◾دقة الثوم البيضا:
🔸️الكثير من الثوم .. كزبرة كمون جوز الطيب وورق غار مطحون وخل ابيض وشوي ماء وممكن رشة زيت زيتون بدون مقادير .. عالنظر والطعم ونعطيها جق جق جق وتصير جاهزة
.
◾دقة الشطه الحمرا:
🔸️نقشر الطماطم ونهرسه (انا برشته وفكيت نفسي)نحطه عالنار لمن يغلي
.
🔸️بمقلى ثاني احط زيت او سمنه واحمس ثوم كثييييير لمن يشقر انزل عليه كزبرة وكمون وفلفل ابيض .. وانزل طشة الثوم عالصلصة
.
🔸️بعدين اضبط الملح واضيف معحون شطه حمرا .. حطين نتتتتتفه بس علشان البيت ياكلون ولا لو علي كان حطيت شطه كثييييير
.
🔸️نتركها على نار هادية تتسكر وممكن اضافة معجون وشوي ماء لتخفيفها .. وممكن طحنها تصير ناعمه وكله حسب الرغبه
.
◾تحضير البصل المقلي:
🔸️نفرم البصل شرايح رفيعه ونرش عليها خليط طحين وملح ونتفة كركم ونفركهم بإيدنا ونسخن زيت غزييير لما يصير حاااامي ننزل فيه كمية بسيطه بدون تحريك بس يبدأ يطفو عالزيت نحركه شي بسيط ونرفعه من الزيت اول مايبدا يشقر لانه بيكمل استواء واحمرار برة الزيت لأنه يكون محافظ عالزيت بداخله حتى بعد مانشيله
.
اللي يحب يشوف فيديو قلي البصل يضغط على هذا الهاشتاق 👈 #بصل_مقلي_كلحه
.
◾تحضير الرز:
🔸️انا سلقت العدس البني الصغير ثلاث ارباع سلق .. اعرف لمن اذوق حبه تكون تقرش من برة ومستوية من الداخل لا تخلونه ساعه عالنار يذوب ويفش ويصير مو حلو بس اضفت عليه شوية ملح وكمون على ماء السلق
.
🔸️غسلت رز مصري بدون نقع وقلبته عالنار مع شوية سمنه والاحلى استخدام الزيت اللي قلينا فيه البصل 😍 ونزلت عليه العدس وقلبت الجميع واضفت ملح وفلفل ابيض
.
🔸️صبيت ماي سلق العدس وكملت بماء عادي وكبست الرز كالمعتاد
.
◾المعكرونه:
🔸️مو اختراع .. كالعادة غليت ماء فيه ملح ونزلت فيه المعكرونه .. ونفس الشي لاتخلونها مدة طويله تذوب وتفلطح وتصير كائن فضائي
.
🔸️رفعتها عن النار .. صفيتها .. وعلطوول نزلتها بماء بااااااارد علشان يوقف الاستواء وتحافظ على شكلها
.بالف صحه ♥️