طريقه الخبز الهندي ” الچباتي ” 👳🏾🙏🏻
طريقتها طويله شويا و دقيقه لازم تركزو معايا في الخطوات و اهم شي طريقه الشوي 👌🏻 ..
وعشان تزبوطها شوفو كيف المقادير و الطريقه ✨
اول شي العجينه :
٥ كاسات دقيق
٦ ملاعق حليب
ملعقه كبيره سمن
رشه ملح
مويه لازم تكون دافيه و الكميه مو محدده انتو تحددوها وقت العجن 💦..
الخطوه الاولى ؛
نعجن المكونات كويس الين تطرا العجينه و تتماسك و نطلع منها تقريبا ٤ كرات متساويه ..
بعدين اخذت كل كوره و فردتها و دهنتها بسمن و قطعتها بالطول ٣ اقسام و لفيتها بالطول من فوق لتحت ، يطلع يشكلها تقريبا زي السينابون و ضغطت عليها و رشيتها بدقيق و غطيتها تقريبا ٥ دقايق ترتاح شويا 🌞❤️ – و نقدرو تدخلوها الفريزه و هيا بالشكلدا و وقت ما تحتاجوها طلعوها
الخطوه الثانيه ✌🏻️✨
بعد ٥ دقايق ناخذ العجينه الي لفيناها و نفردها بس ما تخولها مرره نحيفه ، خلوها وسط ..
و نجيب تاوه و نشغل تحتها النار تكون متوسطه ل عاليه ولما تسخن نرمي عليها العجينه و نتركها الين تتقمر اذا اتقمرت نقلبها للوجه التاني و نخليها كمان تتقمر ..
اذا اتقمر الوجهين و صار لونه ذهبي ، ناخذ قطعه قماش او روق مناديل و نبدا نحرك العجين زي ما سويت بالضبط تقريبا ٣٠ ثانيه ، ✨والسبب : الحركه دي تخليها مقرمشه و يكون لها طبقات و تنتفخ شويا و السمن يدخل جوتها المهم الحركه دي لازم منها يخليهامضبوطه ع الآخر👍🏻
آخر حاجه ندهنها الوجه بسمن او زبده بس الافضل سمن ❤️ و نثنيها على بعض و نضغط عليها شويه و نقلبها عشان يتوزع السمن للجهتين و بسس 👳🏾🙏