلي انهم يتعرضون لهالموقف بسبتي
أدعو لي
حتى أمي وخواتي ما كلمتهم خفت أنهار لما أكلمهم وأبجي مابي أضايق أهلي
ماقولكم تعبت ؟؟
حسبي الله هو حسبي ونعم الوكيل نعم المولى ونعم النصير
