مربى التين ✨
المربى مره ممتع شغله وريحته سعادة في البيت💕
فيه شوية معلومات قرأتها عن المربيات راح أشارككم اللي عرفته:
إن أساس المربيات ٤ عناصر :
بكتين وسكر وحمض وماء
وإن هذه العناصر ممكن تكون كلها أو بعضها موجودة في الفواكه بنسب متفاوتة .
مثل البكتين ببعض الحمضيات والتفاح وأنواع التوت وبعض أنواع العنب يكون غني فيها .
البكتين غالباً يوجد في البذور والقشور للفواكه مثل البرتقال والليمون ..
وتختلف نسبة وجوده من فاكهة لأخرى.
لهالسبب أحيانا يفضلون استخدام بودرة البكتين الجاهزة تشبه النشاء في عملها ويضيفونها للمربيات ولكن بنسب معينة يختلف حسب نسبة احتواء الفواكه على البكتين .
مثلا التفاح أو التوت الناضج مايحتاج إضافة بكتين له .
لكن مثل الكرز والجريب فروت والبرتقال لأننا نتخلص من القشور والبذور واللي هي مصدر البكتين بنحتاج بودرة بكتين فيه
بنسبه بسيطة تقدر بواحد ١٪؜ من نسبة الفواكه .
وتزيد النسبة حسب نوع الفاكهة يعني مثل التين
والفراولة أقل نسبة بكتين داخلها فتحتاج ٢٪؜ من وزنها بودرة بكتين جاهزة.
البكتين يحسن قوام المربى ويعطيه القوام الهلامي الناعم مثل الجل واللي يسهل لنا دهن المربى على الخبزة بسلاسة وأيضا وجود البكتين مع السكر والحامض يعطي المربى مدة صلاحية أطول.
ومثل مالبكتين متفاوت النسب داخل حبة الفاكهة كذلك الحامض !
سبحان الله كل فاكهة فيها نسبة حموضة مختلفة ومتفاوتة ولو ضربنا مثال على التين فالتين أقل نسبة حموضة بالمقارنة مع تفاح أو برتقال.
لهالسبب يضاف غالباً ليمون أو ملح ليمون للمربيات
عشن يحقق التوازن المطلوب لعمل المربى وهذا غير إنه يساعد على آداء السكر خلال طبخ المربى ويعطينا نتيجة أفضل .
السكر في المربيات غالبا تكون نسبته عالية متقاربة مع نسبة الفاكهة وهالشي مو بس عشان الطعم ولكن عشان تشكيل قوام المربى وأيضا السكر يحفظ المربى لمدة أطول .
.
.
بالنسبة بمربى التين اللي سويته:
سويته من دون بكتين لأني ماراح أسوي كميات كبيرة منه فهو فقط للبيت وراح استهلكه خلال أيام .
وممكن إذا حابين تحصلون على بكتين للشراء البكتين الجاهز أو خلط التين مع فاكهة ثانية غنية بالبكتين مثل التوت المستوي أو التفاح وقرأت معلومة إنه التين الغير مستوي فيه بكتين بس ماقدرت أعرف صحتها ..
التين اللي عندي حلو مره ومستوي لذلك قللت السكر لنصف الكمية .

ممكن تسوون المربى على يومين : يعني تضاف نصف كمية السكر على التين وتخلونها عالاقل ساعة او ليلة بالثلاجة وبعدين تضيفون بقية السكر والمقادير و تطبخونها..