آآآآآآآآه من عمتي.....ومن أبوي

[كتكوته بحرينية]

ساعات أستغرب ليش لعيال يحبون الخالات والخوال أكثر من عماتهم وأعمامهم؟؟؟؟؟

واللي في نفس حالتي يمكن يلاقي اجابه للسؤال...

انه عمتي ،، قلبها قاسي وايد ،، جافة في التعامل ،، دايما تشوف ان اهيه الصح والباقي غلطانين..

والمشكله الأكبر ان أبوي نسخه منها ،، وانه بررت هاشي بأن السبب كان طلاق يدي ويدتي وهم بسن صغير ويدي الله يرحمه مارباهم ولاصرف عليهم ، يعني افقدوا الحنان من صغرهم..

لكن حتى ولو، احنا من لحمهم ودمهم ،، ونتمنى نجوف ابتسامتهم ،، نسمع سوالفهم ،، ابد ،، احس ان شي ابتسامه ممحي من قاموس حياتهم..

تخيلوا ،، ومع هذا كله ،، عمتي ما تسأل عن أبوي كلش ،، مع انه اكبر منها
تزور عمي وماتزورنا مع انه البيت يم البيت...

يمكن تقولون يمكن الغلط منكم..
بالعكس ..
والله احنا مانقصر نزورها ونتصل فيها ونسأل عنها
بس يمكن لأن عمي يعطيها فلوس واحنا ناس على قد حالنا عشان جذي ماتهتم فينا..

واللي قهرني بزياده،، ان بنت عمتي انخطبت من فتره
وطبعا اهيه اصغر مني وايد
وعمتي قالت حق عمي ومرت عمي واحنا درينا من الغريب
بس فوق هذا كله اتصلنا فيها وباركنا لها
والعجيب ان بنت عمتي فسرت اتصالي اني باخذ اخبارها
انه بس قتلها توج صغيره لو تكملين دراسه وتشتغلين احسن وعقب لاحقه على الزواج
اهيه فسرت هالشي اني غيرانه لان محد تقدملي وعمري 26 واهيه 19
وعمتي حاطه في بالها اني بحسد بناتها
ولما امي قلت حق ابوي ،، طلعها اهيه الصح واحنا الغلط
ودايما يوقف في صفها


محتاره ،، هل استحمل حقدها ومعاملتها وما اقطع صلة الرحم
ولا اطنشها ؟؟

شوروا علي خواتي

 

[عثوله دبي]

حبيبتي ميخالف ، اهيا تظل عمتج وانتي من دمها ولحمــهـآ .. وعشـآن ربج لاتقطعين صلة الرحم ولا تنطرين شي من أحد !
لاتتدخلين فيهم عشـآن لايتفسر تدخلج شي ثآني .. وتصير مشاكل ويوصل حجي انتـي ماقصدتيه لـ [ أبوج ] ..
خلي علاقتج سطحيه ، مثل ماتعاملج كـ بنت أخو ! عامليهـآ كـ عمّه ..

والله يعطيج ع قد نيتج ..
تقبلي مروري

 

[كتكوته بحرينية]

رد : آآآآآآآآه من عمتي.....ومن أبوي

تسلمين اختي عسولة فديتج
مشكورة على النصيحه
بس والله قلبي مايطاوعني اصير سطحية مع احد
انه احب الكل والله
بس الله كريم

 

[ملامح اوروبيه]

انا مع اختي عثوله دبي خلي علاقتج معهااهم سطحيه حييل و اذا هم ما يبون الوصل لا توصلينهم واصلي اللي يستاهلونج لا تركضين ورا اللي يبون غثاج

 

[كتكوته بحرينية]

رد : آآآآآآآآه من عمتي.....ومن أبوي

تسلمين اختي ملامح اوروبه
مشكورة ماقصرتي
اي والله ما يي من وراهم الا الغثا

 

[بعد عمري]

خلج احسن منهم و واصليهم بس خلج حذرة في كلامج معاهم خبرج الحين اللي ينصح اهوة العدو فماله داعي تبدين رايج في شي يخصهم والله الحين تغيرت نفوس الاهل وما عادوا نفس اول.. الله يعين

 

[≈ ω ђ ṃ]

رد : آآآآآآآآه من عمتي.....ومن أبوي

فيه حديث عن الرحم مآبي آذكره وآنآ مو عارفته عدل


بس بمآ معنـآه من وصل رحمه وصل ربه >>


انتي مآعليج من الحجي

وقت عيد وقت رمضآن دقي باركي وسلمي

زوريهم ولو بس دقيقتين


آخذي الاجر بس وماعليج

الي يتحمل عشـآن ربه ربه يعوضه باحسن من الي تحمله



آنتم اهل ومردكم لبعض

ربي يصلح بينكم

 

[الحياة حلوووه]

الله يوفقج ويرزقج انشاء الله...والافضل لك اختي تخلين علاقتك سطحيه لانو الحب من الله وعمتك باين عليها منك تغار منك..

 

[جذابه بنت ذيابه]

رد : آآآآآآآآه من عمتي.....ومن أبوي

خلج انتي الطيبه الرزينه السنعه


دقي اسبوعيا اسألي عن عمتج طرشي مسج لها .. مو شرط ادقين



..


صلة الرحم واجب ياقلبي


ومن ناحية الغلا مو شرط تبين لج يمكن تحبكم وتغليكم بس ماتبي تبين


وانتي ماتدرين عن اللي بقلبها


اعمليها بالطيب وخليها هي .. الشينه وانتي الزينه

 

[روانتي 12]

رد : آآآآآآآآه من عمتي.....ومن أبوي

ميخالف حبيبتي ,

 

[Tom ♥ Jerry]

.


وآجب عليج تزورينهآ " صله رحم "
اذا مآ تبين تختلطين فيها خلاص خلج رسميه شوي
مو الا سوالف و ظحك و كل يوم تروحين لها : )

و الله يهدي ابوج يارب
و مبروكين على زوآج بنت عمتج

 

[Om-Faty]

رد : آآآآآآآآه من عمتي.....ومن أبوي

اييييي واللله صح كلامج في وايد يحبون اهل امهم اكثر من اهل ابوهم
عندنا وعندج خير
عمتي قطيعه تقطعها وايد كانت تتدخل بحياتنا وتشيش ابوي علينا لدرجة انها قالتله لا تخلي بناتك يروحون الصالون يحفون !!!!! هذي شتسوين فيها بالله ما غير ودج تذبحينها
والحين بنتها يااااهل وتحف ومكياااج وحااالتها حاله
ولمن تزوجت حاولت تخرب زواجي باي طريقه اهيا وبنتها حسبي الله عليهم دنيا واخره
بس الحمدلله ما قدرت كل هذا لان انا تزوجت قبل بنتها اللي عمرها الحين 23 سنه
وانا كنت حيييل مع بنتها واعزها بس مو كفو مالت عليها ويوم يولها ناس يتقدمون حق حضرتها حلفت قلت والله محد يجهزلج غيري ورحت لي بيتهم بعد ومكيجتها جبح ويه
وبيوم عرسي ما سلمت علي والمشكله ابوي كله يدافع عنها
بس من كثر ما تحسبت عليها والله كل ما واحد يتقدم لها يرفضونها خو بعد اهي عليها قضية تغيب استغفرالله ياربي اللهم لا شماته

 

[الغاليه ام احمد]

ما عليه حبيبتي اهم شي صلة الرحم

زوريها وسلمي ولا تطولين

 

[منوووووله]

طنشي وسوي الي عليج لاتقطعين صلة الرحم

 

[حصــgص..~!]

رد : آآآآآآآآه من عمتي.....ومن أبوي

خلي علآقتج سطحيه معاهآ ..


واهمم ششي لآ تقطعين صلة الرحم =)

 

[شووكولاته]

صح لاتقطعين الرحم بس لاتكثرين الدوس سلام وشخباركم وبس لاتدخلين وايد بالسوالف

 

[حبك مايعاضي]

عن انس بن مالك رضي الله عنه قال سمعت رسول الله صلى الله عليه وسلم يقول " من سره أن يبسط له في رزقه أوينسأ له في أثره فليصل رحمه "
يبسط أي يوسع له في الرزق
وينيسأ اي يزيد في عمره وله الذكر الحسن بعد الموت


بس وش رايج باللي زوجها يطردها من انها تصل رحمها لاحول ولا قوة الا بالله

 

[ابي قطوة]

رد : آآآآآآآآه من عمتي.....ومن أبوي

الله يهديهم

 

[معزوفة عشق&]

رد : آآآآآآآآه من عمتي.....ومن أبوي

ما انصحك تقطعين صلة الارحام
لان لقطع صلة الرحم لها عقوبة ف الدنيا والاخره اللهم اجرنا

انا بعد كذ1 عماتي يزورون جارتنا والبيت بجنب البيت ولا يجون يزورونا

وابوي اكبر منهم وماسك مسؤولية عيالهم بعد
الشكوى لله