اذا عرفتي ان بنتج المراهقة تكلم واحد شنو تسوين ؟؟؟سؤال لكل ام

[*مطبخ الذواقة*]

اول شي حابه أقولج ان موضوعج وايد حلو

بالنسبة لي أتوقع أني بطقهاا اول شي بعدين اكلمهااا. بس أنا ما اتوقع أني راح اصادف هالموقف لان بناتي 24 ساعه معاي ما نفترق الا وقت النوم ووقت المدررسه

وفوق هذا شاغله وقتهم 24 ساعه ايام الاسبوع دراسه ومعهد والوييك اند مدخلتهم معهد لتعليم الكروشيه ويوم الخميس زواره ببيت اهل أبوهم والسبت بيت


أهلي والجمعة بس يلخصون من دوره الكروشيه انطلعهم أنا ابوهم ولازم الام ترافج بناتها وتقعد وتسولف معاهم وتتغشمر معاهم وتغرقهم حنان

عشان لا يدورون بره

والله خوفج من المداااااارس وبنات ابليس

 

[غلا الغوالي]

انا توني بنت خخ
بس ورب الكعبه
ان قلبي يتتتتقطع ويحترق
اذا شفت مسلمات كذا
وأمهات متهاونات في المسؤؤليه
نسوا حديث

الرسول صلى الله عليه وسلم:

كلكم راع فمسؤول عن رعيته ​

 

[PuPa^^SWeeT]

موضوعج لاامس وتر حسااااس عندي



الله لايقوووله



والله العظيييم


انا بحكم وظييفتي اشووف طالبات فعلا طريقتهم بسوالفهم عن حبايبهم جدامي ماكو خووف مني



اقووول الله لاوصل بناتي لهالمستوى



اخاف من هالشي



الموضوع يبيله ابوو يتفاهم ويا بنته



بس وين اتلاقين ابوو يتفاهم ويا بنته


وما ينلام


انا الام شوفو شلون الخووف قامتني

 

[عاشقة هواك]

انصحها وبس

 

[اميره1980]

لو صار جذي اكيد بتفهم سنها و ان وايد بنات يطيحون بهالمشكلة يعني العصبية و الطق ما يفيد بشي

اللي راح اسويه اني راح اكرهها بالشاب اللي تكلمه
بقولها دقي عليه الحين و قوليله ان اهلي طاحو علي و ان لازم يتقدم و يتزوجها و اكيد الشاب حزتها بيتحاش لان هالاشكال ما تتزوج

و طبعا طلب الزواج بيكون بس جذي مو صج لاني ادري ان بينهي علاقته بالبنت
بس علشان البنت تعرف ان قاعد يتسلى و ما يبيها
و بعد ما يهدون بعض ابتدي اراقبها زيادة و في شغلات اذا كانت مسموحه لها قبل راح تصير بحدود

 

[إلين اليوم]

بصراحه انا مو ام بس برايي لازم توقف بنتها عند حدها وماتتهاون معاها .. إلي تقول تسمعها وتصير صديقتها غلطااانه ..اعرف وحده معاي بالدوام اهي كبيره بالعمر عرفت ان اختها الصغيره 17 سنه تكلم واحد وحاولت تتفاهم معاها وتحل الموضوع بطريقه هاديه لكن اختها صارت من عقب ماكانت تحترمها ماتعد لها اعتبار ولا هيبه ولا كانت ترسل للولد من تلفونها ..لكن لمن تشجعت وعلمت امها امها طاحت فيها طق وبجت ونهارت وماكان من البنت الا انها حست ان الموضوع جايد ومو هين ومن عقبها قامت تبجي وطلعت التلفونات اللي كانت خاشتهم وقامت تترجا امها انها ماتعلم ابوها واخوانها .. برايي الموقف الجد وتكبير الموضوع والتهويل فيه يخوف البنت مو يعقدها .. لازم البنت تنطق عشان تعرف غلطها وانه موضوع جايد .. اذا البنت ماتنطق على هالموضوع على شنو تنطق!! كل المواضيع تنحل بالهدؤ الا الشرف
وامي كانت تسولف عن وحده من جاراتها قبل طقت بنتها بالركوه مالت القهوه لمن كانت تبي تتزوج ولد جيرانهم الصايع وتنحاش من البيت اللحين بنتها متزوجه من واحد له مركزه الاجتماعي ومحترم وكله تقول الله يعطيج العافيه يايمه لمن ماخليتيني اروح مع هذاك الصايع
اللي تقول تفاهم في مواضيع مايبيلها تفاهم من الابناء عشان ماينكسر حاجز الخوف والاحترام للام .. لان مجرد ما امها تكلمها بتفاهم بهالموضوع راح تقويها وتخليها ماتحترمها ..
وهذا رايي الشخصي والاختلاف بالراي لا يفسد للود قضيه

 

[fulla 7elwa]

انا بنت و ابي هالكلمه توصل لكل ام
لمن تدرين ان بنتج سوت غلط لا تطقينها لانها اول شي بتحس انها مظلومه ثاني شي بتاخذها عناد
بالعكس كلميها عطيها امثله قوليلها قصص و عقب قوليلها هالمره مشيتها و بخليها بيننا و المره الجايه انا مالي شغل ابوج و اخوانج يتكفلون فيج
والله راح تكبرين بعينها

 

[* ليــــدي *]

آعتقد بسن المرآهقه البنت محتآجه آحد بعطيهآ إكسترا حنان ..
لان تكون بفترة خربطت هرمونآت ..
محتآجه للعطف للكلآم الحلو للحضن للامان بشكل كبير ومتعب ..
ضروري ان الاهل يعطونهآ هالاحسآس لآن لو نحرمت منه تلجأ للشبآب آو البويآت للبحث عنه ..
و لو طآحت عليها مفروض تعطيهآ كف قوي وتنصحهآ وتفهمها انه حرام وعيب وتوعيها ..



وجهة نظري و شكرا عالموضوع الحلو

 

[*مطبخ الذواقة*]

شكرا لكم

وللاسف نادر الامهات اللي يسمعون بناتهم

 

[ام العبايه]

طبعا وبدون مجامله سحب جيع الصلاحيات اعادة معاملتها على انها ذايقه شي بخليه بعينها مر اقلب عندها حاسة التذوق من اللسان الى الراس ان كنتى لينه بتنعصرين وان جا نصيبها ايسرها وخليها تحب براحتها مع زوجها وان محد طق الباب مالى غير مجابلها بنتى مرضي عليها تتمرمر افتح عيونها اخذها مشاوير ادمجها بالبيت ما اعزلها واعطى لها مساحه للتفكير باشياء تنهيها بعدين في بنات انتركوا او بالاصح اهلهم ما دروا اثقي انهم ما عمروا بيت بناتنا ان كنتم تقرون الدرب طويل وكل شي بتلاقينه جدامج



قريت مره واحد متعرف علي وحده وكانت بينهم رسايل حلوه مالوت اول المهم كانوا يحبون بعض اهلهم ما دروا وراحت السالفه المهم كل واحد شاف طريجه ومرت السنين والريل اشتري بيت جديد وكل يوم مرت تزور جارتها لين جا يوم وجات مرته وقالت بخطب بنتهم لولدا ويوم سال عنهم عرف امها حبيبته رفض وريل بالسما وبالارض والام الا تعلمنى والا انى خاطبتها خاطبنتها ولدى يبيها والريال رافض



تتوقعين ليش رافض سؤال حق بناتنا ؟؟؟؟

 

[دلوعة الحلوين]

لا والله الا بمسك العقال ولا لحزام ونفش جلده فيه وخليه تعرف انه الله حق ادلل وادلع بس في خطوط حمرا ما تتعداه ولا بتشوف شغل الله وكسري للبنت ضلع يطلع له 24 ضلع وخليه تندم على اليوم الي فكرة تحب وحبسه بمكان حتى نور ربي ماتشوفه وتنسحب منه كل مميزات الثقه الاوليه حتى التلفزيون ما تشوفه وامنع اخوانها ما يكلمونها وما تاكل الا عقب ما الناس تخلص من الاكل يعني الفضله عشان تكون عبره لخواتها هذا الي اتوقع اسويه والله يستر على بنات المسلمين ويسترنا فوق الارض وتحت الارض ويوم العرض

 

[DnoOsh]

ياا عمي هذي يبيلهاا كفف على ويهها يسنعهاا

الا لييش تحاجيه

قااص عليه بكلمه كلمتين رااحت الله الله صدقته !

و انا بصراحه اذا اي احد ضافني على الفيس او على الايميل

تلقوني اتهااوش معااه و ما اخليه و راح تلاحظون انه اهوا الخاايف

و لازم يا امهات تحرصوون على بناتكم

ترى مرحلة المراهقه تكون العاطفه مشتعلله يعني اي واحد يقول احبك تحسس بقلبها

و تحححبه !!!!


يا امهات قعدوا ويا بناتكم مو 24 سااعه على الاب توب !

اهوا في بنات ثقه و في بنات مو ثقه !

احرصي على بنتج

مع العلم انا تووني دااشه 14 قبل 3 أيااام


و انا مو أم بس هذا رأيي و وجهة نظري على اني مراهقه


و صراااحه البنت اللي اعرف انها تحاجي صبيان و لو صبي

وااحد تطيييح من عيني علطوول حتى لو كان لها معزه بقلبي

 

[بنوتة كول]

أنا مو أم لكن بقول شنوو ممكن أسوي
أنا أدري إن إلي بسويه غلط بس ما أقدر أغير نفسي أنا جذي
إذا مريت بهالموقف الله لا يقوله
بكفخها و أطقها و يمكن ما أكلمها باختصار بطلع حرتي فيها
أدري بتقولون غلط أنا أدري أنه غلط بس ما أقدر أتحمل الغلط و أمي من النوع إلي ما يطق بالعكس أمي تحب التفاهم أصلا أمي معودتنا أنا نكون صديقاتها أمي أعز صديقة لي بس أنا هذا موقفي و يمكن لو أمي تمر بهالموقف بيكون موقفها عكس موقفي تماما
يمكن إذا صرت أم أفكر غير هالتفكير بس الحين هذا الموقف إلي ممكن يصير
و شكرا صاحبة الموضوع

 

[RAHAF Q8]

متابعه ردود أفعالكم

:050103nbh_prv:

 

[RAHAF Q8]

ايي واذا صار لي خلق أكتب حجي وايد

بقولكم سالفة رفيجتي منى وأمها المصريه

 

[adoreable-q8]

موضوع خطير

والله يهدي بنات المسلمين

 

[mi corazon]

عقل البنت مثل الوعاء

لو ما انمله بشي مفيد تختارينه لها ويشكل الشخصيه اللي تتمنينها .. راح يمليه لها الشارع وصديقاتها

اختاري يالام

عاد لو طحتي عليها تكلم شتسوين ؟

يعتمد على شخصية بنتج

اكو بنات ما تنفع معاهم النصيحه ..

اكو بنات تحس من تغير امها .. تحس ان امها عرفت


نصيحتي ( طبعا مو مجربه لكن بيوم من الايام كنت مراهقه واكيد اعرف شعورهم)

حلو لو الام تقول لبنتها قصه قصيده عن تعبها فيها وشلون لما ولدتها دعت ربها انها تكون بنت صالحه عفيفه تحفظ سمعتها

وتفهمها ان هاذي مو سمعتها بروحهل بل سمعة عايله .. واللي يرضى انه يخدع ناس ببنتهم وما يرضاها لخواته هذا خسيس ويبي يلعب

واحس حل انها تخير البنت

تقول لها ابيج الحين تقولين له انه يكلم اهله ويخطبونج خلال هالشهر بشرط ما تكلمه

لو جاد راح يتقدم حتى لو كانت مراهقه واهني تبين نيته

لو مو جاد ماراح تشوف له اثر وبتعرف انه نذل

ولو مانفع هذا ولا ذاك .. مالها الا طلب العون من الله والدعاء بالهدايه

 

[Nanoosa]

انا من يوم كان عمري 6 سنين كانت امي تييني و تقولي شنو صار معاها بالدوام و اذا عندها مشكله تاخذ رايي فيها

ساعات انصدم انها ليش تناقشني مع اني صغيرة بس أستانس وقتها انها معطتني أهميه فآخذ و اعطي معاها

فبيّنت لي ان مهما كانت مشاكلنا ما نخش عن بعض

حلوه الحركة اللي سوتها علشان ما تخليني اخاف اني اناقشها أي شي خاشته بقلبي ليما اكبر

لما كان عمري 12 كنت معجبه بواحد من اهلي (شي طبيعي) فانا رحت و قلت حق امي و اهي ما عصبت ولا شي تقول هذا شي طبيعي و كلنا انعجبنا بصبيان و هذا مو غلط ولا عيب بس الغلط انج تروحين تكلمينه او ان يصير بينكم شي تقولي خلي مشاعرج حق نفسج و باجر راح تضحكين على نفسج

انا الحين عمري 19 و لي يومج اي شي يصير لي اقول حق امي .. احسها رفيجتي مو امي

حبيت اوصل من كلامي ان اذا البنت متربية ما ينخاف عليها

 

[*مطبخ الذواقة*]

حبيت اوصل من كلامي ان اذا البنت متربية ما ينخاف عليها


--------------- عدل حبيبتي بس الخوووف كل الخووووف من الصحبه السيئة ..شلون نسيطر النت من صوب والمرسه والشارع

الله المستعااااااااااان




ا

 

[Green tea 93]

انا بنت بس لو انحطيت بهل الموقف

ليش اخلي بنتي تكلم و تلجأ لأحد من برا اذا انا مربيتها على الدين و مو مخليه عليها قاصر !!!


و في امهات قالوا اطقها و اسحب تلفونها و ما اخليها تاكل يبا البنت اذا ربطتيها و منعتي عنها كل شي اذا تبي الخراب بتوصل له لا تقولين اطقها

ذيك اليوم بنت قاعده تسولف ان امها لما جكتها تكلم طقتها طق اليهد و ما هدتها الا لما انكسرت الخيزرانه تقول بنفس اليوم رديت كلمت

انا ما اقول اني ضد العقاب لا تتعاقب بس بحدود