ليش الوافدين يقدرون واحنا مانقدر ...!!!!

[نور بوبيان]

السلام عليكم ورحمة الله وبركاته :

ودنا نناقش موضوع التوفير ...

الحمد لله ......الله من علينا بنعمة الوظيفه أو أي عمل آخر نكسب منه المال...

انزين بعد مانقبض المعاش أو المال يتمزق إربا إربا بين الأقصاد والتموين والجمعيه ومعاشات الخدم ...

و...و...و...الخ

كم وحده اشتغلت وكدت بالوظيفه وهذا يصرخ عليها وهاذي اتناجرها...وهاذا يتأمر عليها واهيا صابره

علشان هالبيزات إللي اتبرد قلبها وتصرفها على بيتها واعيالها ويمكن تنسى تشتري شي لها... ولما تتقاعد

اتدور في رصيدها وإلا زيرو .... واتفكر واتأنب نفسها ليش ماوفرت لنفسي شي ...

لو نضرب المال إللي ناخذه شهريا بالسنه يطلع لنا بالآلاف وينهم وين تبخروا ...

نبي نحط لنا حلول علشان لاتطير لفلوس بلمح البصر....

لاتقولون نو وي ... نقدر .... ونقدر ... ونقدر ...

ليش الوافدين يقدرون يوفرون ويمتلكون العقارات والدكاكين وغيرها في بلدنا وبلدهم (( عليهم بالعافيه))

واحنا مانقدر ....؟؟؟؟؟؟؟؟؟؟؟؟


موبس تعطوني الحلول أبي شي عملي يعني من ألحين نوفر ....واتكون عندنا إرادة عدم تمزيق المعاش

إربا إربا ...

وشعارنا :

لا لتمزيق المعاش إربا إربا ...



أنا بعطيكم فكره ويمكن أكثرنا يسوونها :

الصدقه ... مجربه والحمدلله يدخل عليج الخير من كل مكان ...

والجمعيه أو الحطه الشهرية ... وهاذي تنفع بس هم قطعناها إربا إربا ولا وفرنا منها حتى لو شي بسيط


غالياتي نبي حلول ونتقيد فيها لعل وعسى تشوفين نتيجة من عرق جبينج....

--------------------------

 

[طووم]

يسلمو جده كويتيه على الموضوع انا اقولج خطه اسويها اول شي حاولت انه اخفف من الخدم ماكو غير وحده ولاتقولون بيت كبير ويهال وحده وراعية البيت وياها تكفي لو بيت دورين بس يبيله تنظيم وترتيب ثاني شي مو كل شي نشوفه نشتريه وكل شهر لا حسب الاحتياجات مثل لبس وهسوالف وقبل ماروح السوق اكتب شنو الي ابيه واذا كان ضرووري وصرت ما اخذ لبس الا اذا في مناسبه ومن الاهل بعد يعني الكبت متروووووووووس هدوم ليش ونصها ناسين شكلها لانه مانلبسها وكل غاليه واهم شغله انه صرت سويت حصاله بالبيت مثل اليهال ومصكره بقفل هههههه وكل شهر احط فيها خمسين دينار وهذا محد يدري عنه الا انتوا الحين سر لاتفضحوني ومسميتها فلوس لاخر العمر او اذا صار شي لاسمح الله المهم هالملبلغ مخليته لتالي العمر هالدنيا ماكو شي مضمون فيها لازوج ولا عيال ولا اهل ولا قولتهم القرش الابيض ينفع باليوم الاسود من كثر مانشوف بلاوي صايره وعسى الله يوفق الجميع

 

[طمــوح]

لأن الوافدين ما عندهم المصاريف اللي عندنا !!

كل اسبوعين رايحه السوق و كل شهر جنطه و كل يوم مطاعم !!

 

[أم جوري]

حنا لان عايشين في وطنا مصاريف اكثر بيتنا فيه سيارتنا فيه عيالنا فيه وحنا ككويتين تعلمنا نشتري على مستوى معين والوافدين ما يشترون سيارة نوعيتها نفس نوعية وموديل سيارتنا وكذلك البيت او حتى الشقة

الاثاث والفراش والملابس وحتى الاكل

بعدين حنا عندنا الواجبات الاجتماعية وتقديم الهدايا ... ( هذي بروحها ميزانية )


هذا ما يعني انه حنا نقدر نوفر

يعني مثلا وايد عندهم بطاقة الفيزا والماستر كارد وهذي بس لو تكسرينها وتلغينها بتوفرين نص مصروفاتش

اذكر مرة في حلقة لاوبرا اسمها Bebit Diet وايد استفدت منها كل الحلقة كان شلون تقضين على الديون وتوفرين فلوسش ...

 

[عرموشة]

بصراحه انا مريت بموقف قلت لازم اوفر علشان جذي 120 حقت الحكومة راح اوفرها باذن الله

والله كريم

 

[NoWay2know]

المصاريف تفرق وكل شي يفرق، وكل واحد وطموحه بغض النظر عن الجنسية

 

[أعرف قدر نفسي]

تبين حلول ؟ او اسباب ؟

احنا فينا العياب - ماعمري شفت وحدة منا مسكت ورقة العروض والخصومات مالت دعايات كارور اومركز سلطان ورحنا نشتري حسب العروض ؟

اهم ما شاء الله عليهم بس يشترون حسب احتياجهم واحنا نشتري اللي نبي او ما نبي و اغلبه تخلص صلاحيته
عندنا المظاهر لازم جنطة ماركة او ساعة ( او اجمع الفلوس يمكن احتاجهم علاج او زواج عيالي )
بيوتنا متروسة العاب عيالنا وكل ماركة اغلي من الثانية
لازم سفر كل صيف
البدله اللي نلبسها في استقبال او عرس نستحي نلبسها مرة ثانية ( بطر و تبذير في نظري )

الحمد يزيد النعم ( هل نحمد الله ) ؟


هذا اللي طري ع بالي الحين

 

[طال السكوت]

على طارى الصدقه ابي اسالكم عن الاكششاك اللى اول نشوفهااا

وينها اختفت ياربي ......والله يا بنات ماعاد اشوفها كلش ؟؟

اذا نبي نتصدق بشي بسيط ما يسوى اروح للجنه واصف دور .......ابي الاكشاك والصناديق وين بالضبط

وانا ترى من الفحيحيل ؟؟ ياليت تدلونى ولكم الاجر

 

[supermarket]

تدرين ليش ؟ لان الكويتيين يستحون يقاطعون الغالي لايقولون عنهم بخلا

يستحون يشوفون الاسعار يمشون ويقطون بالعربانة علشان لحد يقول ويييي شوفوا هذي قاعدة اتدقق بالاسعار ... الحمدلله والشكر جعص !!

واذا لقوا الشغلة بمكان ارخص يستحون يتعنون له علشان لايقولون طاااااااااااااااااااقة طريج علشان فرق 20 فلس !!

وهذا ينطبق بعد فرق السعر : علبة فول نوعين .. نوع ب100 فلس ونوع ب 200 فلس ... طبيعي واحنا مغمضين بناخذ اللي ب200 اكيد احسن " ماركة "

يعني اذكر مرة انطرح موضوع بالمنتدى شلون تدققون عالاسعار وكان مضمونة : من صجكم تدققون بالاسعار !!! فشششلة








سامحيني بس هذا حالنا ومن جذي الله خافس فينا

 

[Q8-Lady]

صج الفلوس مافيها بركة عشان جذية لازم الواحد يتصدق عشان يطرح البركة في المعاش
ثاني شي نشتري اللي نبي واللي مانبيها عشان جذيه ما يجي نص الشهر الا مفلسين
لازم ميزانية سنعه ونوفر منها .
عطونا اراء حلول يابنات لا يوقف ====وحدة تعاني

 

[أعرف قدر نفسي]

حبي اذا تبين ميزانية

1-حطي ورقة وكتبي شنو يدخل لك فلوس راتبك وجان زين الزوج يحط معاج
2-بعدين حطي المصاريف الثابتة ما تتغير كل شهر مثل ( قسط سيارة - ايجار - راتب شغالة - صدقة شهرية - مصروف للعيال - مصروف البيت .... )
3-جمعي المصاريف
4- ( مدخولكم - مصروفكم الثابت ) = اللي بقي لك من الراتب
5- اول شيء شيلي مبلغ محترم لج ذخر ( لزواج العيال - صحتك )
6- الباقي للمصاريف اللي تتغير كل شهر وجان زين ما تصرفين ( هدايا ولادات واستقبالات )

هذا قد اللي اعرفه وانا قدها طبعا

 

[@ربانة العود@]

مشكلة هالمصاريف
احنا الي ذابحنا المظاهر والله
عندج لبس السهره لبسة وحده بس وبعدين ماينلبس وتشترينه بالسعر الفلاني اهما لا مشالله عليهم
و احنا اذا رديتي لبستي نفس اللبس مرة ثانية شوفي الحجي عاااد
ويييع جعصة عندها كل هالفلوس وياية بنفس النفنوف

 

[عاشقة S ببساطه]

جااااااااااااااان زين نقدر ندخر والله انه احنا لاعبين بالفلوووس لعب الله يستر من اللي بيصير فينا والسبب اللعب بهالفلوس

عطووونا حلووول علشان نقدر ندخر للمستقبل

 

[داريني]

حجيج عدل
بس مجتمعنا يحب التبذر والمظاهر
ومناسبتنا وايد
ونحب الشي العدل ما نرضى الاقل
والله انا مره شفت دكتوره عيالي تشتري ملابسها من الجوهره
قلت هذي يمكن معاشها يصك 3 الاف وتشتري من اهني
عيل احنا لو معاشنا 400 نشتري بدله ب200 والباجي كماليات وتطير الفلوس

الحل انه تصير عندنا اراده ونصكر عيونا مثل الحصان وما نطالع فوووووووووق وايد

صج لي قال المثل مد ريولك على قد لحافك

 

[العاذرية]

السلام عليكم
انا عن نفسي اعرف اوفر لله الحمد كل شهر اسوي جدول بالمصاريف الاساسيه والثابته بعدها المشتريات سواء من جمعيه او سوق وبالاخير يبقى المبلغ اللي راح اوفره..اهم شي الاراده يعني مو لما تشوفين شي ركضتي وشريتيه احنا مو ذابحنا غير الموضه ونبي نسبق بعض باللبس :0bee2e8d89:
شغله ثانيه
الوافدين لهم مصادر دخل غير معاش الوظيفه الاساسيه ولهم حق التجاره بجانب الوظيفه وهالشي محروم منه المواطن واهو الجمع بين وظيفتين..المدرسين الوافديين يعطون دروس خصوصيه والاطباء يشتغلون عيادات خاصه والمندوب عنده وظيفه العصر غير وظيفة الصبح هذول ناس تغربو عشان يكدون ويطلعون فلوس حق باجي العمر لان ماعندهم ضمانات لحياتهم مثل ماعندنا وسلامتكم _03BA:

 

[MiSs_ViSTa]

l2naa e7naa 24 sa3h ma63m brah o 9arf o 9rf


ehmaa laa2

o e7nna manshtree ela mn el 9al7ya!

o ehma yshtroon mn el mo3lm wel ma7amed!

hatha el asbab

 

[بنت الدلال]

لان بديرتنا

في وايد اشياء يصرفونها الناس عندنا


وعروس واستقبالات وولادات وغيره وغيره كلها تكلف


اذا كل وحده بتولد بتسوي استقبال وبنقط 4 او 5 الاف على المستشفى والغرفه الاكبر والشكر والكاكاو والقميص والشراشف وكل هذا واهي ماعندها غير معاشها

وبتلبس عيالها اكشخ ماركات واسنع جواتي وجناط وساعات حقها وغير الخدامه والسايق كل هذ يصرف


بس وجهة نظري استانسي بمعاشج وتشري وتسنعي واشتري ماركات جناط وساعات واطقم بعد الواحد متى يستانس بحياته


والطالبات يبون معاش بعــد .. نحتاج احنه بعد هدوم مصاريف

 

[autointoxication]

على طارى الصدقه ابي اسالكم عن الاكششاك اللى اول نشوفهااا

وينها اختفت ياربي ......والله يا بنات ماعاد اشوفها كلش ؟؟

اذا نبي نتصدق بشي بسيط ما يسوى اروح للجنه واصف دور .......ابي الاكشاك والصناديق وين بالضبط

وانا ترى من الفحيحيل ؟؟ ياليت تدلونى ولكم الاجر

امنعوهم صارلهم فترة

 

[autointoxication]

عمري الكويتيين كل واحد يشتغل شغلة وحدة و بس

الاجانب يشتغلون مليون شغلة

تلقينه موظف الصبح و مندوب الظهر و مدرس خصوصي أو سكرتير العصر


باختصار 3 أو 4 رواتب بالشهر

 

[afesa]

احنا ما عندنا قناعه ابدا ابدا ومهما صار عندنا هم نبي ونبي ونبي والشي اللي يعجبنا لازم نشتريه حتى لو عندنا مثله وشعارنا اصرف ما بالجيب وياتيك ما بالغيب ...وحتى عيالنا الصغار صاروا نفسنا يدورون عالماركات وعالشي الغالي ...احنا نحط نفسنا بوضع عالي ما تتحمله ميزانيتنا ونبي نعيش بمستوى توب وكل هذا واحنا على الله وعلى المعاش وبعدين نقول ما عندنا....معانا واحده مصريه بالدوام تشتغل 10سنين واهيه تداوم بنفس الملابس والله ما تغير ونفس الموبايل والسياره وتوها شاريه شقه بمصر بمبلغ 40,000 دينار> موجنيه< دينار كويتي واحنا الحمدلله نشتغل ونكرف واخر الشهر ندور العشره حق البنزين بصراحه الكويتيات يبيلهم اعادة تدريب وتعليم بخصوص الميزانيه والمجتمع الكويتي كله محتاج تضبيط من هالناحيه والله يعينا