لحظة لحظة✋🏼لاتحسبون الخبز مااستوى 😅ترى مستوى لكن مانحمره لأننا بنشويه في الأخير وحبيت أوضح لكم شكله بالصورة قبل الشوي وبعده😌🥖 خبز البانيني مثل اللي بالمقاهي وأحلى بعد لأنه من شغلكم😍👌🏼 خطوات عمله موجود بسناب اليوم وخلال هاليومين راح أنزلها مع فيديو الخطوات بالمدونة بإذن الله👍🏼
الخبز هذا الحلو فيه إنه يعطيكم نتيجة إنه طازج حتى لو كنتوا حافظينه بالفريزر لمدة طويلة والسبب إنه ينعمل على مرحلتين مرحلة بالفرن وهي اللي بعدها ممكن تحفظونه بالفريزر ومرحلة قبل التقديم تشوونه بالشواية ويرجع فريش 👍🏼 المقادير:
٤ كوب دقيق
٢ملعقة شاي خميرة
٢ملعقة شاي سكر
رشة ملح
١/٤ كوب زيت زيتون
١/٢ ١ كوب ماء

الطريقة:
نخلط المقادير مع بعض ونعجنها وزيدوا ماء عند الحاجة
تترك تخمر يتضاعف حجمها (نصف ساعة احتاجت معي)
ممكن تكورونها وتفردونها لأقراص مستطيلة وممكن تفردونها لشكل مستطيل ثم تقصصونها بعرض ٣ أو ٤ سم
راعوا يكون فيه مسافة بين كل قطعة والثانية
غطوها بمنشفة على مايسخن الفرن تقريبا ربع ساعة
جهزوا الفرن على حرارة ٤٠٠ فهرنهايت =٢٠٠سيلزيوس
امسحوا سطح كل قطعة بالقليل من الماء (الماء يساعد على ترطيب السطح ومنع تشقق الخبز بالفرن)
تخبز ١٥ ل٢٠ دقيقة بس ماتحمرونها
بعد ماتبرد تحشونها ثم تشوى بالشواية أو تشوونها ثم تحشى بالحشوة المرغوبة وبالعافية
ملاحظة: ممكن تصلحون نصف مقدار الدقيق بر ونصفه ابيض وممكن تضيفون للعجينة حبوب مثل حبوب الخردل او اليانسون أو البوبي سيد …الخ وممكن تضيفون له أعشاب إيطالية .