سينامون رولز سيريال🥣💘
لفوا بالصورة عشان تشوفون فيديو الخطوات واسمعوا القرمشة اخر الفيديو 😄💕
.
أحلى من أتابع سووا مخبوزات سيريال ونوعوا كورن فليكس وكرواسان وكوكيز وبانكيك (شوفوا الستوري)🥐🍪🍩🥞 .

صراحة أبدا مايستهويني هالنوع من الافكار 🙈 بس فجأة قررت أسوي سينامون رولز سيريال عشان أثبت وجوده 😂ولأنه فعلا لذيذ مع الحليب جدا وخاصة لو القرفة كثيرة فيه😍👌🏻
إذا تحبون مثل هذه الافكار جربوها بالسينابون رولز ومو لازم تتقيدون بالمقادير اللي سويتها وممكن تسوونها بأي عجينة مفضلة لكم👍🏻
.
المقادير :
١ كوب دقيق
ربع ملعقة صغيرة خميرة
١ ملعقة طعام سكر
رشة ملح
٢٠ غم زبدة بحرارة الغرفة
١/٢ كوب حليب -بحرارة الغرفة
للحشوة:
زبدة مذابه
سكر بني مع قرفه
الطريقة :
نخلط المقادير الحافة مع الدقيق ثم نضيف عليها الحليب والزبدة ونعجن وتترك تتخمر ساعة تقريبا .
تقسم العجينة ل٨ اقسام ويفرد كل قسم بالطول ،، تقريبا ٢٠ لـ٣٠ سم .
تمسح بالزبدة وتغطى بالسكر مع الغرفة وتلف مع شدها جيدا حتى مايكون في فراغات.
تدخل الفريزر ساعة تقريبا حتى يسهل تقطيعها، والتجميد يحافظ على شكل الحلقات الدائري . اذا قطعتوها وهي لينة بتتفغص الحلقات وأنتم تقطعونها >>يارب فهمتوا علي😂
ترتب بالصينية وتخبز على حرارة ٣٥٠ فهرنهايت (اذا فرنكم فيه مروحة أفضل تستخدمونها)
احتاجت ١٠ ل١٢ دقيقة أو راقبوها حتى تتشقر من تحت .شغلوا الفرن من فوق وشفروا الوجه وبالعافية .

ملاحظات:
١- الاكواب والملاعق معيارية
ملعقة طعام = 1TBSP
ملعقة صغيرة = ملعقة شاي = 1TSP

٢- بعض حبات السينامون رولز ممكن توزعون على وجهها جليز مكون من سكربودرة مخلوط معه نقط من الحليب البارد . بعد ماتوزعونه على وجه الحبات راح ينشف خلال نص ساعة تقريبا يعني ماراح تكون الحبات رطبة .