ريوق راقي من البيت؟؟؟!!!

حبيباتي...
انا اخوي ياته الدرجة... والموظفين عنده يبون ريوق من البيت... قالي وانا محنارة شنو اسوي؟؟؟
ارجوكم المساعدة.... يبي الريوق يوم السبت؟؟؟

يا حمسات او تشكيلة اجبان

وسلطات خفيفة

فول وفلافل اذا لج خلق تسوينهم بالبيت

معجنات خلية نحل بيتزا

اممم ان شالله البنات ما يقصرون بعد


اي اهم شي شوربة العدس

<< تذكرنا بالمدرسة

سويلهم صاج محشي اجبان ومرتديلا ومربيات اخذي الخبز المرقوق من الجمعية اللي اييج مثل الصاج وقصصيهم صغار

ونخي وباجلا

درابيل وقرص عقيلي

روحي امير الامراء و اشتري صمون صغار عندهم منه اشكال : مدور - طويل
و هم بعد الواااان

و حشي الصمون باللي تبينه و صفيه بصواني حلوه و ودي والله هالطريقة سهله و مو متعبه

و اذا تين خلطات تحشين فيها :

- لبنه
مع زعتر و خيار مقصص مربعات صغار - طمام مقطع صغار
تخلطين المقادير و تحشين الصمون

- جبن حلوم

- جبن ابيض

- جبن قشقوان

- مرتديلا / تركي مه جبن

-بيض

- فلافل

و عاد انتي شوفيلج جم بق مع الصمون

مبروك اول شي على ترقيه اخوج



حبيبتي

سويي لهم قرص عقيلي كيكه كامله او صغار صغار كيفج


يبي صمون من كل الاحجام


وسوي حشوات وزينيه من فوق

تقدير تحشينه حلوم
حمسة بيديان
لبنه وزعتر
بيض ............الخ


سوي نوعين سلطه

مطارتين وحده حليب مهيل ووحده شاي بالزغفران
وخليه يشتري عصاير حق اللي مايحب الشاي

انا مرة سويت شغلة استانسو عليها وفنتق جيبي مالت الصاج عندج وحطي طاولة حطي عليها السماور للشاي ومطاطير الحليب بالزعفران والثانية بالهيل وحطي الدرابيل واللقيمات وقرص عقيلي وخلي هذي تسوي الصاج من الفرن الي الصحن كان شي يجنن حبوبة والله ماكلني الا 30 اهي مالت الصاج خذة والباقي ماتكلف امير الامراء واخذي كل ماتبين

بقولج ..... انا قبل سنة سويت ريوق لخواتي من البيت طبعا واكيد في شغلات جبتهم جاهزين :klhfl:
سلطات مثل ... التبولة / الفتوش / سلطة شمندر / فتة باذنجان / سلطة شمندر / س
نواشف / سمبوسك / فلافل / كبه / محشي ورق عنب / فطائر مشكله / فطائر صاج بيتية / رولات دجاج - خضار مشكلة - / صمون فرنسي محشي مشروم ومايونيز والخلطة اكيد مار عليج / بيض اومليت / عجه / فول / حمص / مسبحة / اجبان مشكلة / حلقات خضار ( طماطم - خيار - خس - جزر - ) حطي خيار مخلل / مكدوس / زيتون منوع / طبق لبنه بالزعتر / سندوشات حشيهم بالبيت الي تحبينه
واهم شي التنسيق والترتيب وصدقيني كل هذا انشالله بياخذ منج وقت من بالليل قبله بيوم عشان تجهزينهم واول النهار بس ووارجو ان اكون ما طولت عليج وتحياتي:tek:

حبيباتي ........... مشكورين وماقصرتو وعسى عمركم طويل

ألف مبروك

والبنات ما قصروا

مبرووووووووووووووووووك

وشوفي عندي طذا طبق بيصير مميز وحلو

طبق البيض بالجبن والجزر اليهال مايحبون البيض عندنا نسويه هالطريقه يستخفون لا يغرج المكونات ذوقيها حده عجيب

فوحي بيه((سلقيه)) ويبي جبن مالك لازم مالك من الجمعيه لونه اصفر العلبه وجزر بشريه
الطريقه قشري البيض وقصيه صغار صغار والجبن تكونين مطلعته عشان يذوب شوي وحطيه فوقه وحطي الجزر فوقه وشويت زيت زيتون وفلفل اسود وملح الزيت زيتون نتفففففه وحتا لو باردهم ينوكل ويهبل طبعا قصصي خبز يمه ينوكل ويا خبز وممكن تحشين صمون صغار فيه



طبف ثاني النقانق بالمشروم <=-= وايد مميز ويصلح ريوق

الطريق والمكونات يميع

يبي مقلى كبيره وحطي شويه زيت او زبده اللي يريحج قصي بصل شرايح مو وايد يعني حمسيه
وتالي قطعي النقانق فوقه وحمسيهم وعقب المشروووووووم وحطي فلفل اسود وملح وشووويه كاري نتفه
واخر شي قبل لا تصكرينه حطي قفشه جبن قلاص ويفضل المراعي لانه سااااااااايح هذا هم تقدرين تحطين بطبق ياخذون قد اللي يبون ويا خبز او تقدرين تحشينه



طبق الصمون الصغار بالخلطه<=-=-ماياخذ منج 15 ساعه لذيذ وخطييييييييييييييييييييييييييييييييير
اخذي الصمون الصغار قصيه بالنص حلو يعني كل صمونه نصين وتركيهم
الخلطه اللي بنمسحها فوق الصمون بعد ماقصينااااااااه
جبن كرفت الصغير كلش عدد 2 و4 ملاعق كبيره مايونيز كرفت هذا حق اذا جيسين صمون واذا جيس جبن قلاص واحد وملعقتين مايونيز وضحت السالفه حلووو

تيبين طاسه تحطين الجبن والمايونيز وتيبين البصل الاخضر اللي ناكل اللي تحت الابيض البصل لاااااا احنا نبي الورق الاخضر اللي يصير مثل البقل عرفتيه هذا حطييييييه على الجبن والمايونيز وخلطييييييييه عدل وحطيه فوق الصمون المقصص مسوووووح مو تحطين وايد وصفيه بصينيه حق الفرن وبطلي الفرن من فوق بس يصير اشفر طلعيه لا يحترك بو 5 دقايق مو اكثر يهبببببببببببببببببببببببببببببببببببببببببببببببببببببببل طعمه وفنتق


طبعا سمبوسه وكبه من الهندي لاتتعبين روحج
وباجيلا ونخي
ودرابيل وبقصم
ومطارتين حليب مهيل وجاي زعفران


وسلطات سلطتين كافي بس الصلصله بروح لاتذبل السلطه وصي اخوج يحطهم قبل التقديم عشان يصير فرش
يعني فتوش وتبوله ولا سلطه المندر ولا سلطه البطاط..ألخ

وحمسات البيديان وفول المدمس الجاهز حمسي بصب وطماط وقطيه فوقه ويا بهارات وزيت زيتون ولا احلى

وعصاير طبيعيه من اي عصير تعرفينه اخذي مانجا وفراوله وبرتقال وكيوي بالليمون

وسوي بالبيت صاج دياي
اشتري شاورما امريكانا الجاهزه
الصاج بالجمعيه بجياس جاهز
حمسي بصل وشويه ثوم وفلفل اخضر ومشروم وحطي الدياي وشويه بهارات وملح وشوية كريمه وقفشه جبن قلاص واخر شي بقدونس مفروم وخلصة الحشوه حشي الصاجبهالحشوه ولفيه بشكل حلو


وان شاء الله افدتج
واذا فيه بدليات قوليلي كل شوي بطل لول

أومليت بالخضار و الجبنة

المكونات:

3 بيضــــــــــــــــات مخفــــــــــوقة قليــــــــــلاً . ¼ ملعقــــــــة صغيـــــــــــرة مــــن الملـــــــح . ¼ كــــــوب مــــن الجبــــــن الســـويســــري . رشـــــه مــــن الفــلفـــل الأســـود المطحــون . 2 مــلعقتــــان صغيرتـــان مــن زيت الزيتـــــون . ½ بصلــة صغيــــرة مقطعـــة إلــى شرائــــح . 1 حبـــــة صغيــــرة من الفلفل مقطعــة إلى شرائح . ¼ ملعقـــــة صغيـــرة من الـــريحـان المجفف . 1 حبة صغيرة من الطماطم مقطعة إلى مكعبات .



الطريقة:

تسخن ملعقة صغيرة من الزيت في مقلاة كبيرة تيفال فوق نار متوسطه، تضاف البصلة وتقلى لحوالي ثلاث دقائق حتى تصبح طرية، ثم يضاف الفلفل، والطماطم، والريحان، ويطهى المزيج لمدة ثلاث دقائق أخرى، تنقل الخضار إلى الطبق. يتبل البيض بالملح والفلفل، يسخن الزيت الباقي، يتم رفع أطراف البيض ببطء بينما يرفع قليلاً طرف المقلاة لك يتسرب البيض غير الناضج إلى الأسفل، ويطهى لحوالي دقيقة، ثم ينثر الجبن والخضار فوق نصف الأومليت، تطوى الأومليت فوق الحشوة ، وتزلق في الطبق ثم تقطع إلى نصفين، وتقدم .

البنات ماقصروا

حياتي بلا كل هالتعب طلبي من بونجورنو لذييييذ و رخيييص !!