ياهلا .. اليوم وصفتي معشوق البنات والحريم (ورق العنب ) مهههبل بنّا والله 😅 وحبيت اعلمكم علي طريقتي فيه وخاصه الحشوه مميزه لان فيها كشنه وزبادي فالطعم خطيرر👌

طريقة الحشوة:

نحمس بصل + ثوم + طماط بشوي زيت مع بهارات + ملح + كركم + شوي كاري + صلصله طماط وخليكم كريمين بالبهارات والصلصله 😋

ونحمسهم خمس دقايق بعدها + علبه زبادي ونخليها تطبخ شوي واخر شي + زر مصري طبعا مغسول ونظيف وتقريبا من كاسين ونص الي ثلاث كاسات واترك الرز يطبخ شوي خمس دقايق بس وأرفعه من النار

وبعدها اخلط معه نص حزمه بقدونس + نص حزمه كزبره + ربع حزمه نعناع+ عصير ليمونه .

نحشي ورق العنب بالحشوه ونصفه بقدر فيه حلقات جزر وطماط وبصل ( انتبهوا لا تحطون حلقات بطاطس لانه يمتص كل النكهات وهالشي عرفته من وحده من قريباتي مشهورة بورق العنب 👌) وبعد مانلف ورق العنب ونصفه بالقدر نحاول نحط فوقه ثقل او صحن ونسقيه بخليط الطبخ اللي هو ماء مغلي مع مكعب ماجي عادي او صحي + عصير ليمون + زيت زيتون + ملعقه كبيره صلصله طماط + رشه نعناع مجفف اذا متوفر( ممكن تحطون دبس الرمان بس انا ما أفضله كثير مع ورق العنب ) وطبعا كميه الليمون وزيت الزيتون علي حسب رغبتكم ..

الطبخ:

نطبخه علي نار عاليه اول خمس دقايق وبعدها نقصر عليه ونخليه يطبخ من ساعتين ونص الي ثلاث ساعات حتي يطلع ذااايب ( ممكن تطبخينه بقدر الضغط اختصار للوقت بس انا ماجربت خفت ينهرس 😰)

واذا خلص مانفتح عليه حتي يبرد تماما حتي مايسود الورق ويطلع لونه اخضر يهبل يعني الافضل نسويه قبل بيوم ونقلبه من باتسر او نزينه الصبح ونقلبه بالليل 👌😅 وبالف عافيه علي قلوبكم ❤️ وايه تذكرت ابقولكم علي طريقتي اذا لفيت ورق العنب اقوم اقسمه لثلاث اقسام او قسمين بعلب بلاستيك وافرزنه بالفريزر ( يعني افرزنه من غير طبخ ) ومتي ما اشتهيت منه او إذا عندي مناسبه طلعت لي علبه وطبختها ..

من #وصفات_نورة_الوهيبي

• اقسام تهمك:

  قسم مطبخ كويتيات

  هنا قسم يضم افضل الاكلات الصحية

  و هنا تستمتعين بافضل المشروبات اللذيذة

  بالاضافة الى ذلك، يمكنك هنا تعلم افضل المقبلات

  و ايضا يمكنك هنا مشاهدة افضل وصفات السلطات

   

  و قد تهتمين ايضا بـ

  قسم الموضة مجلة كويتيات

  قسم الام و الطفل

  جمالك في مجلة كويتيات

  صحة مجلة كويتيات قسم يقدم لكم العديد من النصائح الصحي و الغذائية