المقادير:
كوب حليب دافي
2 ملعقة صغيرة خميرة
بيضة
ملعقة لبن
75 غرام زبدة حرارة الغرفة (+زبدة مذابة للدهن)
ملعقة صغيرة ملح
2 ملعقة كبيرة سكر
طحين حسب الحاجة
–
بالعجانة منحط الحليب الدافي والخميرة والسكر ومنتركهم 5 دقايق حتى ترغي (حركة اختيارية ولكن بحب اعمل هيك لأتأكد الخميرة شغالة)
بعد خمس دقايق بتكون طلعت رغاوي ومنضيف البيضة (منضربها بالشوكة) واللبن والملح وكوب طحين ومنشغل الخلاط ،بعد هيك منضيف الطحين بالتدريج لحتى تتشكل عنا عجينة متماسكة بس طرية عند اللمس، منضيف الزبدة بحرارة الغرفة ومنرجع نعجن. هون رح تكون العجينة صارت بقوام جدا ناعم ما يلزق باليد.
–
منحطها على الكاونتر ومنعجن بضع دقايق باليد وبطاسة فيها زيت منتركها تخمر (انا عندي حرارة المطبخ شوي باردة ،تمت ساعتين) المهم يتضاعف حجمها.
–
منفردها على الكاونتر ومنلفها متل السندويشة وبقالب التوست (ممكن ترشوه زيت أو طحين حسب نوعو بس انا شخصيا بحط ورق زبدة فيه بحس اضمن)
–
منتركها تخمر كمان مرة (الصورة فوق👆) ومنحمي الفرن على حرارة 200 إلى 220، مندهنها بزبدة شوي شوي لحتى ما ننفسها، ومنتركها حتى تاخد لون ذهبي جميل (بفرني اخدت 30 دقيقة) وبس تطلع مندهنها كمان مرة بالزبدة من فوق
–
استمتعوا بريحة الخبز بالمطبخ😁😁😁
–
صحة وهنا سلف