سمبوسة الدجاج الملفوفه
المقادير

رقاق سمبوسه من المخبز اومن السوبر ماركت

الحشوه :
بصله وسط مفرومه _ صدرين دجاجه مسلوقه ومفتته اوممكن نص دجاجه مسلوقه ومخليه من العظم ومفتته_ ثلاث فصوص ثوم مفروم _ قرنين فلفل حار مفرومه _ نص حبة فلفل رومي احمر اواخضر مقطعه مكعبات صغيره _ كاس ملفوف مقطع قطع طوليه رفيعه _ كاس جزر مقطع مكعبات صغيره _ كاس بطاطس مقطعه مكعبات صغيره _ ملعقة صغيره ترياكي صوص _ نص ملعقه صغيره لكل من كمون و فلفل اسود وبابريكا واوريقانو _ ملح _ قليل من الدقيق والماء مخلوطين لقفل اطراف السمبوسه.
التغطيه :
بيضتين مخفوقه مع ملعقتين حليب سايل اويستبدل البيض بلبن فقط بدون حليب _ كاسين بقسماط مع ملعقة طعام بارميزان مبشور
زيت للقلي

الطريقه
في مقلاه عميقه شوحي البطاطس والجزر في ربع كاس زيت زيتون لماتستوي وطلعيها من المقلاه وضيفي مكانها البصل والفلفل الرومي والفلفل الحار والملفوف وقلبي لمايتحمر البصل والملفوف وضيفي الدجاج والبطاطس والجزر الي شوحتيها قبل وضيفي لها البهارات والملح وصوص الترياكي وقلبي لدقيقه وطفي عليها النار واتركيها جانبا لتبرد وبعد ماتبرد ضيفي لها نص كاس جبن شدر مبشور اوحسب الرغبه .
اقسمي كل قطعة رقاق نصفين بالعرض وادهني طرف منها بقليل من خليط الدقيق والماء ورصيها جنب بعض واحشيها واطبقي اطرافها الجانبيه ولفيها مثل السبرنق رول وقفلي طرفها بخليط الدقيق والماء وغمسيها بالبيض اوباللبن والبقسماط وضعيها بالفريزر عشر دقائق وسخني الزيت واقليها لما تتحمر وبالعافيه

ممكن تستغني عن خطوة القلي والبيض والبقسماط وتحمريها بملعقتين زيت زيتون في مقلاه عميقه وتغطين عليها عشان ماتنشف.
ممكن عملها بعجينة السبرنق رول بس بدون بيض وبقسماط وتقلى في زيت ومعاه نص قالب صغير زبده تعطي نكهه روعه