رد : مسوية جراحة فك .....قولي تجربتج هني
السلام عليكم
معلش يا بنات عارف اني بخالف قوانين منتداكم
بس لما ببحث عن دكتور أشرف مختار من جوجل مفيش غير منتداكم هو اللي اتكلم عنه
خالفت قوانينكم اني اولا شاب مش بنت وثانيا مصري مش كويتي
بس يا ريت تساعدوني لان في المرض والعلاج مفيش فرق بين ولد او بنت اكيد
انا عامل عملية في الفكين والذقن ( تاني يوم رمضان يوم 12/8 )ولظروف الشغل اضطريت اني ارجع بعد العيد
ومحتاج ضروري جدا اعمل تقويم لاني ما عملتوش قبل العملية
ونصحني الدكتور في مصر بدكتور اشرف مختار
فياريت تقولولي رقم تليفونه او بيشتغل فين وبعدين معنديش اي مشكلة اني اتوقف او اطلع برا المنتدى
وللافادة هحكيلكم عن عمليتي لانها اكبر واعقد من معظم العمليات اللي قريت عنها في المنتدى الروعة ده
المشكلة عندي كانت ان الفك العلوي كان صغير وداخل لجوا ومقعر شوية
والفك السفلي كان بارز لبرا لمسافة طويلة ( 15 ملم )
والدقن طويلة
فكانت خطوات العملية اولا تقصير وقطع الدقن وبعدين قص الفك العلوي والسفلي وقص عظم من السفلي وزيادة عظم في الفك العلوي مع تسطيحه ودي طبعا اللي الدكتور خططله
واخترت الدكتور عن طريق ان اخي طالب طب اسنان وعندي اولاد خالاتي 3 طب اسنان واعرف كتير من اصحابي اطباء اسنان فكنت اسال كل واحد فيهم واي دكتور سنان اشوفه عن احسن دكتور في الموضوع بتاعي فكان الترشيح الاكبر للدكتور بتاعي وان هو واحد من احسن 3 دكاترة في العمليات دي فمصر ان ماكنش احسنهم
فاخترته والحمد لله مع العلم اني بعد لما رحتله وارتحتله انا شخصيا ما كنتش عارف اجراءات العملية لا انا ولا اهلي غير بعد لما عملتها عشان ما اقلقش نفسي او اهلي
العملية اخدت 8 ساعات وساعة للافاقة
المفروض اني كان لازم اعمل تقويم قبل الجراحة بس لظروف الشغل والسفر فكان صعب اني اعمل التقويم قبل فالدكتور الله يباركله ظبط الامور بحيث اني اعمله بعده وده سبب استعجالي في البحث عن دكتور اشرف مختار
احب اني اقول نصيحة للي هيعمل العملية دي او اي عملية في الفك قبل لما اتكلم عن اللي حصل بعد العملية
انا قبل العملية كنت مقتنع اقتناع كامل وعلى استعداد اني اعمل العملية واتحمل نتايجها مهما كانت مع ان كان فيه مغريات كتير من جانب الاهل اني ما اعملهاش ( مساومة يعني بس ده من كتر الخوف والرعب اللي كانوا عايشين فيه )
وكتر خوفهم ده خلاني من قبل ما ادخل العملية وانا عامل حسابي اني هطلع من العملية ومهما كانت حالتي فانا مش هبينلهم اي حاجة غير اني بصحة ممتازة وراضي كل الرضا مهما كانت حالتي ( اقتناع ووهم نفسي لنفسي )
وفعلا بمجرد ما فوقت من البنج وشوفت وش والدتي وبتسالني ايه الاخبار شاورتلها بايدي ان كله اوكي ونفس الموضوع مع الدكتور والوالد واخواتي
وللامانة انا وقتها ما كنتش حاسس بحاجة نهائي ورجعت نمت تاني بس لفترة قصيرة ما تكملش نص ساعة وقمت تاني بعدها جاتلي ممرضة وقالتلي انت المفروض تتنقل على غرفتك بس عشان عندي بلغم كتير من السجاير فهنخليك في غرفة الافاقة شوية عشان يشفطوا اي افرازات وطلبت مني اتنقل على سرير في اخر الغرفة وسالتني ان كنت احب اتنقل بالسرير ولا امشي على رجلي
فقلتلها همشي على رجلي وانا بكمل الكلمة كنت نزلت من السرير ووهبتدي امشي في الوقت اللي هما بيهدوني فيه وعايزين يسندوني وانا والحمد لله ما كانش فيه احساس باي تعب وفعلا مشيت لاخر الغرفة ( حوالي 10 متر )
انا بقول الكلام ده عشان ابين ان الاقتناع النفسي اللي انا كنت حاتط نفسي فيه قبل العملية ساعدني كتير بعد العملية
وان حرصي على اني ما اتعبش اهلي بعد العملية خلاني ما احسش بالتعب فيا ريت تحاولو تعملوا كده لانه فعلا هيساعدكم
نييجي لمرحلة ما بعد العملية
انا كنت دخلت غرفة العمليات الساعة 9 الصبح وطلعت الساعة 6 وكنت فايق في حدود الساعة 7
بعد نقلي على السرير التاني فضلت فايق شوية ومتعلقلي محاليل في الغالب فيها مسكنات والحمد لله ما كنتش حاسس باي تعب غير ان نفسي صعب شوية نتيجة للبلغم اللي على الصدر من السجاير وكان كل شوية بيعملولي شفط وبرجع تمام وبصراحة كان معايا ممرضتين الله يبارك فيهم ويحفظهم لاهلهم هما اللي ساعدوني وريحوني اليوم ده
