آبي نصيحتكم

[آحبه حب هآلكني]

السلآم عليكم ..




شلونكم شخباركم إن شاء الله كلكم بخير وعافيه



انا مشكلتي مشكله .. انا ودي احس اني ادميه ولي هدف بهالحياه .. ودي اصير مثقفه مثل كل هالناس انا ادري ان


محد احسن من احد بس مادري شسوي كل ما ابي اقرأ كتاب او شي احس اني ما افهم شي وماعرف مصطلحات


اللغه العربيه ويحوشني احباط شديد واحط فبالي اني ما افهم لين صج احس اني صرت ما افهم شي ولا اعرف


احاور احد كلش كلش احس اني جاهله وغبيه ومنبوذه .. سوري على هالحجي بس جد انا اعاني وابي مساعدتكم


طبعا بعد الله سبحانه وتعالى فـ الي تعرف كتب حق الثروه اللغويه او كتب لتنمية الذات او او او تقدر تحل


معاناتي جزاها الله خير تنورني الله ينور عليها دنيا واخره واسفه على الطواله .:eh_s(17):

 

[Eng_Roka]

عادي يا قلبي هذا لانج بالبدايه ومو متعودة فتملين

بالبدايه ابدي بالاشياء الخفيفه مثل الكتب الضعيفه الخفيفه

انصحج بكتاب من الذي حرك قطعه الجبن الخاصه بي؟؟

راح يساعدج تتشجعين وتتغيرين

اذا صعبه عليج اللغه العربيه تقدرين تبدين بالروايات اللي تكون بالعاميه

بس تخلينها لفترة قصيرة ما تظلين تقرينها على طول

وتجنبي الكتب المتينه الثقيله ابدي بأشياء خفيفه

حددي المجال اللي ودج تقرين فيه ممكن بالبدايه تبدين بروايات تكون خفيفه ومسليه بعدين تتدرجين تروحين حق كتب تطوير الذات وغيره

الحين انصحج بكتب خالد النصر الله موجودين بفيرجن
علياء الكاظمي هم تلقينهم بفيرجن
اذا تحبين اشياء بوليسيه تقدرين تقرين حق اغاثا كريستي بس تجنبي النص الكامل بما انج بالبدايه اخذي الي يكون مختصر نوعا ما
كتب بلاتينيوم متنوعه تقدرين تختارين بالمجال اللي تحبينه

هذا بالبدايه بس بعد فترة حاولي تقرين بتطوير الذات وكتب السيرة
ما عندي خبرة كبيرة بكتب السيرة يس انصحج بالسجينه ( مليكه اوفقير )
وتطوير الذات عندج شوربه دجاج و من الذي حرك قطعه الجبن الخاصه بي و الهديه

انشالله اكون فدتج

اي استفسار لا يردج الا كيبوردج
*

 

[سكرة هانم]

رد : آبي نصيحتكم

شي طبيعي اللي تحسين فيه ...

بس ممكن مثل ما قالت حلوه .. انج تبدين بكتب خفيفه وبالعاميه عشان تعودين نفسج شوي شوي

بعدها اخذي اللي باللغه العربيه الفصحى وحته لو واجهتي صعبوبه بكلمه طوفيها راح تفهمين

وتره القرايه تساعدج تكونين مثقفه وملمه بوايد شغلات بس اختاري الكتب والروايات المفيده

بصراحه شخصيا انا ما احب قصص الحب والغرام والكتب المحليه جربت اقره ونهايه الكتب الرف

لاني ما اشوف انها تزيدني باي شي ...

انتي كبدايه اخذي الاشياء اللي تجذبج وتدرجي ...

حاولي تكثفين وجوده بهالقسم ودشي قوقل دوري منتديات ثقافيه وكتب واقري الملخصات اللي يحطونها الاعضاء كبدايه لما اتعودين ...

بالتوفيق يارب

 

[بيلسان المنار]

رد : آبي نصيحتكم

عادي يا قلبي يبييلج فتره و صبر
و ماشاء الله ما قصروا خواتي حلوه بس مو سهله و سكره هانم
و بعدين اي كلمه عربيه ما فهمتيها عندج المعجم يفسرها لج و بعدين اكثري من قراءة القرآن لانه يساعد في تثقيف النفس غير انه راحه و تأجرين عليها
و اقري كتب للتنميه اللغويه و فن الاتصال و التواصل مع الناس
و شيلي فكرة انج ما تعرفين و ما تفهمين ترا هذا كله يحبطج انا مجربه قبلج

 

[LUXURY]

حبيبتي اول غلط قلتي احس نفسي منبوذه وما اعرف وما أفهم

باقولج شئ وهذا صحيح ومثبت بعلم النفس ولا تحسبين اتطنز والا اتغشمر من صجي
كل يوم لما تقعدين من النوم جابلي والمنظره (اليوم راح اكون ناجحه - اليوم راح اقول شئ محد يعرفه وكل من بيسألني - اليوم بيكون احلى يوم بحياتي - اليم باكون مرتاحه - ....ألخ) اي شئ تبينه وكرريه ثلاث مرات وانتي مبتسمه وخلي عندج ثقه وصدقي اللي تقولينه

وقبل النوم سوي نفس الشئ بس قولي باجر بدال اليوم

بعدها ماشاء الله المكتبات فيهم كمية كتب حلوه بكل المجالات

انصحج باشياء خفيفه كبدايه وابتعدي عن الروايات الخياليه والغراميه لان اساسا هذي هوايه مو ثقافه

دوريلج كتب تطوير الذات مثل اللي اقترحتهم الاخت الحلوه اللي قبلي وانا بنفسي ناويه اشتري من حرك قطعة الجبن خاصتي و شوربة دجاج

انا قريت الرجال من المريخ والنساء من الزهره وشريتلي كتاب لماذا يكذب الرجال وتبكي المرأه

طبعا تقرين حسب ميولج وشخصيتج وحياتج

وعلى فكره انا حاااااااااالا حاااااااااالا طالعه من موقع امازون حاطتلي بالسله 18 كتاب التحكم بالغضب وتطوير الذات وتحويل الشخصيه الى محبوبه واسرار النجاح وغيره

واي مساعده ياقلبي لاتترددين اهم شئ انج تشيلين الفكره السلبيه من بالج
وثاني شئ مشوار الالف ميل يبدأ بخطوه
باجر باذن الله مري جرير اخذيلج كتاب واحد وقولي لما اخلصه باكافئ نفسي بكتاب ثاني
وحطي يمج ورقه وقلم ومعجم
كتبي النقاط اللي ممكن تتوهج او شئ عجبج علشان لاتنسين اللي قريتيه وطلعي الكلمات الصعبه من المعجم

والله يوفقج حبيبتي ونشوف مكتبتج هاااااالكبببببببببببببببببببر

 

[ليلو جبريت]

رد : آبي نصيحتكم

فديت البنات ردودهم روووعه

اعتقد وفوا وكفوا

 

[خولـه]

كلنا باليدايه جذي انا كنت مثلج ما افهم شي بس مع القراءه الحمدالله صرت احسن بوايد

حاولي تتابعين اخبار وتقرين جرايد حتى لو مافهمتي عيدي اقري مره ثانيه واقري روايات نفس شيفرة دافنشي وتوايلايت


مواضيع رحيل المرافئ حلوه اقريها فيها معلومات خطيره



حاولي تقرين وااايد

 

[رحيل المرافيء]

رد : آبي نصيحتكم

ابدي بالقصص القصيرة
والكتب الصغيرة
مدري عن نفسي ما احب كتب تطوير الذات احسها بايخة وماتفيد ويمكن هذا اللي تحسينه مدري عشان جذيه تملين
اقري شي تحبينه
وبالنسبة للثروة اللغوية تكتسبينها من القراءة مو شرط اقرأ كتاب عن اللغة لااا
اقري شعر نثر قصص اي شي
مع الوقت تتقوى لغتج ويصير عندج مخزون لغوي
اقري كتب عن التراث والكلمات القديمة واللهجة القديمة ايضا بتنفعج لا ييتي تتكلمين تعرفين معنات الكلمة

انصحج عندج قماشة العليان قصص قصيرة وايد عندها واسلوبها جدا مميز وسلس
ليلى العثمان حمد الحمد اخذي القصص القصيرة لهم
كتب اكوو وايد ممكن تبدين بكتب لطائف وطرائف العرب تلاقين وايد حلوين
ممكن ملخصات لمقولات وحكم وابيات شعرية فيه وايد
اللي اعرفه غازي القصيبي وعائض القرني ومحمد عبدالله الداوود عندهم هالنوع من الكتب
ملخصين فيه اجمل ماقرأوا
بالنت تلاقين اموور كثيرة جدااااااااا

 

[Tom ♥ Jerry]

رد : آبي نصيحتكم

.


البنات قالوآ كل الكلآم الي كنت بقوله لج !
خصصي ساعتين في اليوم تقرين فيهآ بمكآن هآدئ و مريح اقري عن الاشياء الي تحبينهآ
ميلوج شنو ؟ قصص ؟ روايات ؟ سياسه ؟ طبخ ؟ اسره ؟ دين ؟
الي تحبينه اقريله !

.