الكيكة العادية او كيكة الشاي :

رح احكي عن المقادير بعدين تعليمات الخبز واسباب فشل الكيك
نبلش بالمقادير :
3 بيض (لو بتحطي 6 بيضات بالكيكة العادية يعني كل كاسة طحين بتحتاج بيضتين بيطلع معك طعمها اطيب بكتيير )
1كوب وثلاث ارباع كوب سكر
كوب زيت
كوب حليب مدوب فيه معلقة صغير كربونة
3 كوب طحين
فانيلا
3 باكو بيكنج باودر
واختياري ممكن تضيفي شوية عصير ليمونة وبرش ليمونة

الطريقة :
نخفق البيض مع رشة ملح والليمون والفانيلا لحتى يضاعف حجمه .. بضيف السكر وبخفق بعدين الزيت .. اخر شي الحليب (الترتيب مهم) وطبعا بضيف الطحين مع البيكنج باودر بعد ما انخله بالتدريج (لو حبيتي تخلي الكيكه هشة اكتر ممكن تستبدلي معلقتين كبار طحين بمعلقتين كبار نشا )
بحمي الفرن
بحطها بقالب مدهون وبخبزها على نار 180 بتحتاج من نص ساعة ل 45 دقيقة
اسباب فشل الكيك :
عنا اسباب بتتعلق بمرحلة اعداد الكيك واسباب بتتعلق بمرحلة الخبز ..
مرحلة الاعداد :
لازم نلتزم بالمقادير .. وترتيبها .. ومدة الخفق وبالنسبة لمحسنات الكيك انا ما بحبها بحسها بتخلي الكيك ينشف بدل ما تستخدمي محسن كيك انا اعطيتك البدائل ( نشا.. كربونة .. وبنزيد البيض )
مرحلة الخبز :
لازم احمي الفرن لمدة كافيه والمدة بتختلف حسب فرنك انا لما بدي حمي الفرن بستنى لحتى خلص من الكيكة وبروح شغله على 180 وأثناء تحماية الفرن بجهز القالب بدهنو وبحط الكيك فيه يعني كم دقيقة بس لو حميتيه زيادة الكيك بينفخ من الوسط كتير او بينفخ ومن جوا لساتو ني .. اغلب الكيك بيكون على 180 باستثناء بعض الانواع
ممنوع ينفتح الفرن ع الكيك الا بعد مرور ع الاقل 25 دقيقة او نص مدة الخبز يعني لو كيكة رح تاخد ساعة متلا بفتح عليها بعد نص ساعة
بعد ما يستوي الكيك بطفي الفرن وبفتح الباب شوي وبترك الكيكة بالفرن مشان لا تتعرض لصدمة هواء بارد .. وطبعا شايفين التشققات اللي ع الوش هاد دليل انو الكيكة ناجحة مية بالمية وانها وصلت اقصى ارتفاع لالها
وانا ضايفة شوية مكسرات جوات الكيكة
بتمنى تكونو استفدتو 😊