الكيكة الاسفنجية ممكن تستعملوا اي خليط كيك جاهز سادا أو أي كيكة اسفنجية بتحبوها. المهم كيكات نسبة السكر فيها مو عالية.
–
وصفة بسيطة (كمية صغيرة عملت)
3 بيضات بالخلاط مع نصف كوب سكر، ينخلطوا حوالي 15 دقيقة ليتضاعف حجمو
منضيف فانيلا ورشة ملح وملعقة زبدة مذابة وشوي شوي من فوق لتحت منضيف 1/3 كوب طحين + ملعقتين كبار نشا + 1/4 ملعقة صغيرة بايكنغ باودر ومنخبزها حرارة 170 حوالي 20 دقيقة –
شراب الكراميل
ممكن تستعملوا اي خليط كراميل بس انا هاد بحبو
–
الخليط : ربع كوب حليب + ربع كوب كريمة + ملعقتين حليب مركز محلى + ملعقتين حليب ابو قوس evaporated + رشة ملح (مخلوطين بطاسة) ومنتركهم عجنب
ممكن تستعملو كريمة و حليب فقط –
حطيت 1/3 كوب سكر مع ملعقتين ماء على النار لحديت ما صاو لونه ذهبي. بعدين أضفت خليط الحليب فوق. رح يفور ويكبتل بس منضل نحرك على اوطى نار عنا وكلو بدوب ليصير عنا صلصة
–
منقطع الكيك عشكل دوائر ومنحطها بكاسات التقديم، انا للصورة استعملت كاسة الكافيه نفسها اللي اخدتها والباقي اواني ثانية. منثقب الكيك بعود خشب ومنسقيها بشراب الكراميل ومنتركها تبرد. الكريمة المخفوقة فوق كريمة عادية مضروبة مع ملعقة من صلصة الكراميل.