. تشيز كيك الفستق بالرهش ♡♡ ♡ بشرح الطريقه بالتفصيل .. اول شي نطحن علبة بسكوت شاي اولكر الحجم الكبير مع نصف علبة دايجستف الصغيره ونخلط معهم ملعقتين صغار سكر بودره ونصف ملعقه صغيره قرفه ونجيب بيالة الشاهي نحط ثلاث ارباعها زيت والربع الباقي مويه ونصبه عالبسكوت ونعجن ونرصه بصينية التشيز كيك الحجم الصغير وندخلها الفرن لعشر دقايق ونطلعها . هذي طريقتي في البسكوت لا زبده ولا غيره ويطلع متماسك مايتفتت وبنفس الوقت مو القاسي اللي يالله يتقطع .. نجي لطبقة التشيز وهي طريقة نورا النعيم المبدعه مع اضافه بسيطه ولازم الترتيب بالمكونات وتكون كلها بدرجة حرارة الغرفه يعني مطلعتهم من الثلاجه من بدري : سبعمية جرام جبنة فيلادلفيا ( علبتين كبار ونصف علبه صغيره ) نخلطها بالعجانه لحد ماتلين وتروح التكتلات اللي فيها ، نضيف عليها كوب سكر ناعم ونخلط بعدين نضيف فانيليا ونخلط ، نضيف ثلاث بيضات كل مره احط بيضه واخلط لين تختفي بعدين احط البيضه الثانيه وكذا ، نحط عليه علبة ساور كريم ( قشطه رائبه ) ونخلط – مره استبدلته بعلبة زبادي وما أثر عالطعم – نصب عليه ربع كوب كريمة خفق وبعدين ملعقتين كبار دقيق وبالاخير نضيف نصف كوب فستق مطحون ونقطة لون طعام اخضر ونخلط شوي بس .. نغلف صينية التشيز كيك اللي فيها البسكوت بثلاث طبقات قصدير ونصب الخليط عليه وندخله الفرن بحمام مائي لمدة ساعه كامله .. بعد ساعه طفي الفرن وخلي التشيز بوسطه لا تطلعينه ساعه ثانيه بعدين طلعيه واتركيه برا لحد مايبرد تماما ودخليه الثلاجه بعد كذا عالاقل اربع ساعات وكلما طول في الثلاجه افضل .. عند التقديم ممكن تزينيه بغزل البنات ، انا استخدمت الرهش ( الحلاوه الطحينيه ) الناعمه تجي بعلبه بلاستيك غطاها وردي اسمها طعيمه ، فتتها باصابعي بعدين رشيتها عالتشيز كيك وزينته بالورد والفستق .. الورد جايبته لي زوجة اخوي من قطر … يارب اكون شرحت كل شي بالتفصيل وترى الحكي واجد بس تطبيقه سريع وسهل