مساء الهنا وراحة البال
حبيت اعتني بأظافري شوي
خاصة اني عندي عادة سيئة اني احط الحنة من غير قلفز ...مسويتها أكثر من مرة
ولما احط مناكير وقت عدم الصلاة ماحط طبقة أساسية حماية واخليه مرات أكثر من يوم
طبعا كل هذا يأثر على بياض الظفر نفسه
أول شي
قبل ما نبلل اليد اقص اظافري أنا خلقة ماحب الأظافر الطويلة كثير
بعدين بردت الأظافر بمبرد كرتون موحديد ... الحديد مو زين يخلي الظفر ضعيف وينكسر بسهولة
غسلت يدي ونظفت الظفر زين بالفرشاة حقت الأظافر ..الي ماعندها تستعمل فرشاة أسنان قديمة
نقعت أطراف أصابعي فقط في عصير ليمونة مخففته بالماي ...يعني مايعدي السائل مستوى الظفر
حوالي خمس دقايق أو اقل حتى
وبالبتاعة مادري شسمها دفيت الجلد الزايد حوالين الظفر لداخل ..لا تشيلونه مو زين ..هوحماية ربانية للظفر من الفطريات والبكتيريا
لكن لما تدفونه على ورى لجلدة الاصبع بيطلع شكل الظفر أطول من الحقيقة وهذي حركة حلوة للي اظافرها قصيرة خلقة ومربعة
شوي بيكربونات الصوديوم مع ليمون ..يطلع رغوة اول ماتحطون الليمون ..تفاعلات وناسة لووول
اضفت نقطة معجون أسنان مبيض ..اي معجون مبيض في البيت ..لكن نقطة بس
خلوا الليمون والبيكربونات أكثر منه
وخلطته زين
هذي الخلطة تبيض الظفر نفسه , تلين ال cuticle الي هو الجلدة حوالين الظفر , تلمع الظفر
ممكن نستخدم المعجون بروحه حتى لكن الخطلة أقوى وأحسن
اخذت من الخلطة نقطة وحطيتها على نص الظفر وقعدت ادلك المنطقة بشكل دائري ومع التدليك تتحفز منطقة أسفل الظفر علشان يطول بشكل اسرع لانه بيتحرك الدم في كل المنطقة
والي اظفرها شوي طويل تحط حتى من اسفل الظهر
قعدت ادلك يمكن دقيقتين أو ثلاث
بعدين جبت قرص من اقراص تبييض أطقم الأسنان ( يستعملونه عادة الشياب الي أسنانهم طايحة ومركبين طقم )
تلاقونه في اي صيدلية ..سعره رخيص حوالي 22 رايل ..وفيه 32 حبة ..كل اسبوع حبة واحدة فقط يعني تطول العلبة عندك
هذا شكل الحبة الواحدة
فايدته انه يبيض , يقتل البكتيريا ,يزيل البقع ( نفس المكتوب على العلبة ) ..نفس الفوايد لطقم الأسنان بنحصلها للظفر
حطيت الحبة في الماي ..تاخذ دقيقة وتذوب ويمكن اقل بعد
هنا لما ذابت تماما
نقعت أطراف أصابعي في السائل حوالي خمس دقايق
بعدها غسلتهم ونشفتهم
سويت لهم بف ...طبعا بحنية علشان مايصير الظفر رقيق ...بيعطي لمعة حلوة كثير
ودهنت كل يدي بزيت اللوز المر وبعد شويتين رطبتهم بالكريم
الأظافر ابيض بمراحل يجنننون ماشاء الله لاقوة إلا بالله ..كاني رايحة صالون
الي ماتبغى كل هالمراحل مع انها ماتاخذ حتى عشر دقايق تفرش اظافرها بمعجون أسنان مبيض أو بيكربونات وشوي ليمون وبتلاقي نتيجة مرضية
