صباح الخير
ما شالله من زمان ما دخلت المنتدى..
توني خالصة مادرة تاريخ الكويت عند دكتور فهاد العنزي
بتكلم عنه بالتفصيل...
اول شي انصحكم بالمادة للصيفي لان يحذف منها ..
الكتاب 12 فصل جنه .. درسنا 4 كان قايل 5 بس لان ما يمدي
2 للميدتيرم + 2 للفاينل
واللي بالميدتيرم ما دش بالفاينل
فالاكيد ان نظام الصيفي غير عن الكورس العادي
الدكتور فيه عيب حيل قوي
واااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااايد
واااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااايد
يعلللللللللللللللق يعللللللللللللللق و يتطنز و ما يخلي احد بحاله
عددنا بالكلاس 60 طالبة يوميا يعلق على وحدة وحدة حتى لو غبتي ولا سحبتي يظل يعلق
السيكيوريتي يدش و يعلق عليه
يعلق على الناس بالشارع
يعلق عالطلبة عالدكاترة عالفراشين على اهله على الكاتب " ابو حاكمة"
ما يخلي احد كلش والله يعينكم عليه
وعادي فجاة تسوين اي شي يفشلج و يزفج و يقولج طلعي برا ولما تيين بتطلعين يقولج لا اتغشمر
بين قوسين ( غشمرته ثقيلة)
صج دمه خفيف وايد وايد و يضحكنا و هون علينا الصيفي بس الشي ان زاد عن حده يصير" مصاخة"
نظامه يتاخر عن الكلاس 10 دقايق
ما يرضى بالتاخير كلش ولا يسمح فيه .. اخر الايام صار يسمح لان صيفي و عرفنا عدل
وكان يحب شعبتنا حيل يقول اول شعبة مرت علي جذي فتساهل ويانا...
لو تلفونج مو سايلنت و دق لازم تطلعين من القاعة سيدا و اخر المحاضرة تعطينه اسمج يسجلج حضور
ان تكررت الحركة غياب + ينقصج
و هم نفس الشي في بنات عذرهم اخر الايام
وايد يسولف اول ثلث ساعة .. و يحب المناقشات وايد .. ويسمع جميع وجهات النظر
لكن هالمشاركة وهالسوالف ما تزيدج درجة !! يعني ما يعتبرها مشاركة فعلية
الزبدة
تقسيم الدرجات
10 غياب و حضور ( لو غبتي يوم ممككن تاخذين فل مارك , بس لو ما غبتي يعطيج بونص)
20 بحث ( البحث تكتبين عن تاريخ تخصصج مع بنات بالشعبة من نفس التخصص)
35 ميدتيرم ( امتحانه 15 سؤال صح و خطا + 20سؤال اختياري ) + بونص سؤال سخيف واهو يجاوبه بعد ههههههه
35 فاينل موضوعي و نفس طريقة الميدتيرم بس بدون بونص
في مشاركة بونص 5 درجات .. كل مشاركة بدرجة
المشاركة انج تحضرين الدرس الياي و انتي بمكانج تقولين اللي فهمتيه واهو يشرحه
وكل مرة على بنيه.. وغالب البنات حصلو درجة
يكرررررررررررررررررررررره الواسطات
يحب اي مبادرة او نشاط .. اي معلومة من النت و تعطينه المصدر ؟
وصج نسيت ترى ما عنده سالفة الا الجهرا... راح تحسون انها سويسرا الكويت
! تحملو
يعطيكم ايميله لو بتغيبون او تتاخرون تبلغونه قبلها بيوم ..
امتحاناته فيها خدعة يعني ممكن السؤال نفسه بصح و خطا اهو نفسه بالاختياري.. فراح يشوف ويقيم اللي دارسة واللي تشير ...
بس تبون الصج ترى اهو وايد طيب وقلبه نظيف وابيض .. على الرغم من انا نقعد بالقاعة على اعصابنا من التعليقات
صوته بالشرح واطي .. يفضل تقعدين جدام ... و انصحكم بالتحضير والتركيز بالذات اول المنهج عن تاسيس الكويت
لان تاريخ قديم فروايات وايد و راح تتخربطون ما تعرفون الصح من الغلط
وشغلة وايد مهمة !!!!! اللي تحب تسأل انصحها تسكت .. انا كنت اختار اسئلة حيل عامة بالنسبة لي و اترك التفاصيل
ومرة كل 5 محاضرات اسأل ! يقولي ترى وايد اسألتج ! لا تصيرين دقيقة
نفسه ضيجة ما جنه يايين ندرس و نتعلم
ممكن تفاصيل وايد يطوفها بالمنهج..يقول انتو طلبة اقرو و احفظو
كل شي حفظ كل التواريخ و مرة فصل علينا قال حتى الهجري حفظوه p; بس ما حفظنا
والاسامي والمناطق بعد
نهاية الكورس عنده كيرف حلو .. يعني عادي وحدة c تاخذ b
بالنسبة للمنهج بنات
والله حلو بالذات الفصول الاخيرة .. حيل ممتع لو تدرسونه كحب للكويت و ثقافة عامة
مو عشان قريد .. لاتتخيلون انها صعبة والله انا ما احب التاريخ بس لان فخر تعرفين تاريخج صج بتحبين المادة وتدرسينها
وبالتوفيق يارب .. اي سؤال انا حاضرة ^_^
