–
كرات الدجاج عبارة عن: 2 صدر دجاج طحنتهم مع نصف كوب بقسماط + بيضة + بصلة مفرومة + حبتين ثوم + ملح وبهار + بقدونس + ملعقتين زيت زيتون وشكلتهم كرات
–
(ممكن تضيفوا صلصة صويا أو أعشاب إيطالية أو بهارات حرة أو حتى مكعب ماجي، النكهات انتو اختاروا)
–
صلصة الفليفلة الحمرا – جبت حبتين فليفلة حمرا وحطيتهم على الغاز مباشرة فوق النار وتركت الطبقة الخارجية تحترق بالكامل (الصورة فوق) بعدين فورا حطيتهم بكيس وقفلت عليهم وهم سخنين مشان يسهل أقشرها بعدين. بعد ربع ساعة قشرتهم وطلعت الطبقة السودا بكل سهولة –
(🚫ماااااا تغسلوها تحت الماء والا كل النكهة الطيبة بتروح، ازا بدكم امسحوها مسح بيد مبللة مو اكتر)
اللي بيستفسر هل ممكن احطها بالفرن بدل الغاز، الجواب: انا جربت الطريقتين والفرق جدا كبير. لسعة النار بتعطي طيابة اكتر
–
منحضر الماء المغلي بملح وزيت لسلق المعكرونة
–
بهاي الأثناء – بالخلاط منضيف حبتين بندورة مقشرين مع حبات الفليفلة اللي قشرناها فوق واعشاب إيطالية من اختياركم (انا بستعمل بودرة ثوم + ريحان) مع بابريكا وملعقتين زيت زيتون ورشة ملح وسكر وملعقة كبيرة خل – منحطهم بالخلاط ليصيروا متل الصلصة ،ازا كثيف ممكن نضيف ميي. –
بالمقلى منحوس كرات الدجاج اللي حضرناها لتاخد لون ومنشيلها ومنتركها على جنب (لسا ما نضجت، رح تنضج بالصلصة)
بنفس المقلى منضيف زيت ازا لزم ومنحط بصلة مقطعة جوانح مع فطر أو أي خضار بتحبوها ومنتركها تاخد لون (ما ننسى الملح والفلفل الأسود)
منضيف صلصة الفليفلة الحمرا ومنحرك ثم نضيف كرات الدجاج ومنغطي عليها ومنتركها 10 دقايق تنضج تماما. منضيف السباغيتي عليها وما ننسى جبن البارميزان أو الموزاريلا ازا بتحبو.