بطاقة الاويستر Oyster Card
تعتبر بطاقه الاويستر الاسهل والاذكى والاسرع والاوفر من ناحيه المال
طبعا هالبطاقه لها عده اسعار حسب سواء تم شرائها ليوم او اسبوع او شهر او حتى سنوي
وعند شراء هالبطاقه تحددون اي zone تبون تغطيه بطاقتكم
شبكه مواصلات لندن ممدته على مناطق او زون وهالمناطق موجوده من 1 الى 6
وانا من وجهه نظري اشوف السائح لاول مره للندن مايحتاج يشتري او يدفع لحد زون 6
فقط يشتري من 1 الى 2
وزون 2 يغطي لحد مجمع الويست فيلد وسوق الشبردبوش والي يعتبرون نوعا ما بعاد عن لندن كوسط
وزون 6 يوصل لحد المطار (هيثرو)
وماتوقع احد بيطلع ابعد من جذي
هالبطاقه ممكن تشمل جزء او كل من:
• باص Bus
• الاندرقراوند Tube
• الترام DLR
• سفن نهر التايمز Thames Clippers
• القطارات Rail
البطاقه الي انا شريتها كانت لمده اسبوع شامله الباص و الاندرقراوند لحد زون 2
طبعا الي ياخذ باص مع اندرقراوند الباص يكون شامل كل الزون بس تحددون زون الاندرقراوند
البطاقه بدون رصيد تنشري ب 3 باوند
وسعر الباص والاندرقراوند زون 1 و 2 ب 25.90 باوند
وتقدرون عند مغادره لندن تردون البطاقه و تاخذون 3 باوند
طبعا البطاقه تكون مفتوحه ان شاء الله اركب مليون مره
بالطريقه هذي اذا كانت طلعاتكم وايد راح توفرون واايد
طريقه الشراء والاستخدام سهله
البطاقه تشترونها من اي شباك تذاكر في اي محطه اندرقراوند
راح يعطونكم بطاقه مع غلاف بالشكل هذا
واستخدامها سهل فقط تمررونها على الجهاز هذا
وموجود بالاندرقراوند وبالباص
استخدام الباص نوعا ما سهل اذا كنتي عارفه وين بتروحين وشسم المنطقه
والاسهل منه الاندرقراوند
سايت شبكه المواصلات واايد سهل وفي وايد خرايط تفيدكم تقدرون تراجعونها قبل السفر وتسهل عليكم
وممكن بالسايت تكتبون وين بتروحون ويعلمكم شلون توصلون المكان سواء مشي والا باص والا اندرقراوند
الموقع
http://www.tfl.gov.uk/
خرايط الاندرقراوند تحصلونها بالمحطات نفسها مع البروشرات
اما خريطه الباص للاسف ما اعرف اذا في خريطه مكتوبه او لا
خريطه الاندرقراوند
http://www.tfl.gov.uk/assets/downloads/standard-tube-map.pdf
خريطه مسهله للباص
http://vlstatic.com/assets/maps/travel_maps/bus_map2010.pdf
عاليمين في ارقام الباصات
واذا تبون تدورون مكان بالسايت هذي الطريقه
بالجزء الفوقي تكتبون انتو وين وين بتروحون
مثلا انا كاتبه اني بالماربل ارتش بروح هارودز
والجزء الي تحت يحطون لكم اي محطه فيها تصليحات او مسكره حاليا
وبعد بدال لا تكونون فاحين السايت كل محطه اذا فيها تصليحات داخلها بتشوفون لوحات ومكتوب يعني كل شي سهل
اتمنى هالطريقه واضخه ومع باجي التقرير بتوضح لكم الطريقه والي تبي اي سؤال عن الباص او الاندرقراوند
تسأل ..
