الله يسلمج حبيبتي واختيارج موفق بصراحه اسبانيا شويه عليها كلمه تهبل حيل حيل حبيتها واستانست فيها
اذا بتروحين مدريد وبرشلونه خلي فتره برشلووونه اكثر من مدريد وايد احلى واونس وما ينشبع منها
الأماكن السياحيه وايد بس بذكرلج اللي رحتلها طبعا انه بالسفر احب الملاهي والحدائق والسوق والمناظر الطبيعيه احب اشوف
كل شي واجرب كل شي الا المتاحف مدريد مشهوره بالمتاحف انه مارحتلها يمكن يكون ذوقج غير
مدريد:
احسن مكان للسكن تاخذين فندق بشارع قران فيا اهو شارع التسوق كله طول بعرض شوبينغ
رحنا اوت لت برا مدريد سالي الفندق عنه وايد حبيته احلى من مال برشلونه والبضايع متوفره فيه
رحنا نادي رويال مدريد+رحنا القصر الملكي+رحنا متحف الشمع
رحنا مدينة ملاهي warner bros parkوتاكدي اذا كانت فاتحه لأنها بالشتا تفتح كل سبت بس حلوه بس في العاب مسكرينها
عشان البرد ومو كبيره وايد بس ميزتها بالشتا ان لعبنا كل الألعاب ماكو دور وزحمه كالعاده
رحنا اكبر مول باسبانيا اسمهXanadúبعيد شوي عن مدريد بس يستاهل العنوه خاصه ان فيه بريمارك حبيب الشعب
والأحلى ان يسكر 2 بالليل في week end
رحنا سوق الأحد حبيته وحديقه الرتيرو عجيبه لا تطوفينها خاصه يوم الأحد كلها فعاليات تووووووونس
في بعد تلفريك بمدريد مارحتله وفي اماكن تسوق وايد تقدرين تستفسرين من الفندق
مدريد لما كنا فيها بارده وبشهر واحد راح تكون حيل بارده اخذي معاج ملابس ثقيله..الشعب في مدريد تعيس وتعامله سيء جدا
ويكرهون العرب واحتقار فظيع وما يتكلمون ولا كلمه انجليزي يفهمونج بس عناد حتى yes or no ما يقولونها خلي معاج
كتاب مترجم تستفيدين منه ولا تنسين الشمسيه جوهم كله غيم ومطر خفيف رذاذ يهبل
في بمدريد مصارع الثيران كل احد خفت اروح لها
