كيلو كوسا حجم صغير، نصف كيلو من لبن البقر او حليب البقر لو ما توفر لبن البقر او اللي ما بحب يستخدمو ممكن تستخدموا لبن الزبادي ما يعادل 500 جرام (هلأ رح يبلش صراعي الداخلي كيف وصللكم نوع اللبن هل هو لبن ولا زبادي😂 لانو كل بلد بيسمو اللبن بطريقتهم ) وقية لحمة مفرومة ناعمة بنقلبها مع 3 بصلات مفرومة ناعمة وبنضيفيلها رشة بهار وملح وقرفة وهيل وبنتركها لتبرد ، بيضة، م.ك نشا، مكعب ماجي او ماجي بودرة، نعنع ، ثوم الطريقة :
بنحفر الكوسا وبنحشيها باللحمة .. بمقلاية بنحط شوية زيت وبنحمر الكوسا ع الجهتين لحتى تذبل وتاخد لون ذهبي .. لتحضير اللبن بنحطو بطنجرة وبنضيفلو كوبين ماء ومعلقة كبيرة نشا وبيضة (البيضة بتعمل عملية ربط من المي واللبن مشان ما يفرط معنا وما تخافو طعمها ما رح تحسو فيه ) وبنخلطهم ع البارد و بعدين بنحطهم ع النار مع التحريك المستمر لحتى الغليان بس تغلي بنضيف الماجي و بنخفف النار ع الأخير .. بندق ثوم وكمية منيحة من النعنع وبنحطهم بمقلاية وبنحط عليهم زيت زيتون وع النار لحتى ياخد الثوم لون ذهبي وبنضيفو ع اللبن وبنحرك وبنشوف طعمه محتاجين ملح بنضيف .. لو حسيتو قوامو جامد بنضيف مي بس اهم شي ما نغطيه بس نخلص لانو لو غطيناه بتتكاثف البخار ع الغطاية وبسير ينقط على اللبن وبسير ع الوش مي مفصولة عن اللبن وبسير شكلو مش لطيف .. وبنقدمو مع رز ابيض او رز بشيعيريه وبنرشع الوش صنوبر وصحتين وهنا