عجينة الكبة

كيلو برغل ناعم بنقيه وبنغسلو وبنحطه بمصفاية وبنتركو لمدة خمس دقايق او ممكن تنقعيه ربع ساعة بالمي .. بنطحنه مع نص كيلو لحمة هبرة ( يعني لحمة صافية بدون دهن او عروق وبتكون موجودة عند اللحام خصوصي للكبة ) وبنحط معهم بصلتين حجم وسط وشوية بهارات : ملح وفلفل اسود وشوية كمون وبهار مشكل واختياري ممكن تحطي شوية بردقوش ‘ مردكوش وكزبرة يابسة وممكن تستغني عنهم وبنطحنهم كلهم سوا كتير منيح لتسير عنا عجينة .. الحشوة عبارة عن لحمة معصجة يعني بصل مع لحمة مفرومة ع الناعم وبنضيفلها ملح وفلفل اسود ورشة قرفة واللي بيحب ممكن يضيف مكسرات للحشوة متل الصنوبر او الفستق .. بتحطي جنبك صحن مي وبنبلش نكبب العجينة وبنحشيها وممكن تعمليها بهالشكل قدامك وممكن تعمليها كرات واثناء التكبيب بنبلل اصابعنا لتسهل علينا الشغل وبنقليها بزيت غزير ولازم يكون حامي مشان ما تفرط معك بالزيت .. بالنسبة للتفريز رح تعمليها بنفس الخطوات وبتحطي طبقة كبة بعلبة او صينية وبدخليها الفريزر بس تتماسك اول طبقة وتجمد بنحط ورقة زبدة وبنحط كمان طبقة وهكذا يعني ما بنحطهم سوا لانو رح تفرط فوق بعضها وبس بدنا نقليهم بنحمي الزيت وعلى طول من الفريزر ع القلاية ما نستنى عليها بس تسيح
وطبعا ما ننسى صحن التبولة جنبها 😍