ياهلا .. العشر مباركة عليكم 🌙 واللهم اعتق رقابنا من النار واجعلنا من صوامه وقوامه .. قولووووا آمين .. بسبوستي اليوم بحشوه المهلبية اللي باااااارده وتسرسح عليكم مع الفطور عاد قد نزلت لكم وصفه بسبوسه بحشوه مهلبيه لكن هذي غيررر لانها مهلبيه بنكهه مويه الورد وجبن الكيري رررررررروعه والاهم تصلحونها قبل بيوم حتي تبرد وتتماسك صح 👌.
.
الطريقه .. قشطه مثل التاج يعني قشطه بعلبه معدن هي المقياس اللي بنقيس فيه المقادير ..
بخلاط الكيك .. نخلط علبه قشطه + ٢ بيض + علبه سكر + ملعقة صغيره فانليا ونخلط هالمقادير خمس دقايق حتي يمتزج الخليط زين بعد كيذا + علبه زيت + ظرف كريم كراميل ونخلط شوي + علبه جوز هند + علبتين سميد + علبه حليب بودرة +ملعقه كبيره بكنج بودر واذا الخليط طلع معكم شوي ثقيل اضيفوا + نص بياله ماء . نصب نص الخليط بالصينيه وندخله الفرن يتحمر من فوق وتحت وبعدها نوزع عليه حشوه المهلبيه .. وبعد كيذا نخفف الجزء الثاني من خليط البسبوسه بشوي ماء حتي نقدر نوزعه علي المهلبيه وندخله الفرن من فوق فقط وطبعا علي الرف الوسط وعلي حراره متوسطه حتي تتحمر علي راحتها واول ماتطلع نسقيها بحليب مكثف ونغطيها حتي تتشرب وتصير ليننننه 👌 . وبعد ماتبرد شوي ندخلها الثلاجه .. .
حشوه المهلبيه مع الجبن الكيري .. بقدر صغير .. ثلاث كاسات ماء + ظرفين مهلبيه + ست ملاعق حليب بودره + قشطه قيمر صغير + ست حبات جبن كيري + نص فنجال سكر اذا حابين لان ظروف المهلبيه فيها سكر .. بعد كيذا نحركهم شوي ونحط القدر علي النار ونستمر بالتحريك حتي تذوب القشطه والجبن تماما واذا حسيتوا ان الحشوه ثقيله ممكن تزيدون شوي ماء وبكيذا تكون الحشوه جاهزه . .
وصدقوني لااااتفوتكم وعلي فكره كل ماجلست بالثلاجه كل ماطلعت اطعم واطعم يعني عادي تقهون منها كم يوم 🤣. حركوا الصور حتي تفهمون الطريقه اكثر 👌 وياعساها بالف عافيه علي قلوبكم ولاتنسوني من دعواتكم الطيبة ❤️ #بسبوسة_نورة_الوهيبي#