قوه بنات ...انا اراجع عند ماجده اليتامى ..بس اخاف تكشت فيني و انا بولد بالسلام فقلت اشوفلي دكتورة تولدني هناك اذا دكتورتي مايت
و بعد الاستخاره و عقب ما قريت موضوعكم لين طاح حنجي ...قلت حق بعلي ودني حقها خل اشوفها ...و رحت لها بصراحه الانطباع الاول واايد حلوو ...مانطرت وايد ..مو مثل ماجده عادي 3 ساعات تنطرين ...ولما نادتني علشان تقيس الضغط و الوزن ..بصراحه الميزان ضحكني ما ادري من وين مطلعينه الناس تطورت المفروض ميزان دقيق مو هذا !!....وعطتني قلاص حق تحليل البول تكرمون ..القلاص مو معاه غطا وبغى ينكت !! بس هالاشياء ماغيرت رايي فيها ...ورديت قعدت مع بعلي بالانتظار ...و هدووء و مافي ناس وايد ..حده ريلاكس مافي صوت الا صوتي و صوت ريلي نسولف و الناس نخزز فينا لوووول
عقب يه دوري ...دخلت على الدكتورة ..اول شي بط جبدي انها ماسلمت ..بس قلت يمكن عادي ...لاهيه و لا مشغوله لانها كانت مع دكتورة ثانيه باكستانيه ...و على طول بدت الاسئله ..و جاوبتها ...و قالت يالله نسوي سونار ..اهني عندي تعليق :
دخلت و بروحي ركبت الفراش و رفعت هدومي ..و حطت السونار و شخطت على بطني و ماقالت شي ..انا الي كنت اقولها هذي ريولها وحلات فخوذها و هذي عيونها ...و اهي عادي عندي حتى ماجاملت فرحتي ببنتي ...هم اقول عادي ..و قلت لها دكتورة ترى بطني يعورني ..تقولي مافيج لا طلق و عنق الرحم مصكوك ..قالت يمكن قولون ..و عطتني كريم مساج حق القولون !!!!! توني ادري انه الكريمات تنفع حق القولون ؟؟!!!
و قالت يالله تعالي هناك ...طبعا اهي كانت تشرح حق الباكستانيه الي عندها ..حسستني اني فار تجارب
طبعا الجل محد مسحه ..و لا عطتني كلينكس علشان امسحه !!
و رحنا الغرفه ...و قلت لها دكتورة ترى انا من اول حملي و انا مريضه من نشله و ربو و حساسيه ..ووايد اعاطس و دكتورتي عطتني هالدوا ... و قالت لي عيل لما تعطسين تبولين على روحج !!!!!!!!!!!!!!!!
قصت ويهي جدام ريلي ..نزلت راسي و سكت و حطيت عليها اكس ...احرجنتي الله يهداها
و قلت حق ريلي اشرايك ..يقولي انتي الي بتولدين مو انا ..و المشكله انه تصير حق ريلي
...و خلاص شكلي ماابي اروح لها ..
و بصراحه شفت فرق واضح بالعنايه عند عياده ماجده
1- طبعا مليون سستر عندها مو مثل امل بس ثنتين ...وحده تقيس الضغط والوزن ووحده تقعد معانا بالسونار
2- عند ماجده لما اراجع ..اول ما ادش السستر تمسكني و تقيس ضغطي ووزني و تحليل بول ...و تاخذني حق غرفه السونار ..و تساعدني على صعده السرير ...و ترفع هدومي و تلحفني و تجهزني على ما تيي الدكتورة .
3- بالسونار تشرح لي الدكتورة ..هذي ايد و هذي ريول و هذا قلب و هذا السائل و تقولي جم الوزن و كل شي بالتفصيل ..و تصورلي صورتين و لا ثلاث و تعطيني اياهم ...امل ماعطتني صورة بنتي
4- سونار ماجده وااااااااااايد اوضح من امل ..كنت اشوف اشابيه بنتي عدل ..عند امل بس شكل الراس و تقولي قاعده تطالعنا ...و ما اشوف الا سواد ما يبين شي
5- عند ماجده لما اسوي سونار في شاشه اطالع منها كل شي ما افر راسي و تنقص رقبتي علشان اطالع
بنات ماابي احكم عليها ...يمكن كان عندها شي و لا مشغوله ...او يمكن لانه فرق علي تغيير العياده و المعامله
كل العياده بكوم ...و تبولين على روحج كوم ثاني
