سينابون

الطريقة : 1 _ منخلط ملعقة خميرة مع ملعقة سكر مع 3 معالق طحين و ربع كاسة حليب دافي منخلطهم مزبوط ومنغطيهم شوي 2 _ مننخل 3 كاسات طحين مع ملعقة صغيرة بكنغ باودر و رشة ملح و ظرف دريم ويب و ملعقتين حليب بودرة و منخلطهم 3 _ منخلط ملعقتين زبدة طرية مع 3 معالق سكر بعدين منضيف ملعقتين زيت و منخلط بعدين ملعقتين لبن ( زبادي ) دافيين و فانيليا ومنخلط بعدين منضيف خليط الخميرة يلي عملنا بالبداية بعدين منضيف بالتناوب خليط الطحين مع ثلاث ارباع الكاس حليب دافي و منخلط مزبوط بملعقة خشب بس تخلص الكمية رح نحصل على عجينة طرية بتلزق بالايد مندهن ايدينا زيت و منعجنها مزبوط وكل ماعجنا رح يخف التلزيق تقريبا 10 دقايق رح تطلع عجينة طرية كتير و ناعمة مندهنها زيت و منغطيها لتخمر من ساعة لساعة و نص ( لازم تاخد راحتها بالتخمير لأن فيها نسبة دهن و سكر عالية ) بعدين قسمت العجينة قسمين و رشيت رشة خفيفة طحين ع سطح العمل و منفرد العجينة بين رقيق و وسط و مندهنها بزبدة طرية بدون مانوصل للطرف (مشان يلزق معنا ومايفتح ع الخبز ) بعدين منرش خليط مكون من سكر قرفة كاكاو محلى ( نسكويك ) و منلفها رول و منسكر الأطراف بعدين منقطعها إما بسكين مشرشر أو بالخيط و منصفهم بصينية الفرن مع ترك مسافة بينهم ومنغطيهم و منتركهم يخمروا شي 20 دقيقة بعدين مندخلهم فرن حامي الرف الوسط و الحرارة وسط بس يتحمروا من تحت منشغل الشواية دقيقة و منطلعهم … 🔵 الصوص : حليب مكثف محلى مع جبنة كيري و رشة فانيليا و منخلطهم … و ممكن نفس الصوص تضيفوا معو كاكاو 🔴 ملعقتين اللبن بالوصفة بديل ع البيضة يلي بحب ممكن يضيف بيض