تفريز رمضان 2011

[شهرزاد الحكاية]

اي والله انا بعد ابي طريقة اصابع الموزريلا ..

وساشا اللله يعافيج تقدين اي واحد كبة وبس اللي بالسالمية ؟؟

وشنو انواع الكبب اللي عنده ؟؟

ومشكورين جميعا والله يبلغنا وياكم رمضان بصحة وعافية ​

 

[لحظة لقاء]

رد: رمضان كريم

انا لفيت سمبوسة جبن كرفت وجبن كيري

وشريت كبة فلافل عجيبة

ولازم اسوي جرد للمطبخ

والصاله افر القنفات واغير ستايل الصالة ليلة رمضان

واحط لي ولعيالي فرش يديدة

حتى زوجي تعود علي هالطبع ومستانس يقول احس برمضان النظافة الزايدة هههههههههههههههههااااى

 

[حرم راشد الماجد]

دنياي حطيلنا مقادير الاشياء اللي انتي مفرزنتها

انا غير السبرينج رول ماسويت شي >>>>>>>>>> كسلانه حدي صح

 

[dnyay_mll]

نورتو حبايبي
صورت لكم جم صوره لتجهيزي بس ماعندي برنامج تصغير الصور ان شاءالله باجر باذن الله احطلكم الصور

 

[dnyay_mll]

القبوط :
4 اكواب طحين اسمر
كوب ونص طحين ابيض
ثلاث ارباع كوب زيت
ملعقة خميره
ملعقة كركم
ملعقه ونص ملح
نص ملعقة بهارات مشكله
رشة فلفل اسود
ماي دافي للعجن تقريبا كوبين ونص ويمكن تحتاجين اكثر

الطريقه :
ننخل الطحين الاسمر والابيض والملح والكركم والبهارات والفلفل الاسود
نضيف لهم الخميره
ونحرك المقادير الجافه عشان تختلط عدل
بعدها نضيف الزيت
وبعدها الماي تدريجيا
ونعجن العجينه عدل ونخليها تختمر نص ساعه لي ساعه
وبعدها نحشيها بحشوة اللحم ونثلجها
طبعا وقت الطبخ نسقط القبوط بعد مانسوي المرقه يحتاج ربع ساعه تقريبا على مايستوي



حشوة اللحم مالها مقادير محدده ضيفو اللي تبونه المهم بصل وبهارات واللحم بكيفج بس طبعا احلى

الطريقه مع المقادير :

6 بصلات كبار مقطعين صغار حمسيهم بجدر او مقله عالنار بدون زيت وكل شوي رشي عليه ماي على مايذبل البصل
بعد مايذبل البصل نضيف سن ثوم مهروس مو فص كامل وطبعا اختياري
وقفشتين زيت
على مايذبل الثوم
نضيف كيس لحم مفروم المواشي
ونحط عليه البهارات بالملعقه الصغيره [ ملعقة بهارات لحم - نص ملعقة دارسين بودر - نص ملعقة هيل بودر - نص ملعقة لومي اسود مطحون - نص ملعقة زنجبيل بودر - نص ملعقة كزبره بودر - نص ملعقة بهارات مشكله - 3 ملاعق سماق - مكعب ماجي ]
السماق يعطي الحشوه طعم لذييذ
لما ينضج اللحم تقدرين تضيفين كشمش وبس سكري النار
هالحشوه لجميع انواع الكبب والقبوط

 

[dnyay_mll]

كبة التوست هالسنه اول مره اسويها طلعت لذييذه وخفيفه وسهله حيل
مقاديرها :
2 بطاط كبار مسلوقين عدل
كيس توست ابيض
كوب حليب سائل
ملح .. فلفل اسود ..

الطريقه :
شيلي اطراف التوست وبطاسه حطي عليه الحليب خليه يتنقع عشر دقايق
ضيفي البطاط المسلوق والملح والفلفل الاسود
خلطيه شوي
بعدها حطيه بمحضرة الطعام اللي تهرس
بعد ماتهرسينه
شكلي الكبه بأي شكل تحبينه
وحشيه بالحشوه :
نص كيس جبن موزاريلا مبشور + 2 جبن شيدر مبشور

وحطيه بالفريزر ساعه

بعدها
حطي طاسه فيها 3 بيضات وشوية ملح وفلفل اسود
وطاسه ثانيه فيها بقسماط وشوية ملح

غمسي الكبه بالبيض
بعدها بالبقسماط
وبس

وقت التكبيب حطي يمج طاسه فيها ماي بارد وثلج و3 او 4 ملاعق نشا بللي ايدج فيها وكببي
وقت القلي لازم يكون الزيت حار وغزير وماتحطين في الزيت اكثر من 4 حبات كبه يعني اقلي الكبه على دفعات عشان ماتتفتت
وتقدرين تحطين بالزيت قفشة نشا عشان تمسك الكبه

 

[dnyay_mll]

وهذي طريقة جوانح الدياي الحاره

علبة جوانح دجاج ساديا او نايف المثلج
نظفيهم عدل وقصي الجوانح بالنص
غسليهم عدل ونقعيهم بكوب خل و3 قفاش ملح
خليهم ربع ساعه
بعدها غسليهم عدل

التتبيله:
بطل دقوس كرستال - نص بطل صلصلة الجوانح - 3 ملاعق باربيكيو صوص - 3 ملاعق تشيلي صوص - ملعقة خردل -
ملعقه صغيره بهارات دجاج - ملعقه صغيره بابريكا - فلفل اسود - كمون - ملح وربع كوب عصير ليمون

اذا ماعندج تشيلي صوص وباربيكيو عادي تقدرين تستغنين عنهم وتحطين 3 ملاعق كاتشاب

تبلي الجوانح فيهم وخليها بالثلاجه مو اقل من ساعتين

بعدها زهبي صحن فيه طحين ابيض وشوية ملح وملعقة بابريكا

وصحن ثاني فيه 6 ملاعق كورن فليكس تطحنينه خشن وبقسماط وملح

غسمي الجوانح بالطحين بعدها رديها بالتتبيله بعدها البقسماط

وفرزيها بالفريزر باكياس او مواعين قصدير

وان شاءالله برمضان تقلينهم بمقله عميقه وزيت غزير وحار تقريبا ربع ساعه

وسويت نفس الطريقه جوانح دياي بارده :
بس كنسلت الدقوس والتشيلي صوص

 

[dnyay_mll]

ومايسير فطور الا وكبة الجريش عالسفره مانستغني عنها ابد

المقادير :
4 كوب جريش مغسول ونقعيه بماي دافي نص ساعه
نص كوب برغل ناعم مغسول ونقعيه بماي دافي نص ساعه
حبتين بصل قصيهم ارباع + 3 سن ثوم
كيس لحم مفروم المواشي
ملح + فلفل اسود + ملعقة بهارات لحم + نص ملعقة كمون بودر + 2 حبة ماجي

الطريقه :
شخلي الجريش والبرغل من الماي وعصريه بايدج عدل او حطيه بمشخال على مايروح الماي
بمفرمة اللحم : حطي الجريش والبرغل والبصل والثوم والماجي
فرميه مره وحده بس
عجني العجينه عدل وضيفي لها اللحم وباجي المقادير
حشيها بحشوة اللحم
ولاتنسين وانتي تكببين لازم يمج الماي البارد والثلج والنشا
دخليها الفريزر ساعتين
بعدها اقليها بزيت حار وغزيز نص قليه مو سوى كامل
وردي دخليها الفريزر لي وقت التحضير برمضان ان شاءالله

المرق:
حمسي بصله مقطعه صغار بشوية زيت ليما تذبل بعدها ضيفي ثوم ومكعبين ماجي وحبتين لومي اسود وكركم وفلفل اسود وقفشة بهارات مشكله
حطي 5 اكواب ماي حار على البصل وخليه يغلي
بعدها طماط وحده كامله وبصله كامله وسن ثوم مو مقصصين
وحطي الكبه ووطي عالنار لما تستوي الكبه تقريبا تاخذ 20 دقيقه بس
تقدرين تضيفين قفشتين معجون طماط
وتقدرين تضيفين نص كيس شوربة ماجي الشعريه

وبالعافيه

 

[قآنون كيفكـ!!]

مانحب نفرزن ..
كل شيء طازج

 

[dnyay_mll]

سمبوسة البطاط اول مره اسويها وطلعت لذييذه
الحشوه :
حبتين بطاط مسلوق
بصله مقطعه صغار
علبة بزاليا صغيره
قفشه صغيره حبه حلوه
قفشه صغيره حبه سوده
نص مكعب ماجي
نص قفشه صغيره فلفل اسود
نص قفشه صغيره كاري

الطريقه :
هرسي البطاط وهرسي البزاليا
حمسي البصل بشوية زيت عالنار
وضيفي البطاط والبزاليا وباجي المقادير
تركيها عالنار خمس دقايق وسكري النار

حشي السمبوسه فيها
انا استعمل عجينة سويتز وماحب غيرها


اصابع الموزاريلا
المقادير :
كيس جبن موزاريلا كامل مو المبشور اللي اييج قوالب
ملح + فلفل اسود + ملعقه صغيره بابريكا + 3 قفاش طحين ابيض

قطعي الجبن اصابع متينه شوي وغمسيها بالخلطه السابقه
بعدها غمسيها ببيض
بعدها ببقسماط


ربيان بالبقسماط :
ربيان مقشر بس خلي الذيل ونظفيه وغسليه عدل
تبليه ب :
ملعقتين صويا صوص + ملعقة خردل + ملعقة مايونيز + ملعقة صغيره بهارات ربيان + ربع كوب عصير ليمون + ملح + فلفل اسود
خليه بالثلاجه ساعتين
بعدها حطي صحن فيه طحين ابيض وشوية ملح
وطاسه فيها بيضتين وشوية ملح وفلفل اسود
وصحن فيه بقسماط ياباني او بقسماط عادي وشوية ملح

غمسي الربيان بالطحين ثم البيض ثم البقسماط

 

[هيبهـ ملكيهـ]

بنات شلون طريقة افرزن الاكل وابي وصفات جديده افرزنها

بنات نفس ماهو مكتوب بالعنوان ابي شلون افرزن الاكل ابي الطريقه الصح ومتى افرزنه وشنو الوصفات الجديده اللي افرزنها

يعني مابي الطعم رايح او تكون فيه ريحه ابي شي مجرب ويبييض الوجه بلييييييييييز ابي ابتدي من اليوم وهالموضوع بيساعد الكل اتمنى في تفاعل وثانكس مقدما :eh_s(7)::eh_s(7):

 

[المــ سه ــا]

شهر المحبه

مرحـــــــــــــــــبا
شلوونكم ..وشخباركم..
كـــــــــــــــ عام وانتم بخير ـــــــــــــــــــل


بما اننا مقبلين على شهر رمضاان
شرايكم نخلي تجمعنا هذا لوصفات
الرمضاان من تجميد والحلويات
وسفرة الرمضان..


مجرد اقتراح..ويليت انتساعد..


اختكم..المــ سه ــل

 

[pink-princess]

ماشاء الله روووووووووعة ماقصرتي

بجرب اصابع الموزريلا و ابلغج )


انا سويت سمبوسة بطاط و سمبوسة جبن ابيض بالنعنع
وسمبوسة جبن ابيض بالزيتون و سمبوسة حلوم
وسمبوسة شدر

اما الكبة فطلبت كبة برغل
و طلبت سمبوسة شنكاري و سبرنج رووول

باقيلي كبة دياي و اصابع الموزريلا

حبيبتي شلون طريقتج بأفخاذ الدياي الكذابة ؟؟؟
ودي اسويها ...


اما الحلو فشريت الاغراض و باقي التطبيق برمضان
و طبعا ما نسيت المحلبية والجلي و الكريم كراميل )

و عسى الله يبلغنا رمضان و يتقبله منا

والاقتراح حلو انا معااااكم

 

[عقيله]

الله يعطيج الف عافيه حوش شيئ

 

[dnyay_mll]

حياكم الله مشكوره مشرفتنا الغاليه عالتثبيت
ومشكورين على مروركم
افخاذ الدجاج لي الحين ماشفت طريقه عجبتني
بدور واقولج

 

[dnyay_mll]

هذا تفريزي لي الحين

....

 

[فدوووو]

ماشاء الله عليك كل شي حطيتيه الله يعطيك الف عافيه

اول مرة اعرف بعض الطبخات

بس ودي بعد اعرف كم فترة اقدر افرزنها ؟؟

ودي بعد باشياء سهله وثاانيه

 

[وحدة كويتية]

مشكوره حبيبتي
طريقه القبوط المجمد ادورها من زمان يعطيج العافيه

 

[dnyay_mll]

كبة البرغل هذي طريقتي ماغيرها من سنين
كيلو برغل ناعم احمر
كيلو لحم مفروم
2 بصل مقطعه ارباع
3 سن ثوم
كمون - فلفل اسود - ملح - نص ملعقة بهارات مشكله

الطريقه :
نقعي البرغل بماي دافي ساعتين
بعدها شخليه من الماي عدل
فرمي البرغل بالمفرمه وعجنيه شوي
وردي فرميه مره ثانيه مع اللحم والبصل والثوم
وحشيه بحشوة اللحم اللي حاطه طريقتها فوق

سهله ولذيييذه

 

[dnyay_mll]

كبة البطاط :
4 حبات بطاط
نص كوب عيش

سلقي البطاط عدل وسلقي العيش
تقدرين تهرسينها بمحضرة الطعام اللي تهرش اذا ماعندج مفرمه
ضيفي للعجينه قفشتين نشا وملعقة كركم وملح وفلفل اسود
وحشيها بحشوة اللحم او جبن ابيض او جبن شيدر
وفرزيها وقبل القلي غمسيها بالبيض واقليها



كبة العيـش : لذيذه وكل العايله تطلبها مني وسهله حيل

3 اكواب عيش سلقيه عدل وبماي السلق حطي زعفران وزيت وملح
فرميه بمفرمة اللحم مرتين
بعد مافرمتيه ضيفي بيضه وملح وفلفل اسود وكمون
وحشيها بحشوة اللحم بس بالحشوه ضيفي صنوبر
ووقت القلي غمسيها بالبيض


اصابع الدجاج :
صدور دجاج قطعيها اصابع سميكه
نقعيها بشوية خل وملح 5 دقايق
بعدها غسليها عدل

نقعيها ب :
كوب لبن - ملعقة بابريكا - نص ملعقه بهارات التندوري - ملعقة صويا صوص
خليها بالتتبيله ساعه

بعدها غمسيها بطحين وردي غسميها بالخلطه وبعدها بقسماط
وفرزيها