وصلت فينا أنقط عيالنا عند ................ ! عبالهم قاعدين على بنك وألا طايحين على كن

[برونزية رشيقة]

اليوم موضوعي ساخن جدا ..

قد يعجب ناس وقد لا يعجب ناس !!!

قد يؤيدوني ناس وقد يعارضوني ناس !!!
​

طبعا لاحظنا خلال السنتين الماضيتين انتشار ما يسمى بال.........

( مراكز التقوية وحل الواجبات المدرسية)
​

أنا مثل كثير من العضوات من باب اختيار الأفضل لعيالي ولأني أدور مستوى دراسي عالي وعلامات مرتفعة أتبيض الويه ( طبعا هذي رغبة الجميع وكل ولية أمر )

حبيت أعرف شسالفة هذي المراكز؟؟؟؟؟


هذاك اليوم وألا أشوف جدام وحدة من الجمعيات(بدون ذكر أسماء) سيارات تنزل أصبيان على 13 و14 سنة .. وسواق ينزلون بنات على 15سنة .. وأمهات ينزلون يهال على6و7سنين ..


رحت وألا أشوف حارس عالبوابة سألته : عفوا شنو هذا المبنى؟
قاللي : فصول تقوية!

رديت: أنزين شنو يدرسون؟
الحارس: كل حاجة يامدام! خشي وشرفينا واسألي براحتك!!!


دخلت وألا مسوين نظام رسيبشن .. وحاطين وحدة تارسة الويه مكياج وراااااااااصة روحها رصصصصص باللبس الضيج ..
سألتني أبي أي مرحلة وجاوبتها ..


ماشوف ألا 3 رياييل وكل واحد يايني بابتسامة صفراء ..
كلهم من جنسية وحدة !!!!


يقوللي : تفضلي تفضلي يا أفندم ؟؟؟؟؟


دخلت ورة واحد وألا نظام مكاتب ...
وابنك في سنة كام؟

وقرق على راسي قرقة والله العظيم فوق الساعة ..


أللي حسيت راسي عورني وحاشني صداااااااااااااع من قرقته..


القرقة هي عن موضوع كلنا نبي أعيالنا يتأسسون عدل..
وكلنا نبي علامات عالية ..

والمدارس ما أدرس عدل..

وماشاءالله أهمه في هالمراكز يدرسون ويؤسسون ويعلمون أعيالنا ..


وساعة يمدح أنه مركزهم غير .. وأنه في مراكز ثانية هدفهم الربح المادي .. لكن أهمه يبون استفادة الطالب أولا وأخيرا..


وحط ورقة وقلم ويرسم لي رسومات تقولون قاعدين بحصة رياضيات ويشرح لي أهداف المركز ..


آخر شي قلت له : أوكي ماقصرت .. عطني رقمكم وأنا اتصل عليكم أن شاءالله ..


وألا يبيني غصب أسجل ولدي .. مو راضي يخلليني أمشي ..


يسألني : هو ضعيف في أنهي مادة؟
هو حضرتك عايز أنهي مواد؟


طبعا من كلامه لي حسييييييييييييييييت أنه يبون يتصيدون أولياء الأمور بأي طريقة كانت !!!!



والله يا بنات وهو يتكلم تخيلت الوضع جذي :


هذول أللي يسمون نفسهم مراكز تقوية أهمه الصياد

وأحنا الطعم

وأعيالنا السمجة أللي يبون يصيدونها ..



بقولكم مواقف صارت جدامي وأنا بطلعتي .. أخذوا المواقف الحلوة:krkrkr:


الموقف الأول :

ولدين كويتيين أعمارهم على 15 سنة يقولون للي يكلمني أستاذ الكيمياء فوق يشرح للطلبة على مذكرة كيمياء وقاعد يحل فيها مع أللي بالصف .. أنا وأللي معاي ما عندنا المذكرة من أسبوع وكل ما نقول له يقولنا راح أصور لكم نسخة وأعطيكم أياها باجر .. وأحنا كملنا أسبوع وللحين ما عطانا..

سمعوا رد أللي مسوي مركزهم أحسن مركز بالدنيا .. رد على الولدين:
ما فيهاش حاجة .. حلوا التمارين مع واحد قاعد جمبيكوووو ..

ردوا الولدين : بس من أسبوع واحنا قاعدين بالصف نطالع مع أللي يمنا .. لازم نحل عالمذكرة ..


لمن شافني أخززززززززززززززه .. جان يقولهم : طيب طيب بكرة أنتوا مروا على مكتبي وهتاخدوا نسخة أن شاءالله ..

من الفقر حتى مذكرة مو راضين يعطونهم من أسبوع مساكين!!



الموقف الثاني :

موظفة الأستقبال أم المكياج واللبس الضيج أللي كلامها نصه كويتي ونصه مصري .. بطلعتي شفت ريال كويتي بالأربعينات شكله ولي أمر قاعد يمها .. كانوا يسوون أشياء غير أخلاقية جدام الطلبة .. ماسك إيدها ويتغزل فيها والويه بالويه.. لمن شافوني اخترعوا واهي وخرت عنه بسرعة وهو استحى ونزل راسه !!!!


الموقف الثالث :

بنت عمرها 15 أو 16 سنة نزلتها أمها عند باب المركز سوت روحها دخلت .. لمن أمها مشت .. البنت طقتها فرة عند الجمعية .. تستعرض نفسها .. والشكل مو شكل وحدة رايحة تقوية....!
جينز سكيني وشعر مصبوغ ومكياج ثقيل .. أمبيه!!!!!


بنات قلبي عورني .. وقررت أكتب لكم هذا الموضوع علشان تديرون بالكم على أعيالكم ..


وتديرون بالكم على فلوسكم من هالأشكال .. وهالمراكز المرتزقة ..


عبالهم الكويتيين طايحين على كنز .. وكل وحدة فينا عندها بنك..

مايدرون أن الكويتي نص معاشه رايح على الأقساط ..
والإيجارات المرتفعة .. وإللي كل مالها وتزيد ..
ومصاريف مالها أول ولا تالي ..


وبعدين بناتكم أمانة بأرقابكم .. تنزلونهم عند باب هالمراكز ماتدرون يدخلون وألا يروحون يفترون مكان ثاني من وراكم..



نسيت أقولكم شوفوا شلون العملية تجارية بحتة ..

اقروا الموقف الأخير :

أول شي قاللي المادة 25 دينار 5 أيام بالأسبوع للشهر كله..
وإذا سجلت ب3 مواد يطلع حسابي 75 دينار بالشهر (عربي-رياضيات-أنجليزي)

أنا رديت عليه لااااااااااه ما يناسبني أنا ولدي عندي أنشطة ثانية
أبي بس 3 أيام بالأسبوع وبس مادة وحدة فقط الأنجليزي ..

قال : خلاص نعمله فصل خاص فيه!!!
أنا: شلون يعني ؟
قال: يعني نجيب له مدرس خاص فيه بالأيام أللي أنتي عايزاها..

أنا عبالي بيقوللي 25 دينار للشهر كله.

رد علي : لأ لأ سيادتك عارفة المادة دي لابنك لوحده .. وجدول خاص فيه .. أنا هآخد عالساعة 8 دنار ( الترجمة 8 دنانير)

قلتله : ليش؟ ألحين أولياء الأمور 5 أيام بالأسبوع وشهر كامل25 دينار المادة .... وأنا ليش تاخذ عالساعة ؟؟؟؟

قعد يلف ويدوووووووووووووووور ساعة كاملة ومو راضي يطلعني من المكتب فر مخي وصدع راسي ..

وآخر شي قاللي : هعمل لك خصم عشان تبئي زبونة عندنا هديكي الساعة 8 دنار .. 3أيام بالأسبوع يبئى مع الخصم شهر بحالووووو 130 دنار ( دينار قصدي)


شوفوا النصب أشكررررررررره !!!
أدفع حق مادة وحدة 130 دينار حق ياهل بالابتدائي!!!!!!!!!!!!!!!! بس 3 أيام بالأسبوع!


وااااااااااااااااااااااااااي بالغصب أنحشت منه ..


وجربينا وكل أولياء الأمور بيعرفونا .. ومادري شنو ....


وكل شوي قاللي حنا بنختلف عن المراكز التانية .. كلهم عندهم عملية تجارية بحتة بس حنا عايزين استفادة الطالب وراحة ولي الأمر ..



ديروا بالكم منهم ..


ما فيها شي دوسي على نفسج شوي حددي ساعة باليوم مراجعة مع ولدج وإلا بنتج.. ولا هالمراكز الآفة أللي قاعدين يبقون فلوسج ...




بنات ... يلله نبي نقاش وكل وحدة تقولنا تجربتها مع هالمراكز:eh_s(9):
​

 

[الحراير]

انا ماحب هالمراكز ولاعمري وديت ولدي اجيبله مدرسات او مدرسين واقعد معاه ماامن والشيطان شاطر
ويعطيج العافيه علي هالموضوع وان شاءالله الامهات يستفيدون

 

[الصابرة المحتسبة]

هلا وغلا فيج

ومن طول الغيبات كتب مواضيع قوية

شوفي يالغالية الكلام يعور بس للأسف هذا الصج وخصوصا المعاهد اللي لج عليها.

مرة رحت اسجل عيالي بمعهد بمنطقة داخلية ونموذجية بس للأسف الطلاب هناك يلعبون لعب وماكو رقابة ولا اهتمام .

الله يصلح امورهم وعيالنا أمانة ماهم مهانة.

الحمدلله ما أحب المعاهد خير شر والمذكرات أفيد.

 

[مذهلة 78]

والله حبيبتي انا العام صار انقص علي وديت بنتي مركز تقويه للرياضيات لانها

ضعيفه بهالماده وكانت بالصف السادس يعني هالمرحله يديده عليها وماكنت ابي

درجاتها تنزل لانها متفوقه ورب العكبه والله شاهد علي اني خليتها تروح المعهد

بس انا كنت ادخلها الصف واقعد انطرها بره عند الباب ولما يابت الشهاده الا راسبه

بالرياضيات بغيت امووووووت طقيتها طق وتالي انا وابوها جابلناها وقمنا ندرسها

والحمدلله يابت اخر السنه نسبه 85% وبماده الرياضيات يابت 83 وصج تحسفت

ليش وديتها مع ان المركز معروف وحتى نظامه بالساعه المتوسط الساعه ب3 دنانيير

وهالسنه مفكره ادخلهم مركز جمعيه المعلمين وايد يمدحونه عالاقل مركز تابع لوزاره التربيه ورسومهم رمزيه عالاقل احسن من هالمعاهد اللي تكلمتي عنها

 

[زعفرانة_73]

والله جيتي عالجرح الأسبوع الللى فات سجلت ولدي واتفقت معاهم يكون فردي موعد الحصه الساعه 4ونصف ولا الأخت السكرتيره العجيبه تتصل وتقول غيرنا موعدكم صار 5 ونصف قلت لها ليش انا ولددي يكون مصحص أول النهار قالت انا عندي جدول هذا بعد ما قبضو الفلوس قلت ياحيل الله أمرنا للله ورحنا اليوم وننطر وونطر وين الأستاذ قالت عنده حصه وننطر لين صارت 6 الا ربع وين الاستاذ ولا تقول لا ما وصل جان أرد عليها توج تقولين عنده حصه، وانطر وانطر لا الساعه 6 وربع جان تجيني وحده ثانيه معلش أصل الاستاذ عنده حصه الساعه 6 ونصف وانتي راح تكونون 7ونصف ، رديت عليها لا حبيبتي أنا ناطره أكثر من ساعتين ، جان ترد الثانيه انا ععندي جدول وما اقدر ، اهنيه انا فصلت رديت عليها تعالى أنت كل ساع تقولين عندج جدول وانا موعدي 4ونص لين وصليتها 7 ونص حبيبتي أنا اللحين اقولج ماأبي معهدكم رجعولي فلوس اهنيه انخبصوا ،والشى المسخره كثر ما أهم خايفين مني وقعوني على اني استلمت فلوسي ومالي حق اطالب منهم بشي ، بس هزأتهم عدل وبردت حرتي( يوم ما عندكم مدرسين ليش تستقبلون الناس ومسوين رووحكم اسكتوثلاث ارباع الحصه يايرد الأستاذ على اتصالاته الخاصه ولا يضيع الوقت بأى طريقه)صج مافي لا ذمه ولاضمير تجاره بتجاره .:rgewrg:​

 

[زعفرانة_73]

على فكره مركز التقويه بمنطقة عبد الله مبارك
******:eh_s(4):​

 

[love-latee]

الله يعينا مشكلة اولياء الامور انهم مو قادرين يتابعون عيالهم وخصوصا بالمراحل الثانوية و المناهج كل مالها تتصعب من جذي هالمراكز استغلتهم

 

[أغلى حبيبه]

والله يبتيهااا صج

العام دخلت عيالي تقويه معهد العقيله بالبيرق النصابييييين واااي حاريني

اللي بخامس دخلته مع مجموعه وقالي المجموعه حدها ٤ الى ٦ طلاب فقط والصبيان بروح والبنات بروح

وكل المواد والواجبات احنا نحلهم واخر الاسبوع نعطيج شهاده بانجازات الصبي قلت اوكي وسجلته

رحت لهم بنص الدراسه فجيت الباااااب الله لاااااا يوريج

الغرفه ٢في ٣ ومكتب مستطيل المدرس بالنص واليهال فوق ١٢ طالب وطالبه لاازقين زين مايقعدون بحضن بعض

والمدرس مايبين من الطلبه

رحت الرسبشن قلت له انا مسجله ولدي وقلب بالصف حدهم ٦ والصبيان بروح والبنات بروح

قالي اييي في نقص بالاساتذه ومفيهاش حاقه دول عيال وحجي المصاروه اللي ماييب ولا يودي


وسجلت ولدي الثاني اللي بثامن كل ماده بروح لانه ماايحب الازعاج قلت يلا ادفع بس تييب نتيجه

١٥ ساعه حق ٣ مواد بـ ١٢٠ ودفعت

درس يومين بعدين قالو بننقل عماره ثانيه انطر علينا اسبوع

نطرنا اسبوع رحنا ثالو في نقص اساتذه

صار وقت الامتحانات وينكم مافي مدرسين

صار الفاينل ابي احد يدرس ولدي مو فاهم قالي تبين ادخلينه مع الطلبه مو بروحه

قلت له انا دافعه ادرسونه بروحه

جان شقولي وااااي حارني عمه بعينه يقولي شوفي الوصل من شهر ١٠ انتي مسجلته والنهارده ١٢ يعني راحت عليج الحصص

شنوووووو والفلوس يعلكم الويعه ١٢٠ مو شويه وانزل ودمعتي على خدي متحسره علي ولدي باجر امتحانه ومو فاهم

والمشكله المصري يصرخ علي جدام الناس عمه بعينه

نزلت ابي اكلم ريلي موقادره ويقوله ولدي السالفه زين ماياني ركض بدال السياره

يصعد لهم ويشرشحهم المصاروه لهوو ريلي على مانحاش الثاني مال الرسبشن

ويروح لهم ثاني يوم ويطلع واسطاته وايون يفتشون الا اغلب اللي يشتغلون مو على كفاله المكتب ولا هم مدرسيييييين

يمكن بس ٢ او ٣ مدرسن

وقصبن عليهم درسو ولدي وبروووحه بعد

 

[أغلى حبيبه]

الله واااايد تحجيت

يلا كان هممم وقلته لكم وانزاح

 

[أغلى حبيبه]

الله يعينا مشكلة اولياء الامور انهم مو قادرين يتابعون عيالهم وخصوصا بالمراحل الثانوية و المناهج كل مالها تتصعب من جذي هالمراكز استغلتهم

لوف صاجه والله مو ملحقيييين ع المناهج حييييل قام تتصعب

وعيالنا يبيلهم وقت على مااخلص مع كل واحد جم ماده

بس الحين الكبار من اشتريت لهم مذكرات جمعيه المعلمين افتكيت قمت افهم الدرس وافهمهم



والله عجيتني فكره معهد المعلمين خل ادور منطقتنا اي المدارس تابعه لهم

 

[واي بفضفض]

والله انا مااااااااااااااااايد هالدروس بالمرة

يعني الطالب ما مداه ايي البيت ويتغدا ويرتاح الا امهيهيين فيه من شارع لي شارع والله يتعب

غير لما يكون بالبيت والشاي والكيك يمه وجو هتدي وامه تدرسه وترتب له الجنطه حتي يكون فيه تواصل مع الام

الحين الامهات الله خير ماالهم خلق تدريس اشدعوه!!!
لي درجه ان فيه مراكز يحلون الواجب!!!!!!! انا مستغربه الحين الام والابو لي هالدرجه اشغالهم ما تخليهم يجابلون عيالهم

انا اطلب من كل ام وابو ساعتين بس لعيالهم حق التدريس والله كافي يعني من 4 الي 6 والله كافي

اذا بتودينه العصر عيل متي شفتيهم وقعدتي معاهم وعرفتي اللي بخاطرهم

ماني عارفه

بس انا ما اايد هالموضوع كلللللللش

 

[الأميرة جوري]

انا عندي بنتين باول وثاني بتدائي ....وبسبب دراستى ماقدرت ادرسهم وصارواشوي ضعاف بالعربي والانجليزي ...وقلت ادخلهم تقويه .مع ان ابوهم كان رافض وخايف عليهم يقول المراكز لارقيب ولاحسيب ودخلتهم...شهر اذا اوكى او اطلعهم من اول اسبوع نبطت جبدي يردون مو حالين واجباتهم وغير بنتى الصغيره تقول الابله تصرخ علي ما ابي اروح ...ولمن رحت فجاه لقيتهم مادري جم بنت وطاوله وحده وازعاج ولا شرح ولايحزنون ...ما استفادوا شيء كلش بعدها ضغطت علي نفسي صرت اخليهم ينسخون الاحرف واصحح لهم واستانسوا جنى العب معاهم وفعلا ماشاء الله تاسسوا عدل علي ايدي .....صج لو نخصص جم ساعه تدريس احسن من هالمراكز اللي الله اعلم فيها

 

[أم عبدالله22]

آه يا قلبي احتريت والله

معسكرات عمل هالفئة هذي

الكويت عندهم مثل الكيكة وكل واحد يبي ياخذ منها قطعة ويستفيد لاخر مرحلة

ربي يحفظ عيالنا وعيالكم يارب ​

 

[أم عبووووود]

يعطيج العافيه عالموضوع الحلو والحساس وراح يزعل امهات واااايد وبنفس الوقت راح ينبه ويفيد امهات واااايد

انا بحياتي ما رحت هالمعاهد ولا ادري شنو نظامها ولا احبها ولا احب سيرتها من القصص اللي اسمعها عنها ربي يحفظ عيالي وعيالكم ان شالله بس عاللي اسمعه يمدحون مال جمعية المعلمين والله اعلم

انا بالنسبة لي افضل ان ولي الامر يكون موجود ويراقب المدرس وهو يدرس ولده او بنته وقت الحصه من بعيد من بره الصف ، في معاهد يكون التدريس بس طالب واحد بالصف ويكون المبلغ اكثر من المجموعه هذا اللي اسمعه من اختي فهالحاله انا افضل ان ولي الامر يكون موجود خصوصا اذا كانت بنت 14 الى 16 سنه ماتكون بروحها مع الاستاذ .

بعدين اذا كان ولي الامر ماعنده القدرة عالشرح ومايعرف يدرس مو معقولة مايعرف كل المواد وبعد مايحلون الواجبات مع عيالهم يعني حرام الطفل من الصبح لي الظهر مدرسة ومن الاربع لي الثمان معهد متى تقعدون مع عيالكم وتسولفون معاهم .

يا امهات حطوا بالكم على عيالكم الطفل بالابتدائي يخاف يعلمكم بكل شي يصير له وهالمدرسين عادي يوقف على راس الياهل وينقله الحل وبس الياهل مثل الكاتب بدون فهم شالفايدة .

الله المستعان وربي يعين ان شالله

 

[زعفرانة_73]

وخليني أضحكم شوي وتقول السكرتيره أن في يوم أولاد ويوم بنات الله وكيلكم كل مختلط بنات وشباب ومر جدام عيني شاب سلم على السكرتيره ولا تقوله قبل ما يمشي سلم على أخوك الحلو! بالله عليكم هذا أسلوب واحنا قاعدين، وثلاث مراكز بالمنطقه الله شاهد على كلامي كل مختلط وشكلهم يدقون على اللى بالوسيط ولا ما عنده شغل ولا مشغله جاي من ديرته يبي شغل ،الصراحه لازم يسون عليهم تفتيش بشكل دوري علشان يطلعون نصبهم.:rerrerek:
وقررت أن أجابل أعيالي واطلع اختبارات من موقع وزارة التربيه ومحد راح يكون قلبه على عيالنا غيرنا:eh_s(2):​

 

[PuPa^^SWeeT]

تدرين احنا عندنا تصوير قديم لنا


امي بالوسط و احنا حواليها جناطنا كلها جدامنا موادنا و تقعد يالله العربي


خلصنا الانجليزي

وجذي

والحمدلله عندي اختي اللي ماتحب تدرس خييييييييييييييييييييييييييييييييييييييييييييير شر تخرجت بجيد هذي اللي ماتبي تدرس ولا اتحب تدرس



مافيها شي اذا درسنا عيالنا


لاحقين عالحفلات و الطلعات


اليهال لازم يدرسون ولازم اهلهم يدرسونهم

 

[miss_7sawiya]

ذكرتووني بامي قبل تدرسنا انا واخواني كل سااعه وااحد والحمدالله تخرجنا ودرجاتناا زينة واذا احتجنا مدرس او مدرسة بالبيت قبالهاا علشااان المرااقبة لان بعضهم مدرسين فااشليين

 

[انوثة من حرير]

المراكز التقوية اكثرها نصب انا ماحب اودي بنتي للتقوية ما ارتاح
الحين غير المعاهد اتصلت علا اكثر من مدرسة انجليزي تجي البيت تقول مبطلة بيتها لطلاب انتم تعالو والله شي يصدم ويعور القلب الي يكسر الخاطر اعيالنا
ليش مدارس الحكومة ما تخصص ساعة تقوية وحل الواجبات لطلاب الضعاف مثل المدارس الخاصة والله المناهج هي الي ضيعتنا

 

[أغلى حبيبه]

قبل كانت التقويه اجباريه حق اليهال الضعاف

ورا الدوام ومجانااا

الحين بدال النشاط سوو تقويه عشان الياهل يتشجع ويشد حيله ويروح النشاط مع ربعه

 

[مذهلة 78]

والله يا بنات انا فعلا ما اقدر ادرس مو لاني ما اعرف لااااا لان ما يمديني ماشالله تبارك الرحمن عندي كل المراحل وصج الوقت ما يمدي اقعد معاهم الله يحفظهم وادرسهم اليوم رحت مدرسه ميسلون اللي بالقادسيه طبعا في مراكز خاصه بوزاره التربيه تعطي تقويه برسوم رمزيه 25 دينار للماده واذا اكثر من ماده او خوان يحسبونلج الماده ب20 والدراسه تبدي من 9\10 ليه 21/ 12 طبعا رحت المدرسه الطاقم كله من مصر من المسؤوله لييه المشرفات والمدرسات المهم سجلت الكبار ب 3 مواد عربي وعلوم ورياضيات

وانا اجابل لصغار طبعا ماده العربي يومين بالاسبوع والرياضيات والعلوم هم يومين بالاسبوع بواقع ساعه لكل ماده وبالنسبه لي انا شفت هالمركز الافضل لانه تابع لوزارة التربيه وثاني شي كله بنات يعني ما فيه خلط والرسوم رمزيه مقارنة بباقي المعاهد والله ايجيب اللي فيه الخير وانشالله ايبون الدرجات اللي تبيض الويه