جبنة بالبيت وما فيها زيوت ولا شي وغنية بالكالسيوم لانو ما فيها اي شي تاني غير الحليب والمي وبدون مواد حافظة ولا منكهات
ٖ شوية معلومات عن الجبنة :
افضل انواع الجبنة هي الجبنة البيضا بكافة انواعها .. والنسبة للجبنة الصفرا فهي دسمة ولونها اصفر بسبب كمية الدهون اللي فيها اكتر واسوء انواع الجبنة هي جبنة الدهن بصراحة نصدمت من نسبة الزيت اللي فيها 80-90 ٪ زيت وفي كتير دول مانعاها لانو قيمتها الغذائية ضعيفة وللاسف كتير امهات بستخدموها كل يوم لاطفالهم وبعملولهم ساندويشات ع المدرسة منها .. يعني انتي هيك عم تعمليلو ساندويش زيت مش جبنة 😏 واي ست بتعاني من امتلاء جسمها وخاصة المنطقة السفليه تحاول تبتعد عن الاجبان الصفراء قدر الامكان
الجبن الو طرق كتير هاي اسهل طريقة الو وناجحة ان شاء الله مية بالمية .. وان شاء الله بمنشورات جاية رح نزل طريقة اللبن واللبنة وطرق تانية لعمل الجبنة
المقادير :
كيلو حليب بودرة
كوب الا ربع خل +3م.ك خل
لتر ونص ماء
الطريقة سهلة جدا .. بتحطي المي بطنجرة ع الغاز وبتتركيها لحتى تغلي بس تغلي بتطفي النار وبتحطي الحليب وبتحركيه بمضرب الشبك طبعا رح تلاحظي انو مو كل الحليب داب .. بتحطي الحليب بالخلاط وبتخلطيه لحتى تدوب كل التكتلات .. بترجعيه عالطنجرة وبتولعي النار وبضلي تحركي لحتى يغلى . اول ما يغلى بتحطي الخل وبتحركي كم دقيقة رح تلاحظي انو الحليب رح يبلش يعمل كتل بس يعمل معك كتل بتطفي عليه وهون ممكن تضيفيله اضافه انا كتير بحبها اللي هي الحبة السودا او القزحة طعمها كتير طيب مع الاجبان والالبان ومفيدة جدا جدا وبس تطفي النار بتكوني محضرة جاط فوقيه مصفاية والمصفاية بتحطي فيها قطعة قماش مشان نصفي الجبنة من المي .. بتحطي الجبنة وبتمسكي الشاشة او القماشة وبتلميها ع بعض وبتربطيها من فوق وبتحطي فوقها طنجرة مليانة مية مشان تضغط ع الجبنة وتنزل منها كل المي وغطي الطنجرة باحكام مشان لا توقع اي قطرة مي ع الجبنة وبتتركيها لحتى تجمد يعني لو عملتيها الصبح بالليل بتلاقيها جامدة وومكن تخليها لتاني يوم الصبح
هلأ بتجهزي المية اللي رح تحطي الجبنة فيها بتغلي لتر ونص مي ولتحطيلها ملح حسب الرغبة وبتتركيها تبرد ولو حابة تعطيها طعم حطي قرن فلفل اخضر متل ما هو او بتقطعيه لو حبيتي تقوي الطعم او اكتر من قرن حسب رغبتك وحطيها بعلبة مشان تسقطي الجبنة جواتها .. بعد ما تجمد الجبنة رح تفكي القماشة ورخ تلاقيها صارت متل القرص قطعيها بالسكين طبعا رح تكون حلوة لانو ما فيها ملح نهائي وسقطيها بالمي واتركيها يوم تاخد الملوحة من المي ولا تكتري ملح اول شي دوقيها وازا بدك بتزيدي