بذمتك بنات المشكله مني والا من زوجي؟؟يحرني

[عشقي الجنوب]

السلام عليكم حبوبات

7


7

7

انا متزوجه تقريبا من سنه وشي وساكنه مع حمولتي بنفس البيت المهم صرت كلش ماهتم بلبسي لأن اغلب الوقت اكون جالسه مع خالتي والبنات والأ عمي زوجي يداوم النهار وكمان باليل ويجي متأخر فصرت ما اهتم بلبسي لأني اكون بلبس محتشم بسبب حمواني واتعب وانا طالعه فوق ونازله خاصه مع ولدي الصغير وماحب اقعد بروحي فأتم طول ماهو برى تحت مع خالتي وهو بعد اذا جاء يجلس مع اهله لحين وقت النوم نطلع بيتنا وأنا حدي مفهيه بحكم ان ولدي صغير ملعوزني كلش مانام صرت مالبس له ولا اكشخ اول مادش بيتي ابدل لبسي واحط راسي حتى احس مو متفرغه له كثير وهو كل ماله يزعل يقول كلش مطنشه مع اني حاولت اعدل وضعنا بس مافيه فايده
ليش لأنه اذا جاء وأنا بالبيت قال ليش ماتنزلين تحت انتي هنا طول الوقت ...
طبعا الأكل مستحيل نآكل بروحنا اذا قلت له بناكل ببيتنا قال شدعوه هنود لااا ننزل نآكل تحت ....
وكذا مره اطلع انتظره تخيلوا يسهر بالساعات ويطلع ويحط راسه وينام ويتأخر ع الصلاه والدوام وأنا السبب ويقول كله منك ماعندك تنظيم انتي اللي تأخرينا ...
هذا من غير اني ارفضه اذا قرب مني لأن مالي خلقه يجي متأخر وأنا حدي منهكه مو فاضية له كلش ....
وفوق هذا اذا شافني نايمه قال ماتشبعين رقااااااااااد وانا طول الليل سهرانه مع ولده!!!!!!
بالمختصر بيتنا صار للنوم فقط لدرجة انه كرهني ببيتي حتى الماي ماحس له لذه حتى الغسيل اجمعه مره وحده كرررررررررررررهت بيتي حتى سوالف لامانسالف مع بعض بس اللي مع اهله واذا جيت بقول له شئ قال مو وقته هذي سلبيات زوجي

واما انا ...
بيتي اهملته كل وقتي تحت
ليالي خاصه وسهرات فالاربع شهور مره
لبسي عادي لأني اتبهذل وانا ابدل واعدل وممكن في اي لحظه حد يدش علينا عمي خالتي على نياتهم حتى زوجي بنفسه اذا كنت لابسه حتى لو بجامه يقول بدلي لايدش ابوي عليك..
مع انه يقول ليش ماتكشخين لي جسمك حلو بس ماتستغلينه ..
مواعيييييييييييييييييدنا زفت مافي نظام كلش...

بصرآحه بنات من سبب الأهمال انا والا هو؟؟؟

 

[زوجة عزيز]

up up up لي رجعه بعدين

 

[فوفو22]

الغلط راكبج من راسج الى رجولك

ونزولك لفتره طويله هو هروب من الواقع مش تقضيه وقت

حبيبتي فورا نظمي وقتك

خصصي وقت لنفسك ولراحتك ولنومك اثناء غياب زوجج

حتى تتفرغي له

فوفو

 

[G!RLooNa]

لا تقعدين طول الوقت عند حمولتج و لا تاكلون كل وجبه معاهم لازم عندكم خصوصيه!

و حطوا قفل على باب شقتكم خل يتعودون يطقون الباب و يستحسن تعودونهم ما يروحونلكم الشقه بعد ساعه معينه بالليل شنو الواحد ماياخذ راحته :/

 

[iLLuMinaTion]

حبيبتي صعل الحكم الحين

 

[KOKO_284I]

انا مع فوفو 22

 

[Model Look]

انا كل وجبه انزل

عاادي البس وانا نازله عندهم لبس محترم وبنفس الوقت حلو

ومودايما قاعده عندهم لااا اقعد شوي واروح داري انام انسدح ارتب اللي ابيه

والبس بيجامه حلوه ومرتبه >> ريلي يحب بجامات اويشو اكثر من القمصان

خصصي وقت لنفسج لا تربطينهم فيج وانه لازم طول الوقت معاهم

انا خالتي مرات ماتدري اني طالعه ولا نايمه ولا قاعده

معنها فديتها تينن تخاف علي

بس انا عايشه حياتي الخاصه ومابي احد يتدخل

 

[Gifts&Occaions]

أنا مع فوفو

 

[!الجادل الصعب!]

بالنسبه لوضعج في بيت حمولتج مآ قلتي شي جديد
كلنآ او آغلبنآ نفسج .. ننزل ونقعد معآهم ونصعد ..
وندآوم و أزواجنا يداومون وعيآلنا حنانين ..!
هذا ماله علاقه بالكشخه .. والحيآه الخاصه
بالعكس انتي احسن منآ عندج طوول الوقت خاصه مع دوام زوجج تغسلين
وترتبين وتهتمين بولدج وتنومينه قبل يجي ..!
انتي بس رتبي امورج وبس لاتعذرين بالاسباب هذي
اعرف بنات ماعندهم الا غرفه وحمآم مشترك مع حمولتهم ومو مخلين
على انفسهم قآصر ليآلي وحركآت وكل شي بالغريفه هذي ..!
الاكل نفسه مو شرط يوميآ معآهم لو انتي مسويه شي سبيشل مآراح يقولج
خل نآكل تحت صح ؟
لو مرتبه لامور معينه وليله حلوه ماراح يقول ولا راح يتاخر ..
تلآحقي على نفسج لآ يروح عنج بس .!
موفقه ..,

 

[FeShinGoOo]

اشدعوه حبيبتي ليش مسويه مشكله من ولا شي ؟؟

يعني مو معقوله ريلج ماعنده نقال وماتدقين عليه ومايبلغج متى بيرد البيت ؟؟

نزلي وقعدي واستانسي وظحكي ويا اهل ريلج .. وقبل لا يرد البيت بساعه قوليلهم عن اذنكم .. وفهمي خالتج ان بتصعدين فوق بتكشخين حق زوجج عشان لحد يدرعم عليكم (( وقفلي البااااااااااااااااب ))

صعدي فوق شقتج رتبيها بخريها اخذيلج شاور لبسي كشخي نومي ولدج ونطري زوجج .. اول مايدش البيت حظنيه واستقبليه وتكونين مجهزتله لقمته ..
واذا قالج ليش قاعده فوق قوليله كنت تحت وصعدت بقعد بشقتي وبنطرك وبكشخلك ..
وحبيبتي لاتعودينه يحركج مثل اللعبه وقت مايبيج تنزلين تنزلين وقت مايبيج تصعدين تصعدين خلي عندج شخصيه وقرار بكيفج وبطيبج تنزلين تتغدين ويا اهله وبيكفج تاكلين فبيتج .. وليش يعني الي ياكلون فبيتهم هنود ؟؟ شالمنطق الي ياكل فبيته يصير هندي ؟؟
قوليله بناكل فبيتنا مو بفرع الجمعيه عشان تقول هنود ..!!

وبجذي تكون المشكله انحلت ..!!

بس يبيلج تنظيم وقت

 

[قطوووة]

اي والله الحقي عمرج قبل لا يطير

 

[foshea88]

المشكله طلعت فيج لاتنزلين تحت الين ماتنظفين شقتج وتبخرينهااااا واكشخي وانزلي تحت

 

[عيالي ذيابه]

حبوبه انا ساكنه مع اهل زوجي
غرفتين وحمام تكرموون
عاادي اذا داوم أحط الغسيل وانزل
اسولف عقب اصعد اطلع الهدوم
وعندي ٢ شاقين الارض وطالعين سم الله عليهم
بس خلاص الساعه ١٠ ينامون
وانزل قبل مايجي بنص ساعه
اصعد البس واكشخ وانطره
واذا جا انا موجوده عادي اقعد ونصعد سوا
البس واتعطر وخلاص
انتي رتبي افكاارش... ووقتش وكل شي يصير تماااام

 

[روعة حياتي]

حبيبتي مافي ريال ما يحب زوجته تكشخ له وتترتب له وتطبخ له

المساله هي بس تنظيم وقت لا اكثر ولا اقل

انتي شكلج من النوع اللي يتملل بسرعه وعندج كله مافي وقت بس بالتنظيم والترتيب كل شي يصير

لا تخلين الملل وكلمه ما يصير وقت اتشيلينها من بالج مافي شي اسمه مافي وقت سوي هالشي اذا انتي تبين الشي بصيرر

 

[Om_Ksha]

تنظيييييييم الوقت
حتى ريلج لازم يراعي هالشي مو يسهر لي نص الليل ولي صعد يبيج حصان ..

 

[lamoshty]

مع فوفو

 

[بقــآيآ جـروح]

انتي مخربه حياتج

 

[عشقي الجنوب]

بصراااااااااااااااااحه فوفو معك حق انا اتهرب لأني اكره بيتي ما ارتاح فيه من اول مادشيتته مو عاجبني مع ان زوجي مو مقصر كذا مره يثاثث ويعدل بس ما ارتاح فيه

شكوووووووووووورين بنات فديتكم والله فعلا احس الغلط مني بس النفس ما تعترف

وبصراحه حتى زوجي مايساعدني كل ماحاولت انظم الوقت يجي ويخرب كل شئ

((تدرون شغلطتي مامي فديتها قالت لي عودي زوجك ماينام الأ وانتي يمه وسويتها وليتني ماسويتها كل ماراح بينام تلني معه المشكله في اوقات غلط ماحد ينام فيها))

 

[engnera]

مع فوفو

 

[ام اريج 22]

منج انت المره اللي يحبه الرجل تكون منتظمه بحياتها بعدين مايجوز شرعا قولج بادمتكم هالكلمه امسحيها من قاموسج باين من ردودج مومستعده للتغيير اجل ليييييييييييه سادحه مشكلتج