(لهدرجة فيه قلوب ماترحم ) ...الحل برايكم ..

[(ام سارا)]

السلاام عليكم ورحمة الله وبركاته
.
.
.
.
شلونكم خواتي بصراحه مادري من وين ابدا موضوعي ...بس انا حبيت احطه هنيه لانه تخصصكم هالشيء وانتوا ادرا بالي يصير فيه ..
انا بنتي تدرس 2 روضه حلو ..وماامدحهااقولكم ملااك لاوالله فيها شقاوه ..على عناد بس خوافه ومسكينه وتتاثر بسرعه ..بالعربي شخصيتها ضعيفه ..وحاولت اعدل فيها واشجعها ..طبعا الروضه بيتها الثاني والمفروض يصقل شخصيتها زياده ويساعدونها انها تصير احسن واحسن...بس انا كنت ارسم خيالات واواهام..


مسكينه بنتي مادري شيصير لها ...اعذروني على طريقتي بس مادري شلون اشرح لكم معاناتها ..
المهم
هي على فترات لاحظتها تغيرت ..قبل ماتسوي بملابسها ولاتوسخ هدومها ..وصار لها فتره من تجي من الروضه توسخ بملابسها الله يكرمكم مو الصغيره لاا الكبيره ...انا تجاهلتها وشجعتها وقلت بننتي حلوه شطوره تروح الحمام وتقول للابله ماتقعد ..
المهم استمرت على هالحال اللهم وقت الاجازه جمعه وسبت ماتسوي بملابسها

ومره اسولف وياها الاتقول ماما الابله حطتني بالمخزن لاني مزعجه ..قلت لها بنتي اسمعي كلام ابله وساعديها ..وسكتت ..بعدين قالت ماما الابله حطت لهم ستار وعطتهم حلاو وانا لا مسكت راسي بقوه ولفته وقالت طالعي هنيه ..بلعت كلامها وقلت بنفسي يمكن مطفره الابله ...قلت انتي ازعجتيها يمكن وابله تحب البنيه الهادئه ...الاتقول انا قعدت شاطره وماعطتني..قمت حطيت لها ستار وشريت لها حلاوه ..ونسيتها الموضوع...

كل كلامي قبل تمهيدي للي بقوله ..
المهم مره جات من الروضه والله يابنات بنطلونها مقطع دوائر صغار صغار اخترعت سالتها من شنو قالت ماما انا قطعته باسناني (اتوقع انها كانت تحت ضغط نفسي شنو ماني عارفه ولاهي راضيه تقول ) تعرفون لمن ياكل الطفل اظافره بس هي ماكله بنطلونها ...
وسكت وشجعتها وقلت انتي حلوه وبطله واشطر بنت بالروضه ...
المهم جات يوم الاربعاء تركض تقول ماما ابله طقتني على فخذي مني وقاعده تقلد طريقة الضربه شلون من جد عورت قلبي ...وقلت ماعليج منها الله بيعاقبها ماما ..لان الله مايحب الي يطقون الصغار...
وغير كذا ابلتها تقول ياويلج واذبحج اذا جبتي جنطه انزين مسكينه عيال عمها وجيرانا كلهم اطفالهم ياخذون جناط وهي مسكينه تتطالع فيهم ...والمشكله اقولها اخذي ماعليج منها تقول لااا مابي ابله تهاوشني ...

بالله عليكم ابله بهالمستوى شلون اتعامل معها ...هل اروح اكلمها مع اني ادري بتنكر واخاف تحط على بنتي ...والي اجيها بتعامل زين ولااشكيها عند ناظرتها ولا عند الوزاره ...من جد ناااس مابقلبها رحمه مادري شلون ترتاح وهي كذا تتعامل مع الامانه الي حملت مسؤليتها

اتمنى منكن كمعلمات رياض اطفال تعطني حل لهلمشكله ...ومشرفاااات بليز لاتنقلونه خلوه هنيه ابي اكبر عدد من المعلمات يطالعون هالموضوع ..

 

[أم وهابي]

شوفى حبوبه انا الاسبوع اللى طاف صار لى نفس الموقف ولدى ثانيه ابتدائى ماسكته ابله الرسم من اذنه

وكره المدرسه وبالذات حصه الرسم

رحت المدرسه بس مو طريقه هواش وكلمت المدرسه وقلت لها انا مو زعلانه على لوتت الاذن بس ولدى ما ابيه يكره حصتج وابى اعدل العلاقات


اشرحت لى وجهه نظرها انه ولدى طلع من الحصه بيروح الحمام وما رجع الا الحصه الثانيه واهيه ناسيه الولد

تقول والله يوم شفته صبت عظامى من الخرعه لانى نسيته


فعادى حبوبه روحى المدرسه ومن تحتح ليا تحت لازم توصيلين للمدرسه مسج انه بنتج كل شى تقولج وخرعيها على خفيف اهم شى بنتج لا تتعقد وكل شى ثانى بالطقاق

 

[قَلبڪْ صًخرْ]

كلمي المديرة هالاشكال من المعلمات لازم تتعاقب ونصيحه انقلي بنتج من صفها

 

[Om_Ksha]

^
^
انا معاها مايسوى على بنتج تتعقد طول السنه وتقعد على اعصابها وتتأزم نفسيتها .. حرام هاذى ياهل !!
روحي للناظره قولي بنقل بنتي لالاسباب التاليه وكوني مصممه على رايج .. بالعكس اذا نقلتي بنتج راح تتغير نفسيتها وتتحسن وبتستانس منج انج انقذتيها .. انا كنت ابله واعرف نوعيه هالابلات ..

جدامج تضحك بويهج ويا حلو بنتج ومن وراج طايحتلهم زف وتخرع !!

 

[(ام سارا)]

اختي ام وهابي ماقصرتي على ردج ..جزاج الله خير..المشكله مادري شقول لاابلتها اخاف تنكر وتقول لا ومادري شنو وانتي تتبلين علي عرفتي ...واخاف ماترضى الناظره تنقل بنتي لصف ثاني فتحط عليها ..من جد هالاشكال جذيه تفكيرهم مايسمعون النصيحه ولاالتنبيه ...واخاف انقلها لوحده عله اقوى من الي قبل ...

قلبك صخر ... جزاج الله خير ماقصرتي حبوبه وكلامج سليم بس ماتدرين يمكن لها علاقه بالناظره فيحطون عليج ثنيناتهم ..وتصير ترا قلوبهم على بعض واحزاب ..عرفتي .. مااقول الاحسبي الله ونعم الوكيل ..

 

[(ام سارا)]

^
^
انا معاها مايسوى على بنتج تتعقد طول السنه وتقعد على اعصابها وتتأزم نفسيتها .. حرام هاذى ياهل !!
روحي للناظره قولي بنقل بنتي لالاسباب التاليه وكوني مصممه على رايج .. بالعكس اذا نقلتي بنتج راح تتغير نفسيتها وتتحسن وبتستانس منج انج انقذتيها .. انا كنت ابله واعرف نوعيه هالابلات ..

جدامج تضحك بويهج ويا حلو بنتج ومن وراج طايحتلهم زف وتخرع !!

هلا حبوبة ..وجزاج الله خير والله ادري انه راح تتعقد ...بس المشكله انه الابله موجوده ويمكن عالطالعه والنازله تشوف بنتي وتخرعها مادري تفكيري جذيه احس لو اروح لناظره واجيب لها مشكله بتزيد عناد وتحط على بنتي لو وين مانقلتها ..
وصدقيني لو تزف بس مو مشكله هذي ماده يدها على بنتي طاقتها مادري شتفكر فيه ..او انه من حقها تطق عيالنا عادي ؟؟؟
مرات افكر اكلمها بالاول واقولها انا جيت عندج المره الجايه اروح للناظره ؟؟؟ ياربي احترت لاحول ولاقوة الابالله ..

 

[Om_Ksha]

^
^
لا تحتارين ولا شي من حقج تغيرين صف بنتج ..
ومن حقج تشتكين عليها ..
ترا الناظره والابلات يخافون خاصه اذا شفيتهم مو سنعين هدديهم بالمنطقه ..
ويفضل الابو يروح لانهم يخافون من الريايل ..
بس ماتوقع لهلدرجه عقلها صغير الابله وبتلاحق بنتج !!
لا بالعكس اذا رحتي لها وعلمتيها يمكن تحقد علاطول عالناظره مافيها المسأله مجاملات

قولي لها احنا عيالنا امانه عندكم وانا مو يايه اسوي مشاكل بس اللي صار كيت وكيت وبصراحه انا حابه انقل بنتي لانه نفسيتها تعبانه وعشان انا ارتاح بعد ..
اذا قالت كاني ماني قولي راح اضطر اشتكي للمنطقه وبنقل بنتي روضه ثانيه ..

 

[منورة]

انا مدرسة روضةواقولج روحي للناظرةوقولي بنقل بنتي بهدوء ومابي مشاكل اهم شي عندي بنتي

ممكن اقولج كلميها مثل ماقالت الاخت وفهميها ان بنتج تشتكي ومن هالكلام بس بصراحة ماتضمنين شراح تسوي هذي شخصيتها غريبة شنو احط البنت بالمخزن والله تخرع هذي حرام ممكن نحرم الطفل من الهدية من اللعب من الاركان خمس دقايق بس بس مانتمادى حيل مهما كان ينكسر خاطرنا فنصيحة انقليها لصف ثاني محد راح يرفض عندت الناظرة قولي خلاص اروح المنطقة وتصير فضيحة للروضة اللي صار مو هين بتطخ وتسكت وقولي بدون شوشرة مو علشان شي ولا خوف لكن البنت مابيها تكرة الروضة وانتهى الموضوع

 

[om halaa]

فيه معلمات للاسف ما يصلحون للتدريس
اذا سكتي راح تتمادي لكن اذا كلمتي الادارة راح تخاف وضروري انقلي بنتج

 

[^ليلاس^]

رد : (لهدرجة فيه قلوب ماترحم ) ...الحل برايكم ..

روحي للناظرة انتي وريلج وخل تييب الابله جدامكم وواجهيها

شنو هالابلات الحمدلله والشكر انا ازف عشان اضبط الفصل بس اطقهم او اعاقبهم واخليهم بالمخزن لا والله ما صارت يمكن احرمهم من اركان بو 10 دقايق وبعدين يروحون جذي بس اخليهم بالمخزن لا

 

[(ام سارا)]

الله يجزاكن خير خواتي كل وحده ردت ..ماقصرتن والله يرزقكن ويصلح لكن ذريتكم ويفرج عنكن ...من جد رسيتوني على بر انه اروح للناظره وانقلها ...
بس المشكله انه بنتي قلت لها بنقلج صف ثاني الاتخترع تقول انا اعرف مكان هذا الصف واعرف البنات الي فيه ...قلت عادي ماما راح تعرفين بنات غيرهم ..وصف غيره..
المشكله مادري عن باقي الابلات واي صف اوديها ؟؟
شلون اعرف الصف الي ابلاته حلوين بتعاملهم مع الاطفال؟؟
بكلم ابوها يروح باجر ان شاء الله ويتفاهم معهن ..

 

[LeeMa q8]

اي شي اوك نزف ونهاوش علشان ينضبط الفصل شووي ...

بس طق وعقاب بالمخزن ياوليها من ربها والله !!! استغفرالله مابقلبها رحمه ..


حبيبيتي روحي للناظره سيدا وواجيها وعقب نقليها من صفها ...

 

[(ام سارا)]

والله مادري شسوي مادري باجر اخليها تدوام او لا ؟؟
ولاانقلها وبعدين اخليها تداوم ...احترت ...
من جد مااقول الاحسبي الله عليها والله يكفينيها بماشاء ..
تخيلوا بنات حتى بيوم التخضير مااعطت بنتي ورقه تقول ماما عطت البنات وقالت انتي لااا ..لو مااغيبتها بيوم التخضير كان بنتي انكسرت نفسها ان البنات مع امهاتهم وجايبين شتلات ..وانا ماكنت ادري عن الحفله الا من بنات عمها
حسبي الله ونعم الوكيل ...

 

[سنـــابل]

ام سارا حبيبتي ..انا مدرسه روضه

باجر اخذي بنتج ان شاءالله وروحي للناظره وواجهي المدرسه
لان ممكن اللي تسويه مع بنتج تسويه مع غيرها

 

[*أم*خالد*]

الحمدلله والشكر

اكو بشر جذي :s


والله عشنا وشفنا

الله يعينكم على ما بلاكم ولا تسكتين يا معوده مايصير
صج انه اكو اولياء امور دعل بس انتي لا الحق وياج حرام جذي يصير بالبنت

 

[عهود الحب]

رد : (لهدرجة فيه قلوب ماترحم ) ...الحل برايكم ..

انقليها
بس سؤال ببالي
ليش هي حاطة على بنتج بالذات
عطت الباقي اوراق وماعطتها
بس هي الي عاقبتها
ليش ؟
انا مو مع الأبلة بالعكس
انا معاج ومع بنتج بس يمكن بنتج تتصرف تصرفات قوية حيل لدرجة الأبلة مو متقبلتها
انا انصحج تنقلينها لأنه ابلتها خلاص ما تصلح لها
بس بعدين ؟ باالابتدائي ؟؟؟؟ منو بينقلها عن ابلة فلانة و ابلة علانة !

 

[فوفو22]

رد : (لهدرجة فيه قلوب ماترحم ) ...الحل برايكم ..

في ابلات لله الحمد والشكر طافحه امراض نفسية

وتطلع حرتها بهاليهال بعد قلبي

احنا نربي فيهم سنين

وتجي ابله بموقف واحد تعقد الياهل

سمعيني عدل

اولا فورا يتغير الطفل الى ابله ثانية وفصل آخر

ثانيا هالابله تنادينها عند الوكيله وبحضور الاخصائية تغسلين جبدج فيها

ثالثا لا لا لا لا تتنازلين عن حقوقج طلبي رفع كتاب لها بالافاده او لفت نظر

رابعا وصي الفراشات والاداره والاخصائية والسكرتارية على ولدج او بنتج ترى انا اشتغل بالروضة

في امهات ما شاء الله عليهم حريصين على عيالهم بالسؤال عنهم يوميا

فوفو

 

[العجوزوعيالها]

انا اقول روحى للابلة وشوفيها وكلميها وبعدين انقلي بنتج
انا عندى توم موطبيعين شطانه قلت ادب فوضوييييين بشكل موطبيعى اموركثيرة تصدر منهم تدل على ان الاطفال ماتربوا وصراحه الام موراضيه تغيبهم تبينى اربيهم تعبتتتت حيل معاهم ازف اهاوش كلش عمك اصمخ رحت عند الوكيلة وشتكيت على الام ههههههههه اخر زمن والله مصيبة بس فكرت انى احاورها وكلمها وفهمها وكلمت الام طبعا مثل ماتوقعت الاطفال الخدامه تسويلهم كل شى حتى السروال تفصخه حتى الاكل توكله فوق هذا اعترفت الام ان عيالها ما يطلعون كلش تقووووول انهم مرضى بس مافيهم شى وهى سبب ضياع الاطفال وانا اتحمل المسؤلية مسكت الخدامه وقلت لالالالاتسوين شى حق بيبى خليه يعتمدون على نفسهم $والله فى امهاااات دعل استغفر الله
طلعت عن الموضوع ادرى رووووووووووحى وكلمى الابله باسلوب حلو وبعده شوفى شتقول وبعدين انقليها

 

[دلوعة روحي]

انتي من صجج للحين ساكتة

و الله انا لو منج من ثاني يوم رايحة للابلة اشوف شسالفتها

ترا فيه ابلات عقد اللهم يا كافي

 

[nsoom777]

حبيبتي لا تخلين حق بنتج واذا كلش غيبي بنتج لاتداوم احسن لايصير فيها عقدة من المدرسة