المقادير:
–
ربع كوب ماء
ربع كوب حليب
4 ملاعق كبيرة زبدة (62 غرام)
رشة ملح + ملعقة صغيرة سكر
نصف كوب طحين
بيض حسب الحاجة (الشرح تحت)
فانيلا (اختياري)
–
الطريقة:
–
✔️ في حلة على النار منحط الميي والزبدة والحليب والملح والسكر ومنحرك حتى تذوب الزبدة ويصير الخليط اول غلوة –
✔️ منضيف الطحين دفعة وحدة ومنحرك بسرعة حتى يختفي كل السائل ومنضل نحرك بعدها حوالي 30 ثانية (الهدف من هاي الخطوة التخلص من الميي الزيادة وننشف الطحين مشان تطلع الاكليرز مقرمشة
–
✔️ مندير هاد الخليط بالخلاط… ومنخليه يضرب شي دقيقة لحتى يطلع البخار منو.
–
✔️ منضيف البيض حبة ومنستنى، حبة ومنستنى. كل الوصفات رح تعطيكم رقم معين لعدد البيض ولكن عن تجربة بحكيلكم وانا ما مخلية وصفة ما عملتها لعجينة الشو، انو عدد البيض بيختلف. لازم نضل نضيف ليوصل لقوام ازا دندلتيه شوي يوقع ببطء، ان شاء الله يكون واضح بالصورة فوق.
–
✔️ بعد ما يوصل للقوام اللي بدنا ياه، مندخلها كيس حلويات ومنستعمل الفتحة اللي عشكل نجمة
الهدف من استعمال شكل النجمة مووووو شغل جمالي، بس لأن بالفرن لما تنفخ حبة الاكلير رح تنفخ بالتساوي بدون تشققات تشويهية متل ما واضح بالصورة.
–
دخلتها الفرن حرارة 250 حوالي 5 دقايق وبعدين وطيتو ل 180 وتركتهم حتى احمروا وصاروا لون ذهبي جميل، حوالي نصف ساعة
–
ثقبتهم اول ما خرجوا مشان البخار اللي جواهم يخرج وما يصيروا طرايا من جوا
–
حشيتهم كريمة الحلويات ومن برا غاناش الشوكولا
الغاناش عبارة عن شوكولا ذوبتها مع كريمة (ربع كوب بربع كوب)
–
صحة وهنا