نصائح متفرقه لحياه زوجيه مستقره }
* الزواج مو معركه كل طرف يروّض الثاني , ومو رحله ولا سعه صدر
ولا رحله تحقيق ممنوعات .. الزواج مسؤوليه جسيمه ولبنه بناء اسره واجيال راح يكون لهم دور في المجتمع
سواء سلبي أو إيجابي .. فلو كنتي غير مهيأة لهالخطوة لاتستعجلين ., وماعليج من كلام الناس
لقب عانس أفضل من لقب مطلقه .. رغم أن الطلاق موعيب إطلاقاً .
* كل شي بالحياة ماينجح غير بالتخطيط السليم والمدروس .. وهالشي ينطبق على فترة التجهيز للزواج
*مافية شخص بالكون كامل .. ومثل ماعندج عيوب فأكيد شريكج بيكون عندة عيوب .. لكن فية عيوب
ممكن التغاضي عنها .. تجاوزيها ولا تدققين فيها ..ماعدا العيوب الأخلاقية .. (شرب ,ترك صلاه,ضرب,خيانه آلخ )
هالعيوب لايمكن تجاوزها ولا السكوت عنها .. لازم يكون لج رد فعل حقيقي تجاهها ..
وسوي المستحيل عشان ماتحملين من شخص غير سوي أخلاقياً , لأنج راح تكونين الجانية وقتها مو المجني عليها
*من أول تقارب جسدي بينكم لازم تكونين بحالة جسديه رائعه من كل النواحي .. ومايحتاج اوضح أكثر
لأن الإنطباع الأول مهم للغايه عند الرجل .. ولو شاف منج مايكره راح يتقزز منج خاصه لو كان شخص
متطلب .. وماراح يغفر لج هالإنطباع الأول ولا ينساه .. لذلك أهتمي بأدق أدق التفاصيل ..
* صحيح أن العطور حلوة وتجنن ومهمة لكن التعطير سلاح ذو حدين .. أولا لازم تكونين عارفة شنو الروايح
اللي يحبها .. وتحرصين على ارضاء ذائقته بها .. والأهم أن في اللحظات الخاصه
لاتخلين ريحه عطرج صارخه ولا خانقه .. لأنها راح تطغى على ريحه جسدج الخاصه .. غير جذي
جسمج لازم يكون خالي تماما من أي رشه عطر .. والإكتفاء بتعطير الملابس فقط قبل لبسها ..
* الرجل الشرقي يظل فية خصله لايمكن يتخلص منها .. وهي انه مايحب الجرأة الزايدة في
الليله الأولى بالذات .. وممكن يسوقه مخه لو كان مصّدي لتفسيرات مالها داعي ..
لذلك حافظي على أكبر قدر ممكن من الحياء والخجل حتى لو كان مبالغ فية . ولاحقه على الجرأه
*حلو أن شريكج يلاحظ لمساتج وذوقج بالترتيب من أول يوم .. لأن مثل ماقلت لج الإنطباع الأول خطير جداً,
وراح تكونين تحت المجهر من أول يوم .. حرصج على ترتيب كل شي في وقته وحرصج على النظافه
مو بس عشانه ولا فكرته عنج , لا, هالشي هو اللي المفروض يصير ..
انسي عيشتج في بيت أهلج وأني أنه فية ميري ولا كومـآري ممكن ترتب وراج ولا تغسل وراج ..
مع أن هالشي مهوب عذر .. بس خلاص .. انتي في مرحله جديدة محتاجه اثبات وجودج
والشغل في بيتج والقيام بشؤون زوجج مهوب عيب , بالعكس , التمسي المتعه حتى في أصعب
اعمالج .. لإن الإيحاآت الإيجابيه مهمة عشان ماتصابين بالإحباط ..
* لاتكشفين كل أمورج الخاصه وأمور اهلج في أول لياليكم .. خلي بعض الأمور الشخصيه
مؤجله لين تعرفين هالشريك هو قد الثقه ولا لا .. بعض الحريم من أول ليلتين تسدح كل مافي جعبتها من انولدت لين
تزوجت .. وحتى اسرار اهلها تقولها , واذا ماأتفقوا وانفصلو قام يتكلم عنها وعن اهلها .. !
الثقه ماتنعطى لأي شخص كان في يوم وليله .. فلاتصيرين ساذجه
* فية حريم وبدافع مايسمى الخجل تصنع من زوجها رجل بخيل ماديا بدون ماتحس .. تقعد اول الأشهر
كل مابغت شي طلبت من اهلها .. والسبب (مستحيه أقوله ) والنتيجه .. الرجال يستانس على التوفير ,
ويتعود على انها انسانه مالها اي متطلبات ..
لازم تعودينه أن لج التزامات واحتياجات ماديه .. طبعاً بما يتناسب مع مدخوله الشهري .. مو معناه
انج تصلخين الرجال بالصرف وتخلينه يتسلف .. الشي قدر .. على قد دخلة يعطيج ..
حتى في المشاوير , لو عودتيه ان اخوانج يودونج ويجيبونج راح يتعود ويستانس على الراحه ..
لازم يعرف أن الحياه آخذ وعطاء .. وانه ملزوم بمشاويرج والتزاماتج .. وانج طلعتي من ذمه آهلج لذمته .
* لاتتوقعين ان طلباتج ماتتحقق غير بالقوة وفرض الأوامر .. بالذات لو كان شريكج عصبي المزاج
لازم تعرفين من أين تؤكل الكتف .. واللسان مجرد آداه .. يطلع منها الكلام الزين والكلام الشين ..
يبقى عاد اخلاقج وتربيتج ويش تختار لج منه ..
العناد صفه غالبه على الرجال .. ودائماً يسعى للحفاظ على صورة الأسد في نظر نفسه حتى لو كان أرنب
فعطية جوة .. خليه يحس أنج ماكسرتي كلامه .. بس بنفس الوقت تقدرين آذآ روق ناخذين اللي تبين .
وصدقيني ترى جم دمعه حتى لو كانت من شمة بصل .. لها مفعول أقوى من اللعلعه والصوت العالي ..
* لكن مايعني هالكلام أنج تكونين متنازله على طول الخط عن حقوقج .. انا ضد استخدام الصوت العالي
واللسان البذئ لأخذ حق .. لكن ضد التنازل عن حق من الحقوق ..
والتنازلات ترى تبدأ على مراحل .. وتتطور بدون ماتحسين.. ومازلت اشوف حريم يخطي عليها الزوج
ويطقهـآ وبعد مايقول لها كلمه حلوة تسيح معاه وتنسى اللي سواة .. لا ياعزيزتي
ثقي تماماً أن أول مدة يد في حياتج الزوجيه ماراح تكون الأخيرة لو ماأتخذتي موقف حازم وصارم
ومافية أي تراجع .. ولاتخلين لاعيال ولا غيرة سبب تتعذرين فيه عشان تتنازلين
عيالج مايبون ام انهزامية تنطق جدامهم وتنهان بالساعه والدقيقه ..كل شي ولا كرامتج . لو قبرتيها بتكونين
انتهيتي .
*اهتمامج بأدق تفاصيل بيتج وأحتياجات زوجج راح يخليه يعتمد عليج شوي شوي ويوليج القياده مع مرور الوقت
لو اثبتي نفسج وجدارتج بقياده المنزل .
*الزوج مثل الطفل .. باختلاف الحجم فقط .. محتاج صبر ومحتاج دلال ويحب شد انتباهج حتى برفضة لطلباتج
أحياناً ..
*احترامج لأهل زوجج وبالذات أمه هو من حقوق زوجج عليج , ولو بغيتي تكسبين زوجج أكرمي أهله
حتى لو مابين لج أمتنانه , هالشي راح تلاحظينه بتصرفاته .. لأن الرجل الشرقي نادراً مايبدي امتنانه واعتذاره .
* في كل لحظة سوء فهم بينكم .. تداركو الآمر قبل يكبر .. وعالجوا الخلاف الصغير قبل يكبر
ولابد من تخصيص لحظات نقاش عقلاني بدون محاوله كل طرف تبرير تصرفه .
* احتياجاتكم الخاصه والحميمه لازم تناقشونها بكل شفافيه .. وكل طرف يعرف شنو له وشنو عليه
لأن هالأمور لو ماصار فيها اكتفاء راح تكون فجوة كبيره بحياتكم .. والنهايه أن كل طرف ناقصه شي
راح يبحث عنه خارج الحدود .. حتى لو بمجرد النظر المحرم ..
* اسقطي حواجز الخجل بينكم خلال الشهر الأول .. وبالتدريج .. لأن لكل منكم حقوق في جسد الآخر
وكل ماطولت هالحواجز كل ماكان سقوطها أصعب ..
*كونج تحتفظين ببعض خصوصياتج عن زوجج مو معناه أن الجذب محبذ دخوله بينكم ..اكرة صفه في
الوجود هي الجذب .. وفية فرق من إخفاء حقيقة وبين تزييفها ..
